Read Bíbélì Mímọ́ ní Èdè Yorùbá Òde-Òní Ìwé Sáàmù 106 Bible Online

Ìwé Sáàmù 106 - Bíbélì Mímọ́ ní Èdè Yorùbá Òde-Òní bible

Ìwé Sáàmù 106

¹ Yin OLÚWA Ẹ fi ìyìn fún OLÚWA, nítorí tí o ṣeun. Ẹ fi ọpẹ́ fún OLÚWA nítorí tí ó ṣeun; Nítorí tí ìfẹ́ Rẹ̀ dúró láéláé.

²Ta ni ó le ròyìn iṣẹ́ agbára OLÚWA ta ni lè sọ nípa ìyìn Rẹ̀?

³Ìbùkún ni fún àwọn tí ń pa ìdájọ́ mọ́? Ẹni tí tí ń ṣe ohun tí ó tọ́

⁴Rántí mi, OLÚWA, Nígbà tí ó bá fi ojú rere Rẹ̀ hàn, wá sí ìhà mi nígbà tí ìwọ bá gbà wọ́n,

⁵Kí èmi kí ó lè jẹ ìgbádùn àlàáfíà àwọn tí ìwọ ti yàn kí èmi kí ó sì darapọ̀ mọ́ àwọn ènìyàn ìní Rẹ láti jọ yìn ọ́ lógo.

⁶Àwa ti dẹ́sẹ̀ gẹ́gẹ́ bí àwọn baba wa ti ṣe àwa ti ṣe ohun tí kò dá a a sì ti hùwà búburú

⁷Nígbà tí àwọn baba wa wà ní Éjíbítì iṣẹ́ ìyanu Rẹ kò yé wọn wọn kò rántí ọ̀pọ̀lọpọ̀ àánú Rẹ gẹ́gẹ́ bí wọn ṣe sọ̀tẹ̀ sí ọ níbi òkun, àní nibi òkun pupa

⁸Ṣùgbọ́n o gbà wọ́n là nítorí orúkọ Rẹ láti jẹ́ kí agbára ńlá Rẹ di mímọ̀

⁹O bá òkun pupa wí, ó sì gbẹ; o sì mú wọn la ìbú já bí ihà

¹⁰O gbà wọ́n là kúrò lọ́wọ́ àwọn ọ̀tá wọn láti ọwọ́ ọ̀tá ni ó ti gbà wọ́n

¹¹Omi ya lu àwọn ọ̀tá wọn, bẹ́ẹ̀ ni kò sí èyí tí ó yè nínú wọn.

¹²Nígbà náà wọn gba ìpínnú Rẹ gbọ́ wọ́n sì kọrin ìyìn Rẹ.

¹³Ṣùgbọ́n wọn kò pẹ́ gbàgbé ohun tí o ṣe wọn kò sí dúró gba ìmọ̀ràn Rẹ

¹⁴Nínú ihà ni wọn tí ṣe ìfẹ́kúfẹ̀ẹ́ nínú aṣálẹ̀ wọn dán Ọlọ́run wò

¹⁵Nígbà náà, ó fún wọn ní ohun tí wọ́n bèèrè fún ṣùgbọ́n ó rán àìsàn búburú sí wọn.

¹⁶Nínú ibùdó ni wọ́n ṣe ìlara Mósè pẹ̀lú Árónì, ẹni tí ó jẹ́ mímọ́ sí OLÚWA.

¹⁷Ilẹ̀ la ẹnu ó sì gbé Dátanì mì ó bo ẹgbẹ́ Àbìrámù mọ́lẹ̀

¹⁸Ọwọ́ iná yọ ní ẹgbẹ́ àwọn ọmọ ẹ̀yin Rẹ̀; iná jo àwọn ènìyàn búburú.

¹⁹Ní Hórébù wọ́n ṣe ẹ̀gbọ̀rọ̀ màlúù wọn sì sin òrìṣà tí a ṣe láti ara ìrìn.

²⁰Wọn pa ògo wọn dà sí àwòrán màlúù, tí ń jẹ koríko.

²¹Wọ́n gbàgbé Ọlọ́run, ẹni tí í gbàwọ́n ẹni tí ó ti ṣe ohun ńlá fún Éjíbítì,

²²Iṣẹ́ ìyanu ní ilẹ̀ Ámù àti ohun ẹ̀rù ni ẹ̀bá òkun pupa

²³Bẹ́ẹ̀ ní, ó sọ wí pé oun yóò pa wọ́n run bí kò ba ṣe tí Mósè, tí ó yàn, tí ó dúró níwájú ẹ̀yà náà tí ó pa ìbínú Rẹ̀ mọ́ láti má pa wọ́n run mọ́

²⁴Nígbà náà, wọn kẹ́gàn ilẹ̀ dídára náà wọn kò gba ilérí Rẹ̀ gbọ́.

