Read Bíbélì Mímọ́ ní Èdè Yorùbá Òde-Òní Ìwé Sáàmù 107 Bible Online

Ìwé Sáàmù 107 - Bíbélì Mímọ́ ní Èdè Yorùbá Òde-Òní bible

Ìwé Sáàmù 107

¹Ẹ fi ọpẹ́ fún OLÚWA, nítorí tí ó ṣeun; nítorí ìfẹ́ Rẹ̀ dúró láéláé.

²Jẹ́ kí àwọn ẹni ìràpadà OLÚWA kí ó wí bayí, àwọn ẹni tí ó ràpadà kúrò lọ́wọ́ ọ̀tá,

³Àwọn tí ó kó jọ láti ilẹ̀ wọ̀nnì láti ìlà òòrùn àti ìwọ̀ òòrùn, láti àríwá àti òkun wá.

⁴Wọn ń rìn káàkiri ni ihà ni ibi tí ọ̀nà kò sí, wọn kòrí ọ̀nà lọ sí ìlú níbi tí wọn ó máa gbé

⁵Ebi ń pa wọn, òùngbẹ gbẹ wọn, ó sì Rẹ̀ ọkàn wọn nínú wọn.

⁶Ní ìgbà náà wọn kígbe sókè sí OLÚWA nínú ìdàámú wọn, ó sì yọ wọ́n kúrò nínú ìrora wọn

⁷Ó fi ọ̀nà títọ́ hàn wọ́n sí ìlú tí wọ́n lè máa gbé

⁸Ẹ jẹ́ kí wọn máa yin OLÚWA nítorí ìṣeun ìfẹ́ Rẹ̀ àti nítorí iṣẹ́ ìyanu Rẹ̀ sí àwọn ọmọ ènìyàn,

⁹Nítorí tí ó tẹ́ ìfẹ́ ọkàn lọ́run ó sì fi ire fún ọkàn tí ebi ń pa.

¹⁰Ọ̀pọ̀ jókòó nínú òkùnkùn àti òjìji ikú, a dè wọ́n ni ìrora àti ní irin,

¹¹Nítorí tí wọ́n ṣe àìgbọ́ràn sí ọ̀rọ̀ Ọlọ́run, wọn kẹ́gàn ìbáwí Ọ̀gá ògo,

¹²Ó sì fi ìkorò Rẹ àyà wọn sílẹ̀; wọn ṣubú, kò sì sí ẹni tí yóò ràn wọ́n lọ́wọ́.

¹³Ní ìgbà náà wọ́n ké pe OLÚWA nínú ìdàámú wọn, ó sì gbà wọ́n nínú ìṣòro wọn

¹⁴Ó mú wọn jáde kúrò nínú òkùnkùn àti òjìji ikú, ó sì fa irin tí wọ́n fi dè wọ́n já.

¹⁵Ẹ jẹ́ kí wọ́n fi ọpẹ́ fún OLÚWA Nítorí ìṣeun ìfẹ́ Rẹ̀ àti nítorí iṣẹ́ ìyanu Rẹ̀ sí ọmọ ènìyàn.

¹⁶Nítorí tí ó já ilẹ̀kùn idẹ wọ̀n-ọn-nì ó sì ke irin wọ̀n nì ní agbede-méjì.

¹⁷Ọ̀pọ̀ di aṣiwèrè nítorí ìrékọjá wọn wọ́n sì pọ́n wọn lójú nítorí ẹ̀ṣẹ̀ wọn

¹⁸Wọ́n kọ gbogbo oúnjẹ wọ́n sì sún mọ́ ẹnu ọ̀nà ikú.

¹⁹Nígbà náà wọn kígbe sí OLÚWA nínú ìṣòro wọn, ó sì yọ wọ́n nínú ìdàámú wọn

²⁰Ó rán ọ̀rọ̀ Rẹ̀, ara wọn sí dá ó sì yọ̀ wọ́n nínú isà òkú.

