Read Bíbélì Mímọ́ ní Èdè Yorùbá Òde-Òní Ìwé Sáàmù 36 Bible Online

Ìwé Sáàmù 36 - Bíbélì Mímọ́ ní Èdè Yorùbá Òde-Òní bible

Ìwé Sáàmù 36

¹ Ìrékọjá sọ̀rọ̀ sí ènìyàn búburú jinlẹ̀ nínú ọkàn wọn; Ìbẹ̀rù Ọlọ́run kò sí níwájú ojú wọn

²Nítorí pé wọ́n pọ́n ara wọn ní ojú ara wọn títí tí a kò fi le rí ẹ̀ṣẹ̀ wọn láti kórìíra.

³Ọ̀rọ̀ ẹnu wọn ni ẹ̀ṣẹ̀ òun ẹ̀tàn; wọ́n ti fi ọgbọ́n àti ṣíṣe rere sílẹ̀;

⁴Wọ́n gbìmọ̀ ìwà ìkà nígbà tí wọ́n wà lórí ibùsùn wọn: wọ́n gba ọ̀nà tí kò dára: wọn kò sì kọ ọ̀nà ibi sílẹ̀.

⁵Ìdúró ṣinṣin ìfẹ́ Rẹ, ìwọ OLÚWA, ó ga dé ọ̀run, òtítọ́ ọ̀ Rẹ ga dé àwọ̀sánmà.

⁶Òdodo Rẹ dàbí àwọn òkè Ọlọ́run, àwọn ìdájọ́ Rẹ dàbí ibú ńlá; ìwọ gba ẹranko àti ènìyàn là, OLÚWA.

⁷Báwo ni ìṣeun ìdúróṣinṣin ìfẹ́ Rẹ ti tó! Ọlọ́run! Kí gbogbo ọmọ ènìyàn le sá sí abẹ́ òjijì ìyẹ́ Rẹ.

⁸Àsè ilé Rẹ yóò tẹ́ wọn lọ́rùn gidigidi; ìwọ yóò sì mú wọn mu nínú odò inú-dídùn Rẹ.

⁹Nítorí pé pẹ̀lú ù Rẹ ni orísun ìyè wà: nínú ìmọ́lẹ̀ Rẹ ni àwa yóò rí ìmọ́lẹ̀.

¹⁰Mú ìṣeun ìfẹ́ ẹ Rẹ sí àwọn tí ó mọ̀ ọ́ àti ìgbàlà Rẹ sí àwọn tí ó ní ìdúró ṣinṣin ọkàn!

¹¹Má ṣe jẹ́ kí ẹ̀ṣẹ̀ agbéraga kí ó wá sí orí mi, kí ọwọ́ àwọn ènìyàn búburú sí mi ni ipò.

¹²Níbẹ̀ ni àwọn oníṣẹ́ ẹ̀ṣẹ̀ gbé subú sí: a Rẹ̀ wọ́n sílẹ̀, wọn kì yóò le è dìde!