²⁵Wọn ń kùn nínú àgọ́ wọn wọn kò sì gbọ́ràn sí OLÚWA.

²⁶Bẹ́ẹ̀ ni ó gbé ọwọ́ Rẹ̀ sókè sí wọn kí òun le jẹ́ kí wọn ṣubú nínú ihà,

²⁷Láti jẹ́ kí àwọn ọmọ Rẹ̀ ṣubú lára orílẹ̀ èdè láti fọ́nu wọn káàkiri lórí ilẹ̀.

²⁸Wọn dá ara wọn pọ̀ mọ́ Baali-Péórù, wọn sì ń jẹ ẹbọ ti a rú sí àwọn òkú òrìṣà

²⁹Wọ́n mú Ọlọ́run bínú pẹ̀lú ohun búburú tí wọn ń ṣe àjàkálẹ̀-àrùn jáde láàrin wọn.

³⁰Ṣùgbọ́n Fínéhásì dìde láti dá sí i, àjàkálẹ̀-àrùn náà sì dáwọ́ dúró lọ́gán

³¹A sì ka èyí sí òdodo fún un àti fún àwọn ìrandíran tí ń bọ̀

³²Níbi omi Méríbà, wọn bí Ọlọ́run nínú, ohun búburú wá sí orí Mósè nítorí wọn.

³³Nítorí tí wọ́n ṣọ̀tẹ̀ sí ẹ̀mí Ọlọ́run. Ọ̀rọ̀ àìdára sì ti ẹnu Mósè wá.

³⁴Wọn kò pa àwọn ènìyàn run gẹ́gẹ́ bí Ọlọ́run tí sọ fún wọn,

³⁵Ṣùgbọ́n wọn dàpọ̀ mọ́ àwọn orílẹ̀ èdè, wọ́n sì gbà láti ṣe bí àṣà wọn

³⁶Wọ́n sì sin àwọn òrìṣà wọn tí o di ìkẹ́kùn fún wọn.

³⁷Wọ́n fi àwọn ọmọkùnrin wọn rúbọ àti àwọn ọmọbìnrin fún òrìsà.

³⁸Wọn ta ẹ̀jẹ̀ aláìṣẹ̀ sílẹ̀. Ẹ̀jẹ̀ àwọn ọmọkùnrin àti àwọn ọmọbìnrin wọn. Wọn fi wọ́n rúbọ sí ère Kénánì, ilẹ̀ náà sì di àìmọ́ fún ẹ̀jẹ̀

³⁹Wọn si fi ìṣe ara wọn sọ ara wọn di aláìmọ́, wọ́n sì ṣe panṣágà lọ pẹ̀lú iṣẹ́ wọn.

⁴⁰Nígbà náà OLÚWA bínú sí àwọn ènìyàn Rẹ̀ ó sì kórìíra àwọn ènìyàn Rẹ̀

⁴¹Ó sì fà wọ́n lé àwọn orílẹ̀ èdè lọ́wọ́, àwọn ọ̀tá wọn sì jọba lórí wọn.

⁴²Àwọn ọ̀tá wọn sì ń pọ́n wọ́n lójú wọn sì mú wọn sìn lábẹ́ àṣẹ wọn.

⁴³Ní ọ̀pọ̀ ìgbà òun gbà wọ́n, Ṣíbẹ̀ wọ́n si ń ṣọ̀tẹ̀ sí ì wọ́n sì sòfò dànù nínú ẹ̀ṣẹ̀ wọn.

⁴⁴Ṣùgbọ́n o kíyèsí wọn nítorí ìṣòro nígbà tí ó gbọ́ ẹkún wọn;

⁴⁵Ó rántí májẹ̀mú Rẹ̀ nítorí wọn Nítorí agbára ìfẹ́ Rẹ̀, ó ṣàánú wọn.

⁴⁶Lójú gbogbo àwọn tí o kó wọn ní ìgbèkùn ó mú wọn rí àánú.

⁴⁷ Gbà wá, OLÚWA Ọlọ́run wa, kí o sì ṣà wá jọ kúrò láàrin àwọn aláìkọlà láti máa fí ọpẹ́ fún orúkọ mímọ́ Rẹ láti máa ṣògo nínú ìyìn Rẹ.

⁴⁸Olùbùkún ni OLÚWA, Ọlọ́run Ísírẹ́lì, láti ìrandíran Jẹ́ kí gbogbo ènìyàn kí ó wí pé, “Àmín!” Ẹ fi ìyìn fún OLÚWA!