Read Bíbélì Mímọ́ ní Èdè Yorùbá Òde-Òní Ìwé Sáàmù 17 Bible Online

Ìwé Sáàmù 17 - Bíbélì Mímọ́ ní Èdè Yorùbá Òde-Òní bible

Ìwé Sáàmù 17

¹Gbọ́, OLÚWA, ẹ̀bẹ̀ òtítọ́ mi; fi etí sí igbe mi. Tẹ́ti sí àdúrà mi tí kò ti ètè ẹ̀tàn jáde.

²Kí ìdáláre mi wá láti ọ̀dọ̀ Rẹ; kí ojú Rẹ kí ó rí ohun tí ó tọ́.

³Ìwọ ti dán àyà mi wò, ìwọ sì yẹ̀ mí wò ní òru. Bí ìwọ bá dán mi wò, ìwọ kì yóò rí ohunkóhun èmi ti pinnu pé ẹnu mi kì yóò ṣẹ̀.

⁴Bí ó ṣe ti iṣẹ́ ènìyàn nípa ọ̀rọ̀ ẹnu Rẹ èmi ti pa ara mi mọ́ kúrò ní ọ̀nà àwọn ìkà.

⁵Ìrìn mí ti jẹ mọ́ ọ̀nà Rẹ; ẹṣẹ̀ mi kì yóò yọ̀.

⁶Èmi ké pè ọ́, OLÚWA, nítorí tí iwọ yóò dá mi lóhùn dẹ etí Rẹ sími kí o sì gbọ́ àdúrà mi.

⁷Fi ìyanu ìfẹ́ ńlá Rẹ hàn ìwọ tí ó ń pamọ́ ní ọwọ́ ọ̀tún Rẹ àwọn tí ó wá ìsádi nínú Rẹ kúrò ní ọwọ́ ọ̀ta wọn.

⁸Pa mí mọ́ bí ẹyin ojú Rẹ; fi mí pamọ́ sí abẹ́ òjìji apá Rẹ.

⁹Kúrò ní ọwọ́ ọ̀tá tí ó kọjú ìjà sí mi, kúrò ní ọwọ́ àwọn ọ̀ta apani tí ó yí mi ká.

¹⁰Wọ́n pa ọkàn aláìláàánú wọn mọ́, wọ́n sì fi ẹnu wọn sọ̀rọ̀ ìgbéraga.

¹¹Wọ́n sì mú mi mọ́lẹ̀, wọ́n sì yí mi ká, pẹ̀lú ojú ìṣọ́ra láti sọ́ mi sílẹ̀.

¹²Wọn dà bí i kìnnìún tí ebi ń pa fún ìjẹ, àní bí Kìnnìún ńlá tí ó ń ba níbi ìkọ̀kọ̀.

¹³Dìde, OLÚWA, dojúkọ wọ́n, Rẹ̀ wọ́n sílẹ̀; gbà mí sílẹ̀ lọ́wọ́ ẹni búburú nípa idà Rẹ.

¹⁴OLÚWA, nípa ọwọ́ Rẹ gbà mí kúrò lọ́wọ́ irú àwọn ènìyàn bẹ́ẹ̀, kúrò lọ́wọ́ àwọn ènìyàn ayé yìí, tí èrè wọn wà nínú ayé yìí; Ìwọ ń pa ebi àwọn tí ìwọ fẹ́ràn lẹ́nu mọ́; àwọn ọmọ wọn sì ní ọ̀pọ̀lọpọ̀, wọ́n sì kó ọrọ̀ jọ fún àwọn ọmọ wọn.

¹⁵Ṣùgbọ́n ní tèmi, èmi yóò máa wo ojú Rẹ ní òdodo; nígbà tí èmi bá jí, èmi yóò ní ìtẹ́lọ́rùn nígbà tí èmi bá rí àwòrán Rẹ.