Read Bíbélì Mímọ́ ní Èdè Yorùbá Òde-Òní Ìwé Sáàmù 33 Bible Online

Ìwé Sáàmù 33 - Bíbélì Mímọ́ ní Èdè Yorùbá Òde-Òní bible

Ìwé Sáàmù 33

¹Ẹyọ̀ nínú OLÚWA, ẹ̀yin olódodo ìyín si yẹ fún ẹnidídúró ṣinṣin.

²Ẹyin OLÚWA pẹ̀lú dùùrù; ẹ máa fi ohun èlò olókùn mẹ́wàá kọrin sí i.

³Ẹ kọ orin tuntun sí i; ẹ máa fi ọgbọọgbọ́n lu ohun èlò orin síi, pẹ̀lú ariwo ńlá.

⁴Nítorí pé ọ̀rọ̀ OLÚWA dúró ṣinṣin, gbogbo iṣẹ́ Rẹ̀ ni à ń ṣe nínú òtítọ́.

⁵Ó fẹ́ òtítọ́ àti ìdájọ; ilé ayé kún fún ìdúró ṣinṣin àti àánú OLÚWA.

⁶Nípaṣẹ̀ ọ̀rọ̀ OLÚWA ni a ṣe dá àwọn ọ̀run, àti gbogbo àwọn ẹgbẹ́ ogun wọn nípa ìmísí ẹnu Rẹ̀.

⁷Ó kó àwọn omi òkun jọ gẹ́gẹ́ bí èyí tí ó wà nínú ìgò; ó sì fi ibú sí ilé ìṣúra gbogbo.

⁸Jẹ́ kí gbogbo ayé kí ó bẹ̀rù OLÚWA: jẹ́ kí gbogbo àwọn olùgbé ayé kí ó wà nínú ìbẹ̀rù Rẹ̀.

⁹Nítorí tí ó sọ̀rọ̀, ó sì ti rí bẹ́ẹ̀; ó pàṣẹ ó sì dúró ṣinṣin.

¹⁰OLÚWA ti mú ìmọ̀ràn àwọn orílẹ̀ èdè wá sí asán; ó sì mú àrékérekè àwọn ènìyàn di ṣíṣákìí.

¹¹Ìgbìmọ̀ OLÚWA dúró títí ayérayé, àní ìrò inú Rẹ̀ láti ìrandíran ni.

¹²Ìbùkún ni fún orílẹ̀ èdè náà Ọlọ́run ẹni tí OLÚWA jẹ́ tirẹ̀, àti àwọn ènìyàn náà tí ó ti yàn ṣe ìní Rẹ̀.

¹³OLÚWA wò láti ọ̀run wá; Ó sì rí gbogbo ìran ènìyàn.

¹⁴Níbi tí ó ti jókòó lóríi ìtẹ́ Ó wo gbogbo àwọn olùgbé ayé

¹⁵ẹni tí ó ṣe àyà wọn bákan náà, ó sì kíyèsí ìṣe wọn.

¹⁶A kò gba ọba kan là nípaṣẹ̀ ọ̀pọ̀lọpọ̀ àwọn ọmọ ogun; kò sì sí jagunjagun tí a gbà sílẹ̀ nípa agbára ńlá Rẹ̀.

¹⁷Ohun asán ni ẹṣin fún ìsẹ́gun; bẹ́ẹ̀ ni kì yóò fi agbára ńlá Rẹ̀ gba ni sílẹ̀.

¹⁸Wòó ojú OLÚWA wà lára àwọn tí ó bẹ̀rù Rẹ̀, àti lára àwọn tí ó ní ìrètí nínú ìfẹ Rẹ̀ tí ó dúró ṣinṣin,

¹⁹Láti gba ọkàn wọn kúrò lọ́wọ́ ikú àti láti pa wọ́n mọ́ láàyè lọ́wọ́ ìyàn.

²⁰Ọkàn wa dúró de OLÚWA; òun ni ìrànlọ́wọ́ wa àti aṣà wa.

²¹Ọkàn wa yọ̀ nínú Rẹ̀, nítorí pé, àwa gba orúkọ mímọ́ Rẹ̀ gbọ́

²²Kí àánú Rẹ, OLÚWA, kí ó wà lára wa, àní gẹ́gẹ́ bí àwa ti ń ṣe ìrètí nínú Rẹ.