Read Bíbélì Mímọ́ ní Èdè Yorùbá Òde-Òní Ìwé Sáàmù 143 Bible Online

Ìwé Sáàmù 143 - Bíbélì Mímọ́ ní Èdè Yorùbá Òde-Òní bible

Ìwé Sáàmù 143

¹OLÚWA gbọ̀ àdúrà mi, fetísí igbe mi fún àánú; nínú òtítọ́ àti òdodo Rẹ wá fún ìrànlọ́wọ́ mi

² Má ṣe mú ìránṣẹ́ Rẹ wá sí ìdájọ́, nítorí kò sí ẹnìkan tí ó wà láàyè tí ó ṣe òdodo níwájú Rẹ.

³Ọ̀ta ń lé pa mi, ó fún mi pa mọ́ ilẹ̀; ó mú mi gbé nínú òkùnkùn bí àwọn tí ó ti kú ti pẹ́.

⁴Nítorí náà ẹ̀mí mi ṣàárẹ̀ nínú mi; ọkàn mi tí ó wà nínú mi dààmú.

⁵Èmi rántí ọjọ́ tí ó ti pẹ́; èmi ń ṣe àṣàrò lórí gbogbo iṣẹ́ Rẹ mo sì ṣe àkíyèsí ohun tí ọwọ́ Rẹ ti ṣe.

⁶Èmi na ọwọ́ mi jáde sí ọ: òrùgbẹ Rẹ gbẹ ọkàn mi bí i ìyàngbẹ ilẹ̀. Sela

⁷Dámilóhùn kánkán, OLÚWA; ó Rẹ̀ ẹ̀mí mi Má ṣe pa ojú Rẹ mọ́ kúrò lára mi tàbí èmi yóò dàbí àwọn tí ó lọ sínú ihò

⁸Jẹ́ kí òwúrọ̀ mú ọ̀rọ̀ ìfẹ́ tí kì í kùnà wá fún mi, nítorí èmi ti gbẹ́kẹ̀ mi lé ọ. Fí ọ̀nà tí èmi i bá rìn hàn mí, nítorí sí ọ ni èmi gbé ọkàn mi sókè.

⁹Gbà mí kúrò lọ́wọ́ àwọn ọ̀tá mi, OLÚWA, nítorí èmi fí ara mi pamọ́ sínú Rẹ̀.

¹⁰Kọ́ mi láti ṣe ìfẹ́ Rẹ, nítorí ìwọ ni Ọlọ́run mi jẹ́ kí ẹ̀mí Rẹ dídára darí mi sí ilẹ̀ tí ó tẹ́jú.

¹¹Nítorí orúkọ Rẹ, OLÚWA, sọ ayé mi di ààyè; nínú òdodo Rẹ mú mi jáde nínú wàhálà.

¹²Nínú ìfẹ́ Rẹ tí kì í kùnà, ké àwọn ọ̀ta mi kúrò, run gbogbo àwọn ọ̀tá mi, nítorí èmi ni ìránṣẹ́ Rẹ.