Read Bíbélì Mímọ́ ní Èdè Yorùbá Òde-Òní Ìwé Sáàmù 37 Bible Online

Ìwé Sáàmù 37 - Bíbélì Mímọ́ ní Èdè Yorùbá Òde-Òní bible

Ìwé Sáàmù 37

¹Má ṣe ìkanra nítorí àwọn olùṣe búburú, kí ìwọ má sì ṣe ṣe ìlàra nítorí àwọn oníṣẹ́ ẹ̀ṣẹ̀;

²nítorí pé wọn yóò gbẹ bí koríko, wọn yóò sì Rẹ̀ dànù bí ewéko tútù

³Gbẹ́kẹ̀lé OLÚWA, kí o sì máa ṣe rere; torí pé ìwọ yóò gbé ilẹ̀ náà, kí o sì gbádùn ààbò Rẹ̀

⁴ṣe inú dídùn sí OLÚWA; òun yóò sì fún ọ ní ìfẹ́ inú Rẹ̀.

⁵Fi ọ̀nà Rẹ lé OLÚWA lọ́wọ́; gbẹ́kẹ̀lée pẹ̀lú, òun yóò sì ṣe é.

⁶Yóò sì mú kí òdodo Rẹ̀ jáde bí ìmọ́lẹ̀ òwúrọ, àti ìdájọ́ Rẹ̀ bí ọ̀sán gangan.

⁷Ìwọ dákẹ́ jẹ́ ẹ́ níwájú OLÚWA, kí o sì fi sùúrù dúró dè é; má ṣe ṣe ìkanra nítorí àwọn tí ń rí rere ní ọ̀nà wọn, nítorí ọkùnrin náà ti mú èrò búburú ṣẹ.

⁸Fàsẹ́yìn nínú inúbíbí, kí o sì kọ ìkannú sílẹ̀. Má ṣe ṣe ìkanra, nítorí pé ó gbéni sí búburú pẹ̀lú.

⁹Nítorí pé á ó gé àwọn ènìyàn búburú kúrò, Ṣùgbọ́n àwọn tí ó bá dúró de OLÚWA àwọn ni yóò jogún ilẹ̀ náà.

¹⁰Ṣíbẹ̀ nígbà díẹ̀ síi,, àwọn ènìyàn búburú kì yóò sí mọ́ nítòótọ́ ìwọ yóò fi ara balẹ̀ wo ipò Rẹ̀, wọn kì yóò sí níbẹ̀.

¹¹Ṣùgbọ́n àwọn ọlọ́kàn tútù ni yóò jogún ilẹ̀ náà, wọn yóò sì máa ṣe inú dídùn nínú ọ̀pọ̀lọpọ̀ àlàáfíà.

¹²Ènìyàn búburú di rìkísí sí olóòtọ́, wọ́n sì pa ẹyín wọn keke sí wọn;

¹³Ṣùgbọ́n OLÚWA rẹ́rin-un sí àwọn ènìyàn búburú, nítorí tí ó rí wí pé ọjọ́ wọn ń bọ̀.

¹⁴Ènìyàn búburú fa idà yọ, wọ́n sì tẹ àwọn ọrun wọn, láti sọ talákà àti aláìní kalẹ̀, láti pa àwọn tí ó dúró ṣinṣin.

¹⁵Idà wọn yóò wọ àyà wọn lọ, àti wí pé ọrun wọn yóò sì ṣẹ́.

¹⁶Ohun díẹ̀ tí olódodo ní sàn ju ọ̀pọ̀ ọrọ̀ ènìyàn búburú.

¹⁷Nítorí pé a ó ṣẹ ọwọ́ àwọn ènìyàn búburú, ṣùgbọ́n OLÚWA gbé olódodo sókè.

¹⁸OLÚWA mọ àwọn ọjọ́ àwọn adúró ṣinṣin, àti wí pé ilẹ̀ ìní wọn yóò wà títí ayérayé;

¹⁹Ojú kì yóò tì wọ́n ní àkókò ibi, àti ní ọjọ́ ìyàn, a ó tẹ́ wọn lọ́rùn.

