Read Bíbélì Mímọ́ ní Èdè Yorùbá Òde-Òní Ìwé Sáàmù 132 Bible Online

Ìwé Sáàmù 132 - Bíbélì Mímọ́ ní Èdè Yorùbá Òde-Òní bible

Ìwé Sáàmù 132

¹OLÚWA, rántí Dáfídì nínú gbogbo ìpọ́njú Rẹ̀:

²Ẹni tí ó ti búra fún OLÚWA, tí ó sì ṣe ìlèrí fún Alágbára Jákọ́bù pé.

³Nítòótọ́, èmi kì yóò wọ inú àgọ́ ilé mi lọ, bẹ́ẹ̀ èmi kì yóò gùn orí àkéte mi:

⁴Èmi kì yóò fi oorun fún ojú mi, tàbí òògbé fún ìpéǹpéjú mi,

⁵Títí èmi ó fi rí ibi fún OLÚWA, ibùjókòó fún Alágbára Jákọ́bù.

⁶Kíyèsí i, àwa gbúroo Rẹ̀ ni Éfúrátà: àwa rí i nínú oko ẹgàn náà.

⁷Àwa ó lọ sínú àgọ́ Rẹ̀: àwa ó máa sìn níbi àpótí-ìtìsẹ̀ Rẹ̀

⁸OLÚWA, dìde sí ibi ìsinmi Rẹ: ìwọ, àti àpótí agbára Rẹ.

⁹Kí a fi òdodo wọ àwọn àlùfáà Rẹ: kí àwọn ènìyàn mímọ́ Rẹ kí ó máa hó fún ayọ̀.

¹⁰Nítorí tí Dáfídì ìránṣẹ́ Rẹ̀ Má ṣe yí ojú ẹni-òróró Rẹ padà.

¹¹ OLÚWA ti búra nítòótọ́ fún Dáfídì: Òun kí yóò yípadà kúrò nínú Rẹ̀, nínú irú ọmọ inú Rẹ ní èmi ó gbé kalẹ̀ sí orí ìtẹ́ Rẹ.

¹²Bí àwọn ọmọ Rẹ̀ yóò bá pa májẹ̀mú mi mọ́ àti ẹ̀rí mi tí èmi yóò kọ́ wọn, àwọn ọmọ wọn pẹ̀lú yóò jókoo lórí ìtẹ́ Rẹ láéláé.

¹³Nítorí tí OLÚWA ti yan Síónì: ó ti fẹ́ẹ fún ibùjókòó Rẹ̀.

¹⁴Èyí ní ibi ìsinmi mí láéláé: níhìn-ín ni èmi yóò máa gbé: nítorí tí mo fẹ́ ẹ.

¹⁵Èmi yóò bùkún oúnjẹ Rẹ̀ púpọ̀ púpọ̀: èmi yóò fi oúnjẹ tẹ́ àwọn tálákà Rẹ̀ lọ́rùn.

¹⁶Èmi yóò sì fi ìgbàlà wọ àwọn àlúfáà Rẹ̀: àwọn ènìyàn mímọ́ Rẹ̀ yóò máa hó fún ayọ̀.

¹⁷Níbẹ̀ ni èmi yóò gbé mú ìwọ Dáfídì yọ̀, èmi ti ṣe ìlànà fítílà kan fún ẹni òróró mi.

¹⁸Àwọn ọ̀tá Rẹ̀ ni èmi yóò fi ìtìjú wọ̀: ṣùgbọ́n lára Òun tìkararẹ̀ ni adé yóò máa gbilẹ̀.