Read Bíbélì Mímọ́ ní Èdè Yorùbá Òde-Òní Ìwé Sáàmù 109 Bible Online

Ìwé Sáàmù 109 - Bíbélì Mímọ́ ní Èdè Yorùbá Òde-Òní bible

Ìwé Sáàmù 109

¹Ọlọ́run, ti èmi ń fi ìyìn fún Má ṣe dákẹ́

²Nítorí àwọn ènìyàn búburú àti ẹlẹ́tàn ti ya ẹnu wọn sí mi wọ́n ti fi ahọ́n èké sọ̀rọ̀ sí mi

³Wọn fi ọ̀rọ̀ ìrira yí mi káàkiri; wọ́n bá mi ja láìnídìí

⁴Nípo ifẹ̀ mi, wọn ń ṣe ọ̀tá mi, ṣùgbọ́n èmi ń gba àdúrà.

⁵Wọ́n sì fi ibi san ire fún mi àti ìríra fún ìfẹ́ mi.

⁶Yan àwọn ènìyàn búburú láti dojú kọ ọ́ jẹ́ kí àwọn olufisùn dúró ní ọwọ́ ọ̀tún Rẹ̀.

⁷Kí a dá a lẹbi nígbà tí a bá ṣe ìdájọ́ kí àdúrà Rẹ̀ kí ó lè di ìkọ̀sílẹ̀

⁸ Kí ọjọ́ Rẹ̀ kí ó kúrú kí ẹlòmíràn kí ó rọ́pò iṣẹ́ Rẹ̀

⁹Kí àwọn ọmọ Rẹ̀ di aláìní baba kí aya Rẹ̀ sì di opó

¹⁰Jẹ́ kí àwọn ọmọ Rẹ̀ máa ṣagbe kiri kí wọn máa tọrọ ounjẹ jìnnà sí ibi ahoro wọn

¹¹Jẹ́ kí alọ́nilọ́wọ́gbà kí ó mú ohun gbogbo tí ó ní jẹ́ kí àléjò kí o kó èrè isẹ́ Rẹ̀ lọ

¹²Má ṣe jẹ́ kí ẹnikan ṣe àánú fún un tàbí kí wọn káàánú lórí àwọn ọmọ Rẹ̀ aláìní baba

¹³Kí a gé àrọ́mọdọ́mọ Rẹ̀ kúrò kí orúkọ wọn kí ó parẹ́ ní ìran tí ń bọ̀

¹⁴Kí ẹ̀ṣẹ̀ àwọn baba Rẹ̀ kí ó wà ní ìrántí ní ọ̀dọ̀ OLÚWA Má ṣe jẹ́ kí a yọ ẹ̀ṣẹ̀ ìyá wọn kúrò

¹⁵Jẹ́ kí ẹ̀ṣẹ̀ wọn kí ó wà ní ìrántí níwájú OLÚWA kí o le ge ìrántí wọn kúrò lórí ilẹ̀.

¹⁶Nítorí kò rántí láti ṣàánú, ṣùgbọ́n ó ṣe inúnibíní sí ọkùnrin tálákà àti olùpọ́njú, kí ó lè pa oníròbìnújẹ́ ọkàn.

¹⁷Ó fẹ́ràn láti máa mú ègún wá sí orí Rẹ̀: bi inú Rẹ̀ kò ti dùn si ire, bẹ́ẹ̀ ni ki ó jìnnà sí ì.

¹⁸Bí ó ti fi ègún wọ ará Rẹ̀ lásọ bí ẹ̀wù bẹ́ẹ̀ ni kí ó wá si inú Rẹ̀ bí omi

¹⁹Jẹ́ kí o rí fún un bí aṣọ tí a dàbòó ní ara, àti fún àmùrè ti ó fi gbàjá nígbà gbogbo

²⁰Èyí ni èrè àwọn ọ̀ta mi làti ọwọ́ OLÚWA wá; àti ti àwọn tí ń sọ̀rọ̀ ibi sí ọ̀kàn mi.

²¹Ṣùgbọ́n ìwọ, ìwọ ṣe fún mi OLÚWA, ṣe rere fún mi nítorí orúkọ Rẹ Nítorí ti àánú Rẹ dara, ìwọ gbà mí

²²Nítorí pé talákà àti aláìní ni mí, àyà mi sì gbọgbẹ́ nínú mi.

²³Èmi ń kọja lọ bí òjiji tí óńfà sẹ́yìn, mo ń gbọ̀n sókè bí eṣú.

²⁴Eékún mi di aláìlera nítorí ààwẹ̀ gbígbà ẹran ara mi sì gbẹ nítorí àìlera mi.

²⁵ Mo dàbí ẹ̀gàn fún àwọn olùfisùn mi; nígbà tí wọn wò mí, wọn gbọn orí wọn.

²⁶Ràn mí lọ́wọ́, OLÚWA Ọlọ́run mi; gbà mí gẹ́gẹ́ bí ìṣeun ìfẹ́ Rẹ.

²⁷Jẹ́ kí wọn mọ̀ pé ọwọ́ Rẹ ni èyí wí pé ìwọ, OLÚWA, ni o ṣe é.

²⁸Wọ́n o máa gégùn-ún, ṣùgbọ́n ìwọ má súré; Nígbà tí wọn bá dìde kí ojú kí ó tì wọ́n, ṣùgbọ́n ìránṣẹ́ Rẹ yóò yọ̀

²⁹Jẹ́ kí a wọ àwọn ọ̀tá mi ní aṣọ ìtìjú kí á sì fi ìdàrú dàpọ̀ bọ̀ wọ́n lára bí ẹ̀wù.

³⁰Pẹ̀lú ẹnu mi èmi yóò máa yìn OLÚWA gidigidi ní àárin ọ̀pọ̀ ènìyàn èmi yóò máa yìn ín

³¹Nítorí ó dúró ni apá ọ̀tún aláìní láti gbà á lọ́wọ́ àwọn tí ń dá ọkàn Rẹ̀ lẹ́bi.