²¹Ẹ jẹ́ kí wọ́n fi ọpẹ́ fún OLÚWA nítorí ìṣeun ìfẹ́ Rẹ̀ àti iṣẹ ìyanu Rẹ̀ fún ọmọ ènìyàn.

²²Jẹ́ kí wọn rú ẹbọ ọpẹ́ kí wọn kí ó fi ayọ̀ sọ̀rọ̀ iṣẹ́ Rẹ̀.

²³Àwọn ti ń sọ̀kalẹ̀ lọ sí òkun nínú ọkọ̀ ojú omi, wọn jẹ́ oníṣòwò nínú omi ńlá.

²⁴Wọn ri iṣẹ́ OLÚWA, àti iṣẹ́ ìyanu Rẹ̀ nínú ibú

²⁵Nítorí tí ó pasẹ, ó sì mú ìjì fẹ́ tí ó gbé ríru Rẹ̀ sókè.

²⁶Wọ́n gòkè lọ sí ọ̀run wọn sì tún sọ̀kalẹ̀ lọ sí ibú: nítorí ìpọ́njú ọkan wọn di omi

²⁷Wọ́n ń ta gbọ̀n-ọ́ngbọ̀n-ọ́n bí ọ̀mùtí ènìyàn: ọgbọ́n wọn sì dé òpin.

²⁸Nígbà náà wọ́n ń kígbe sókè sí OLÚWA nínú ìdàámú wọn, ó sì mú wọn jáde nínú ìṣòro wọn.

²⁹Ó sọ ìjì di ìdákẹ́-rọ́rọ́ bẹ́ẹ̀ ní rirú omi Rẹ̀ duro jẹ́ẹ́;

³⁰Inú wọn dùn nígbà tí ara wọn balẹ̀, ó mú wọn lọ sí ibi tí ọkàn wọn lọ,

³¹Jẹ́ kí wọn fi ọpẹ́ fún OLÚWA nítorí ìṣeun ìfẹ́ Rẹ̀ àti iṣẹ́ ìyanu Rẹ̀ fún ọmọ ènìyàn.

³²Jẹ́ kí wọn gbé e ga ní àárin àwọn ènìyàn kí wọn kí ó sì yín ín ní ìjọ àwọn àgbà.

³³Ó sọ odò di ihà, àti orisun omi di ilẹ̀ gbígbẹ.

³⁴Ilẹ̀ eleso di aṣálẹ̀ nítorí ìwà búburú àwọn tí ó wà nínú Rẹ̀;

³⁵O sọ ihà di adágún omi àti ilẹ̀ gbígbẹ di oríṣun omi

³⁶Níbẹ̀ ó mú ẹni tí ebi ń pa wà, wọ́n sì pìlẹ̀ ibi tí wọn ó máa gbé

³⁷Wọn fún irúgbìn, wọ́n sì gbin ọgbà àjàrà tí yóò ma so èso tí ó dára;

³⁸Ó bùkún wọn, wọ́n sì pọ̀ sí i ní iye kò sí jẹ́ kí ẹran ọ̀sìn wọn kí ó dín kù.

³⁹Nígbà náà, ọjọ́ wọn kúrú, ìnira, ìpọ́njú àti ìṣòro wọn sì dínkù

⁴⁰Ẹni tí ó da ẹ̀gàn lu ọmọ aládé ó sì mú wọn rìn níbi tí ọ̀nà kò sí

⁴¹Ṣùgbọ́n ó gbé aláìní sókè kúrò nínú ìnira ó mú ìdílé wọn pọ̀ bi agbo ẹran

⁴²Àwọn tí ó dúró sì ríi, inú wọn sì dùn ṣùgbọ́n gbogbo olùṣe búburú yóò pa ẹnu Rẹ̀ mọ́.

⁴³Ẹni tí ó bá gbọ́n, jẹ́ kí ó kíyèsí nǹkan wọ̀nyí kí ó wo títóbi ìfẹ́ OLÚWA.