Read Bíbélì Mímọ́ ní Èdè Yorùbá Òde-Òní Ìwé Sáàmù 105 Bible Online

Ìwé Sáàmù 105 - Bíbélì Mímọ́ ní Èdè Yorùbá Òde-Òní bible

Ìwé Sáàmù 105

¹ Ẹ fi ọpẹ́ fún OLÚWA, ké pe orukọ Rẹ̀: Jẹ́ kí a mọ ohun tí ó ṣe láàrin àwọn orílẹ̀ èdè;

²Kọrin sí i, kọrin ìyìn sí i; sọ ti iṣẹ́ ìyanu Rẹ̀ gbogbo.

³Ṣògo nínú orúkọ mímọ́ Rẹ̀: Jẹ́ kí ọkàn àwọn tí ń wá OLÚWA kí ó yọ̀.

⁴Wá OLÚWA àti ipá Rẹ̀; wa ojú Rẹ̀ nígbà gbogbo.

⁵Rantí àwọn ìyanu tí ó ti ṣe, ìyanu Rẹ̀, àti ìdájọ́ tí ó sọ,

⁶Ẹ̀yin ìran Ábúráhámù ìránṣẹ́ Rẹ̀, ẹ̀yin ọmọkùnrin Jákọ́bù, àyànfẹ́ Rẹ̀.

⁷Òun ni OLÚWA Ọlọ́run wa: ìdájọ́ Rẹ̀ wà ní gbogbo ayé.

⁸ Ó rántí májẹ̀mú Rẹ̀ láéláé, ọ̀rọ̀ tí ó páláṣẹ, fún ẹgbẹgbẹ̀rún ìran;

⁹Májẹ̀mu tí ó ṣe pẹ̀lú Ábúráhámù, àti ìbúra tí ó búra fún Ísáákì.

¹⁰Ó fi da Jákọ́bù lójú gẹ́gẹ́ bí àṣẹ sí Ísírẹ́lì gẹ́gẹ́ bi májẹ̀mú ayérayé

¹¹“Fún ìwọ ní èmi ó fún ní ilẹ̀ Kénánì gẹ́gẹ́ bí ìpín tí ìwọ ó jogún”.

¹²Nígbà tí wọn kéré níye, wọn kéré jọjọ, àti àwọn àjòjì níbẹ̀

¹³Wọn ń lọ láti orílẹ̀ èdè sí orílẹ̀ èdè, láti ìjọba kan sí òmìrán.

¹⁴Kò gba ẹnikẹ́ni láàyè láti pọ́n wọn lójú; ó fi ọba bú nítorí tí wọn:

¹⁵“Má ṣe fọwọ́ kan ẹni àmì òróró mi, má sì ṣe wòlíì mi nibi.”

¹⁶Ó pe ìyàn sórí ilẹ̀ náà ó sì pa gbogbo ìpèṣè oúnjẹ wọn run;

¹⁷Ó sì rán ọkùnrin kan ṣíwájú wọn Jósẹ́fù tí a tà gẹ́gẹ́ bí ẹrú.

¹⁸Wọn fi sẹkẹ́sẹkẹ̀ bọ ẹsẹ̀ Rẹ̀ a gbé ọrùn Rẹ̀ sínú irin

¹⁹Títí ọ̀rọ̀ tí ó sọ tẹ́lẹ̀ fi ṣẹ títí ọ̀rọ̀ OLÚWA fi dá a láre.

²⁰Ọba ránsẹ́ lọ tú u sílẹ̀ àwọn aláṣẹ ènìyàn tú u sílẹ̀

²¹Ó fi jẹ olúwa lórí ilẹ̀ Rẹ̀ aláṣẹ lórí ohun gbogbo tí ó ní,

²²Gẹ́gẹ́ bí ìfẹ́ Rẹ̀, kí ó máa ṣe àkóso àwọn ọmọ aládé kí ó sì kọ́ àwọn àgbà Rẹ̀ ní ọgbọ́n.

²³Ísírẹ́lì wá sí Éjíbítì; Jákọ́bù sì ṣe àtìpó ní ilé Ámù.

²⁴OLÚWA, sì mú àwọn ọmọ Rẹ̀ bí síi ó sì mú wọn lágbára jù àwọn ọ̀tá wọn lọ

²⁵Ó yí wọn lọkàn padà láti korìíra àwọn ènìyàn láti ṣe àrékérekè sí àwọn ìránṣẹ́ Rẹ̀.

²⁶Ó rán Mósè ìránṣẹ́ Rẹ̀ àti Árónì tí ó ti yàn

²⁷Wọn ń ṣé iṣẹ́ ìyanu láàrin wọn ó ṣe iṣẹ́ ìyanu ní Ámù

²⁸Ó rán òkùnkùn o sì mú ilẹ̀ ṣú wọn kò sì sọ̀rọ̀ òdì sí ọ̀rọ̀ Rẹ̀?

²⁹Ó sọ omi wọn di ẹ̀jẹ̀, ó pa ẹja wọn.

³⁰Ilẹ̀ mú ọ̀pọ̀lọ́ jáde wá, èyí tí ó lọ sí ìyẹ̀wù àwọn ọba wọn.

³¹Ó sọ̀rọ̀, onírúurú eṣnṣin sì dìde, ó sì hu kantíkantí ní ilẹ̀ wọn

³²Ó sọ òjò di yìnyín, àti ọ̀wọ́ iná ní ilẹ̀ wọn;

³³Ó lu àjàrà wọn àti igi ọ̀pọ̀tọ́ wọn ó sì dá igi orílẹ̀ èdè wọn.

³⁴Ó sọ̀rọ̀, eésú sì dé, àti kòkòrò ní àìníye,

³⁵Wọn sì jẹ gbogbo ewé ilẹ̀ wọn, wọ́n sì jẹ èso ilẹ̀ wọn run

³⁶Nígbà náà, ó kọlu gbogbo àwọn ilẹ̀ wọn, ààyò gbogbo ipá wọ́n.

³⁷Ó mú Ísírẹ́lì jáde ti òun ti fàdákà àti wúrà, nínú ẹ̀yà Rẹ̀ kò sí aláìlera kan.

³⁸Inú Éjíbítì dùn nígbà tí wọn ń lọ, nítorí ẹ̀rù àwọn Ísírẹ́lí ń bá wọ́n.

³⁹Ó ta awọsánmọ̀ fún ìbòrí, àti iná láti fún wọn ni ìmọ́lẹ̀ lálẹ́

⁴⁰Wọn bèèrè, ó sì mú ẹyẹ àparò wá, ó sì fi oúnjẹ ọ̀run tẹ́ wọ́n lọ́rùn.

⁴¹Ó sì la àpáta, ó sì mú omi jáde; gẹ́gẹ́ bí odò tí ń ṣàn níbi gbígbẹ.

⁴²Nítorí ó rántí ìlérí mímọ́ Rẹ̀ àti Ábúráhámù ìránṣẹ́ Rẹ̀.

⁴³Ó sì fi ayọ̀ mú àwọn ènìyàn Rẹ̀ jáde pẹ̀lú ayọ̀ ní ó yan àyànfẹ́ Rẹ̀

⁴⁴Ó fún wọn ní ilẹ̀ ìní náà, wọn sì jogún iṣẹ́ àwọn ènìyàn náà,

⁴⁵Kí wọn kí ó le máa pa àṣẹ Rẹ̀ mọ́ kí wọn kí ó le kíyèsí òfin Rẹ̀. Ẹ fi ìyìn fún OLÚWA.