²⁰Ṣùgbọ́n àwọn ènìyàn búburú yóò ṣègbé, àwọn ọ̀ta OLÚWA yóò dà bí ẹwà oko tútù; wọn fò lọ; bi èéfín ni wọn yóò fò lọ kúrò.

²¹Àwọn ènìyàn búburú yá, wọn kò sì san-án padà, ṣùgbọ́n àwọn olódodo a máa fi fún ni;

²²Nítorí àwọn tí OLÚWA bá bùkún ni yóò jogún ilẹ̀ náà, àwọn tí ó fi bú ni a ó gé kúrò.

²³Ìlànà ìgbésẹ̀ ènìyàn rere wá láti ọ̀dọ̀ OLÚWA wá, o si ṣe inú dídùn sí ọ̀nà Rẹ̀;

²⁴Bí ó tilẹ̀ ṣubú a kì yóò ta á nù pátapáta, nítorí tí OLÚWA di ọwọ́ Rẹ̀ mú.

²⁵Èmi ti wà ni èwe, báyìí èmí sì dàgbà; ṣíbẹ̀ èmi kò ì tíi rí ki a kọ olódodo ṣílẹ̀, tàbí kí irú ọmọ Rẹ̀ máa ṣagbe oúnjẹ.

²⁶Aláàánú ni òun nígbà gbogbo a máa yá ni; a sì máa bùsí i fún ni.

²⁷Lọ kúrò nínú ibi, kí o sì máa ṣe rere; nígbà náà ni ìwọ gbé ní ilẹ̀ náà títí láéláé.

²⁸Nítorí pé OLÚWA fẹ́ràn ìdájọ́ òtítọ́, kò sì kọ àwọn ènìyàn mímọ́ Rẹ̀ sílẹ̀. Àwọn olódodo ni a ó pamọ́ títí ayérayé, ṣùgbọ́n àwọn ọmọ ènìyàn búburú ní a ó ké kúrò.

²⁹Olódodo ni yóò jogún ilẹ̀ náà, yóò sì máa gbé ibẹ̀ títí ayérayé.

³⁰Ẹnu olódodo sọ̀rọ̀ ọgbọ́n, ahọ́n Rẹ̀ a sì máa sọ̀rọ̀ ìdájọ́.

³¹Òfin Ọlọ́run Rẹ̀ ń bẹ ní àyà wọn; àwọn ìgbẹ́sẹ̀ Rẹ̀ kì yóò yẹ̀.

³²Ènìyàn búburú ń ṣọ́ olódodo, Ó sì ń wá ọ̀nà láti pa á.

³³OLÚWA kì yóò fi lé e lọ́wọ́ kì yóò sì dá a lẹ́bi, nígbà tí a bá ń ṣe ìdájọ́ Rẹ̀.

³⁴Dúró de OLÚWA, kí o sì má a pa ọ̀nà Rẹ̀ mọ́, yóò sì gbé ọ lékè láti jogún ilẹ̀ náà: Nígbà tí a bá gé àwọn ènìyàn búburú kúrò ìwọ yóò ri.

³⁵Èmí ti rí ènìyàn búburú tí n hu ìwà ìkà, ó sì fi ara Rẹ̀ gbilẹ̀ bí igi tútù ńlá.

³⁶Ṣùgbọ́n ní ìṣẹ́jú kan síi ó kọjá lọ, sì kíyèsí, kò sì sí mọ́; bi ó tílẹ̀ jẹ́ wí pé mo wá a kiri, ṣùgbọ́n a kò le è ri.

³⁷Má a kíyèsí ẹni pípé, kí o sì wo adúró ṣinṣin, nítorí àlàáfíà ni òpin ọkùnrin náà.

³⁸Ṣùgbọ́n àwọn olùrékọjá ní a ó parun papọ̀; ìran àwọn ènìyàn búburú ní a ó gé kúrò.

³⁹Ìgbàlà àwọn adúró ṣinṣin wa láti ọ̀dọ̀ OLÚWA: òun ni ààbò wọn ní ìgbà ìpọ́njú

⁴⁰OLÚWA yóò ràn wọ́n lọ́wọ́ yóò sì gbà wọ́n; yóò gbà wọ́n lọ́wọ́ ènìyàn búburú, yóò sì gbà wọ́n là, nítorí tí wọ́n gbẹ́kẹ̀ lé e.