Read Bíbélì Mímọ́ ní Èdè Yorùbá Òde-Òní Ìwé Sáàmù 118 Bible Online

Ìwé Sáàmù 118 - Bíbélì Mímọ́ ní Èdè Yorùbá Òde-Òní bible

Ìwé Sáàmù 118

¹ Ẹ fi ọpẹ́ fún OLÚWA, nítorí tí ó dára; àánú Rẹ̀ dúró láéláé.

²Jẹ́ kí Ísírẹ́lì wí pé: “Àánú Rẹ̀ dúró láéláé”.

³Jẹ́ kí ilé Árónì wí pé: “Àánú Rẹ̀ dúró láéláé”.

⁴Jẹ́ kí àwọn tí ó bẹ̀rù OLÚWA wí pé: “Àánú Rẹ̀ dúró láéláé.”

⁵Nínú ìrora mi, mo sunkún sí OLÚWA, ó sì dámi lóhùn nípa pé ó tú mi sílẹ̀.

⁶ OLÚWA, ń bẹ fún èmi; èmi kì yóò bẹ̀rù. Kí ni ènìyàn lè ṣe si mi?

⁷OLÚWA n bẹ fún mi; òun ni olùrànlọ́wọ́ mi Nítorí náà ni èmi ó ṣe rí ìfẹ́ mi lórí àwọn ti ó kórìíra mi.

⁸Ó dára láti máa gbẹ́kẹ̀lé OLÚWA ju àti gbẹ́kẹ̀lé ènìyàn lọ.

⁹Ó dára láti máa gbẹ́kẹ̀lé OLÚWA ju à ti gbẹ́kẹ̀lé àwọn ọmọ aládé lọ.

¹⁰Gbogbo àwọn orílẹ̀ èdè yí mi káàkiri, ṣùgbọ́n ní orúkọ OLÚWA èmi gé wọn kúrò

¹¹Wọn yí mi ká kiri ní gbogbo ẹ̀gbẹ́, ṣùgbọ́n ní orúkọ OLÚWA èmi gé wọn dànù

¹²Wọn gbá yìnìn yí mí ká bí oyin, ṣùgbọ́n wọ́n kú kíákíá bí iná ẹ̀gún; ní orúkọ OLÚWA èmi ké wọn dànù.

¹³Ìwọ tì mi gidigidi kí ń lè subú, ṣùgbọ́n OLÚWA ràn mí lọ́wọ́.

¹⁴OLÚWA ni agbára àti orin mi; ó si di ìgbàlà mi.

¹⁵Ohùn ayọ̀ àti ìgbàlà ń bẹ nínú àgọ́ àwọn olódodo: “ọwọ́ ọ̀tún OLÚWA ń ṣe ohun agbára!

¹⁶Ọwọ́ ọ̀tún OLÚWA ní a gbé ga; ọwọ́ ọ̀tún OLÚWA ń ṣe ohun agbára!”

¹⁷Èmi kì yóò kú ṣùgbọ́n èmi yóò yè, èmi yóò pòkìkí ohun tí OLÚWA ṣe.

¹⁸OLÚWA bá mi wí gidigidi, ṣùgbọ́n òun kò fi mí lé ikú lọ́wọ́.

¹⁹Ṣí ìlẹ̀kùn ẹnu ọ̀nà òdodo fún mi: èmi yóò bá ibẹ̀ wọlé, èmi yóò sì fi ọpẹ́ fún OLÚWA.

²⁰Èyí ni ìlẹ̀kùn OLÚWA ibẹ̀ ni àwọn olódodo yóò bá wọlé.

²¹Èmi yóò fi ọpẹ́ fún ọ, nítorí ó dámi lóhùn; ìwọ sì di ìgbàlà mi.

²² Òkúta tí àwọn ọ̀mọ̀lé kọ̀ sílẹ̀ ni ó di pàtàkì òkúta igun ilé;

²³OLÚWA ti ṣe èyí ó ṣe ìyanu ní ojú wa.

²⁴Èyí ni ọjọ́ tí OLÚWA dá: ẹ jẹ́ kí ayọ̀ kí inú wa sì máa dùn nínú Rẹ̀.

²⁵ OLÚWA, gbà wá; OLÚWA, fún wa ní àlàáfíà.

²⁶Ìbùkún ni fún àwọn tí ó wá ní orúkọ OLÚWA. Láti ilé OLÚWA wá ní àwa fi ìbùkún fún ọ.

²⁷OLÚWA ni Ọlọ́run, ó ti mú ìmọ́lẹ̀ Rẹ̀ tàn sí wa lára pẹ̀lú ẹká igi ní ọwọ́, ó dára pọ̀ mọ́ ọ̀pọ̀ ènìyàn tí ń wọ́ nínú ayọ̀ ẹ fi okùn di ẹbọ náà mọ́ ìwo pẹpẹ

²⁸Ìwọ ni Ọlọ́run mi, èmi yóò máa fi ọpẹ́ fún ọ; ìwọ ni Ọlọ́run mi, èmi yóò gbé ọ ga

²⁹Ẹ fi ọpẹ́ fún OLÚWA, nítorí tí ó ṣeun; nítorí tí àánú Rẹ̀ dúró láéláé.