Read Bíbélì Mímọ́ ní Èdè Yorùbá Òde-Òní Ìwé Sáàmù 138 Bible Online

Ìwé Sáàmù 138 - Bíbélì Mímọ́ ní Èdè Yorùbá Òde-Òní bible

Ìwé Sáàmù 138

¹Èmi yóò yìn ọ́ tinú tinú mi gbogbo; níwájú àwọn òrìṣà ní èmi ó kọrin ìyìn sí ọ.

²Èmi ó máa gbàdúrà sí ìhà tẹ́ḿpìlì mímọ́ Rẹ̀ èmi ó sì máa yin orúkọ Rẹ nítorí ìṣeun ìfẹ́ Rẹ àti òtítọ́ Rẹ; nítorí ìwọ gbé ọ̀rọ̀ Rẹ ga ju orúkọ Rẹ lọ.

³Ní ọjọ́ tí mo képè ọ́, ìwọ dá mi lóhùn, ìwọ sì fi ipa mú mi lára le ní ọkàn mi.

⁴Gbogbo àwọn ọba ayé yóò yìn ọ́, OLÚWA, ní ìgbà tí wọn bá gbọ́ ọ̀rọ̀ ẹnu Rẹ

⁵Nítòótọ́, wọn o máa kọrin ní ipa ọ̀nà OLÚWA; nítorí pé ńlá ní ògo OLÚWA.

⁶Bí OLÚWA tilẹ̀ ga, ṣíbẹ̀ ó júbà àwọn onírẹ̀lẹ̀; ṣùgbọ́n agbéraga ní ó mọ̀ ní òkèrè réré.

⁷Bí èmi tilẹ̀ ń rìn nínú ìpọ́njú ìwọ ni yóò sọ mi di àyè; ìwọ ó nà ọwọ́ Rẹ̀ si àwọn ọ̀tá mi, ọwọ́ ọ̀tún Rẹ yóò sì gbà mí.

⁸OLÚWA yóò ṣe ohun tí ń ṣe tèmi láṣepé; OLÚWA, àánú Rẹ̀ dúró láéláé; Má ṣe kọ isẹ́ ọwọ́ ara Rẹ̀ sílẹ̀.