Read Bíbélì Mímọ́ ní Èdè Yorùbá Òde-Òní Ìwé Sáàmù 144 Bible Online

Ìwé Sáàmù 144 - Bíbélì Mímọ́ ní Èdè Yorùbá Òde-Òní bible

Ìwé Sáàmù 144

¹Ìyìn sí OLÚWA àpáta mi, ẹni tí ó kọ́ ọwọ́ mi fún ogun, àti ìka mi fún ìjà.

²Òun ni Ọlọ́run ìfẹ́ mi àti odi alágbára mi, ibi gíga mi àti olùgbàlà mi, asà mi, ẹni tí èmi gbẹ́kẹ̀lé, ẹni tí ó tẹ́rí àwọn ènìyàn ba lábẹ́ mi

³OLÚWA, kí ni ènìyàn tí ìwọ fi ń ṣàníyàn fún-ún, tàbi ọmọ ènìyàn tí ìwọ fi ń ronú nípa Rẹ̀?

⁴Ènìyàn rí bí èmi; ọjọ́ Rẹ̀ rí bí òjìji tí ń kọjá lọ.

⁵Tẹ ọ̀run Rẹ ba, OLÚWA, kí o sì sọ̀kalẹ̀; tọ́ àwọn òkè ńlá wọn yóò sí, rú èéfín.

⁶Rán mọ̀nàmọ́ná kí ó sì fọ́n àwọn ọ̀ta ká; ta ọfà Rẹ kí ó sì dà wọ́n rú.

⁷Na ọwọ́ Rẹ sílẹ̀ láti ibi gíga; gbà mí kí ó sì yọ mí nínú ewu kúrò nínú omi ńlá: kúrò lọ́wọ́ àwọn ọmọ àjèjì.

⁸Ẹnu ẹni tí ó kún fún èké ẹni tí ọwọ́ ọ̀tún Rẹ̀ jẹ́ ìrẹ́jẹ.

⁹Èmi yóò kọ orin túntún sí ọ Ọlọ́run; lára ohun èlò orin olókùn mẹ́wàá èmi yóò kọ orin sí ọ

¹⁰Sí ẹni tí ó fún àwọn ọba ní ìsẹ́gun, ẹni tí ó gba Dáfídì ìránṣẹ́ Rẹ̀ lọ́wọ́ pípanirun.

¹¹Gbàmí kí ó sì yọ mí nínú ewu kúrò lọ́wọ́ àwọn ọmọ àjèjì tí ẹnu wọn kún fún èké, tí ọwọ́ ọ̀tún wọn jẹ́ ọwọ́ ọ̀tún èké.

¹²Kí àwọn ọmọkùnrin wa kí ó dàbí igi gbígbin tí ó dàgbà ni ìgba èwe wọn, àti ọmọbìnrin wa yóò dàbí òpó ilé tí a ṣe ọ̀nà sí bí àfarawé ààfin.

¹³Àká wa yóò kún pẹ̀lú gbogbo onírúurú oúnjẹ àgùntàn wa yóò pọ̀ si ní ẹgbẹ̀rún, ní ẹgbẹ̀rún mẹ́wàá ní oko wa:

¹⁴Àwọn màlúù wa yóò ru ẹrù wúwo kí ó má sí ìkọlù, kí ó má sí ìkólọ sí ìgbèkùn, kí ó má síi igbe ìpọ́njú ní ìgboro wa.

¹⁵Ìbùkún ni fún àwọn ènìyàn náà tí ó wà ní irú ipò bẹ́ẹ̀, Ayọ̀ ni fún àwọn tí ẹni ti Ọlọ́run OLÚWA ń ṣe.