Read Bíbélì Mímọ́ ní Èdè Yorùbá Òde-Òní Ìwé Sáàmù 38 Bible Online

Ìwé Sáàmù 38 - Bíbélì Mímọ́ ní Èdè Yorùbá Òde-Òní bible

Ìwé Sáàmù 38

¹OLÚWA Má ṣe bá mi wí nínú ìbínú Rẹ, bẹ́ẹ̀ ni kí o má ṣe fi ìyà jẹ mí nínú ìrunú Rẹ̀.

²Nítorí tí ọfà Rẹ kàn mọ́ mi ṣinṣin, ọwọ́ Rẹ sì kì mí mọ́lẹ̀.

³Kò sí ibi yíyè ní ara à mi nítorí ìbínú Rẹ; kò sí àlàáfíà nínú egungun mi nítorí i ẹ̀ṣẹ̀ mi.

⁴Nítorí àìṣedédé mi ti borí mi mọ́lẹ̀; wọ́n tó ìwọ̀n bi àjàgà tí ó wúwo jù fún mi:

⁵Ọgbẹ́ mi ń rùn ó sì díbàjẹ́ nítorí òmùgọ̀ mi;

⁶Èmi ń jòwèrè: orí mi tẹ̀ ba gidigidi èmi ń sọ̀fọ̀ rìn kiri ní gbogbo ọjọ́.

⁷Nítorí ẹ̀gbẹ́ mi kún fún ìgbóná ti ń jó ni kò sì sí ibi yíyè ní ara mi,

⁸Ara mi hù, a sì wó mi jégéjégé; mo ké rora nítorí ìrúkèrúdò àyà mi.

⁹OLÚWA, gbogbo a áyun mi ń bẹ níwájú Rẹ; ìmí ẹ̀dùn mi kò sá pamọ́ fún ọ.

¹⁰Àyà mi ń mí hẹlẹ, agbára mi yẹ̀ mí sílẹ̀ bí ó ṣe ti ìmọ́lẹ̀ ojú mi ni, ó ti lọ kúrò lára mi.

¹¹Àwọn ọ̀rẹ́ mi àti àwọn ẹlẹgbẹ́ mi dúró lókèèrè réré kúrò níbi ìpọ́njú mi, àwọn alábàágbé é mi, dúró lókèèrè.

¹²Àwọn tí n wá ẹ̀mí mi dẹ okùn sílẹ̀ fún mi; àti àwọn tí ó fẹ́ pa mí lára ń sọ̀rọ̀ nípa ìparun, wọ́n sì ń gbérò ẹ̀tàn ní gbogbo ọjọ́.

¹³Ṣùgbọ́n mo dàbí adití odi, èmi kò gbọ́ ọ̀rọ̀; àti bí odi, tí kò le sọ̀rọ̀.

¹⁴Ní tòótọ́, mo rí bí ọkùnrin tí kò gbọ́ràn, àti bí ẹnu ẹni tí kò sí ìjiyàn.

¹⁵Ṣùgbọ́n sí ọ OLÚWA, ìwọ ni mo dúró dè; ìwọ ni, OLÚWA Ọlọ́run mi, ẹni tí yóò dáhùn.

¹⁶Nítorí tí mo gbàdúrà, “Gbóhùn mi, kí wọn má ba à yọ̀ mí; nígbà tí ẹsẹ̀ mi bá yọ̀ wọn yóò máa gbé ara wọn ga sí mi”.

¹⁷Nítorí tí mo ti ṣe tán láti ṣubú, ìrora mi sì wà pẹ̀lú mi nígbà gbogbo.

¹⁸Mo jẹ́wọ́ ìrékọjá mi; àánú sì ṣe mí fún ẹ̀ṣẹ̀ mi.

¹⁹Àwọn tí ó jẹ́ ọ̀tá mi láì ní ìdí pàtàkì, wọ́n lágbára púpọ̀, ọ̀pọ̀lọpọ̀ ni àwọn tí ó kórìírá mi lọ́nà òdì.

²⁰Àwọn tí wọn ń fi ibi san rere fún mi àwọn ni ọ̀ta mi nítorí pé mò ń tọ ire lẹ́yìn.

²¹Má ṣe kọ̀ mí sílẹ̀, ìwọ OLÚWA! Ọlọ́run mi Má ṣe jìnnà sí mi

²²Yára láti ràn mí lọ́wọ́, OLÚWA, Olùgbàlà mi.