Read Bíbélì Mímọ́ ní Èdè Yorùbá Òde-Òní Ìwé Sáàmù 20 Bible Online

Ìwé Sáàmù 20 - Bíbélì Mímọ́ ní Èdè Yorùbá Òde-Òní bible

Ìwé Sáàmù 20

¹Kí OLÚWA kí ó gbóhùn Rẹ̀ ní ọjọ́ ìpọ́njú; kí orúkọ Ọlọ́run Jákọ́bù kí ó dáàbòbò ọ́.

²Kí ó rán ìrànlọ́wọ́ sí ọ, láti ibi mímọ́ kí ó sì tì ọ́ lẹ́yìn láti Síónì wá.

³Kí ó sì rántí gbogbo ẹbọ ọrẹ Rẹ kí ó sì gba ẹbọ sísun un Rẹ. Sela

⁴Kí ó fi fún ọ gẹ́gẹ́ bi ti èrò ọkàn Rẹ kí ó sì mú gbogbo ìmọ̀ Rẹ ṣẹ.

⁵Àwa yóò hó fún ayọ̀ nígbà tí o bá di aṣẹ́gun àwa yóò gbé àsíá wa sókè ní orúkọ Ọlọ́run wa. Kí Ọlọ́run kí ó mú gbogbo ìbéèrè Rẹ̀ ṣẹ.

⁶Nisinsìnyí, èmi mọ̀ wí pé OLÚWA pa ẹni-àmí-òróró Rẹ̀ mọ́; yóò gbọ́ láti ọ̀run mímọ́ Rẹ̀ wá pẹ̀lú agbára ìgbàlà ọwọ́ ọ̀tún Rẹ̀.

⁷Àwọn mìíràn gbẹ́kẹ̀ wọn lé kẹ̀kẹ́, àwọn mìíràn gbẹ́kẹ̀ wọn lé ẹṣin, ṣùgbọ́n àwa gbẹ́kẹ̀ lé orúkọ OLÚWA Ọlọ́run wa.

⁸Wọ́n wólẹ̀, ní eékún, wọn sì ṣubú, ṣùgbọ́n àwa dìde, a sì dúró ṣinṣin.

⁹OLÚWA, fi ìṣẹ́gun fún ọba! Dá wa lóhùn nígbà tí a bá ń kígbe pè!