Read Bíbélì Mímọ́ ní Èdè Yorùbá Òde-Òní Ìwé Sáàmù 30 Bible Online

Ìwé Sáàmù 30 - Bíbélì Mímọ́ ní Èdè Yorùbá Òde-Òní bible

Ìwé Sáàmù 30

¹Èmi yóò kókìkíì Rẹ, OLÚWA, nítorí ìwọ ni ó gbé mi lékè tí ìwọ kò sì jẹ́ kí àwọn ọ̀ta mi kí ó yọ̀ mí.

²OLÚWA Ọlọ́run mi, èmí ké pè ọ́, fún ìrànlọ́wọ́ ìwọ sì ti wò mí sàn.

³OLÚWA, ìwọ ti yọ ọkàn mi jáde kúrò nínú isà òkú mú mi padà bọ̀ sípò alààyè kí èmi má baà lọ sínú ihò.

⁴Kọ orin ìyìn sí OLÚWA, ẹ̀yin olódodo; kí ẹ sì fi ọpẹ́ fún orúkọ Rẹ̀ mímọ́.

⁵Nitorí pé ìbínú Rẹ̀ wà fún ìgbà díẹ̀, ojúrere Rẹ̀ wà títí ayeraye; Ẹkún lè pẹ́ títí di alẹ́, Ṣùgbọ́n ayọ̀ yóò wá ní òwúrọ̀.

⁶Ní ìgbà ayé mi, mo wí pé, “a kì yóò sí mi nípò padà.”

⁷Nípa ojúrere Rẹ̀, OLÚWA, ìwọ ti gbé mi kalẹ̀ bí òkè tí ó ní agbára; ìwọ pa ojú Rẹ mọ́, àyà sì fò mí.

⁸Sí ọ OLÚWA, ni mo képè; àti sí OLÚWA ni mo sunkún fún àánú:

⁹“Èrè kí ni ó wà nínú ikú ìparun mi, nínú lílọ sí ihò mi? Eruku yóò a yìn ọ́ bí? Ǹjẹ́ yóò sọ nípa òdodo Rẹ?

¹⁰Gbọ́, OLÚWA, kí o sì ṣàánú fún mi; ìwọ OLÚWA, jẹ́ olùrànlọ́wọ́ mi.”

¹¹Ìwọ ti yí ìkáànú mi di ijó fún mi; ìwọ sì ti bọ́ aṣọ ọ̀fọ̀ mi, o sì fi aṣọ ayọ̀ wọ̀ mí,

¹²nítorí ìdí èyí ni kí ọkàn mi máa yìn ọ́, kí ó má sì ṣe dákẹ́. Ìwọ OLÚWA Ọlọ́run mi, èmi yóò máa fi ọpẹ́ fún ọ títí láé.