Read Bíbélì Mímọ́ ní Èdè Yorùbá Òde-Òní Ìwé Sáàmù 44 Bible Online

Ìwé Sáàmù 44 - Bíbélì Mímọ́ ní Èdè Yorùbá Òde-Òní bible

Ìwé Sáàmù 44

¹Àti fi ètí wa gbọ́, Ọlọ́run àwọn baba wa tí sọ fún wa oun tí ìwọ ṣe ní ọjọ́ wọn, ní ọjọ́ pípẹ́ sẹ́yìn.

²Ìwọ fi ọwọ́ Rẹ̀ lé orílẹ̀-èdè jáde Ìwọ sì gbin àwọn baba wa; Ìwọ run àwọn ènìyàn náà Ìwọ sì mú àwọn baba wa gbilẹ̀.

³Kì í ṣe nípa idà wọn ni wọn gba ilẹ̀ náà, bẹ́ẹ̀ ni kì í se apá wọn ní ó gbà wọ́n bí kò se; ọwọ́ ọ̀tún Rẹ̀ àti, apá Rẹ̀; àti ìmọ́lẹ̀ ojú Rẹ̀, nítorí ìwọ fẹ́ wọn.

⁴Ìwọ ni ọba àti Ọlọ́run mi, ẹni tí ó pàṣẹ ìṣẹ́gun fún Jákọ́bù.

⁵Nípaṣẹ̀ Rẹ̀ ni àwa ó bi àwọn ọ̀tá wa ṣúbú; nípasẹ̀ orúkọ Rẹ ni àwa ó tẹ àwọn ọ̀tá ti ó dìde sí wa mọ́lẹ̀

⁶Èmi kì yóò gbẹ́kẹ̀lé ọrun mi idà mi kì yóò mú ìṣẹ́gun lórí àwọn ọ̀tá wá,

⁷Ṣùgbọ́n ìwọ fún wa ní ìṣẹ́gun lórí àwọn ọ̀tá wa, ìwọ sì ti dójúti àwọn tí ó kórìíra wa.

⁸Nínú Ọlọ́run àwa ń ṣògo ní gbogbo ọjọ́, àwa ó sì yin orúkọ Rẹ̀ títí láé. Sela

⁹Ṣùgbọ́n nísinsìnyí ìwọ ti kọ̀ wá, ìwọ sì ti dójútì wá; Ìwọ kò sì bá àwọn ọmọ ogun wa jáde mọ́.

¹⁰Ìwọ ti bá wa jà ìwọ sì ti ṣẹ́gun wa níwájú àwọn ọ̀tá wa, àwọn ọ̀ta wa ti gba ilẹ̀ wa, wọ́n sì fi ipá gba oko wa.

¹¹Ìwọ fi wá fún jíjẹ bí ẹran àgùntàn Ìwọ sì ti tú wa ká sí àárin àwọn aláìkọlà.

¹²Ìwọ ta àwọn ènìyàn Rẹ fún owó kékeré, Ìwọ kò sì jẹ èrè kankan lórí iye tí ìwọ tà wọ́n.

¹³Ìwọ sọ wá di ẹni ẹ̀sín ní ọ̀dọ̀ àwọn aládùúgbò wa, ẹlẹ́yà àti ẹni àbùkù sí àwọn tí ó yí wa ká.

¹⁴Ìwọ ti sọ wá di ẹni ìfisọ̀rọ̀ láàrin àwọn orílẹ̀ èdè; àwọn ènìyàn ń mi orí wọn sí wa.

¹⁵Ìdójútì mi ń bẹ pẹ̀lú mi ní gbogbo ọjọ́, ìtìjú sì bojú mi mọ́lẹ̀,

¹⁶nítorí ọ̀rọ̀ ẹ̀gàn àti ọ̀rọ̀ ẹ̀tàn ní ojú àwọn ọ̀ta àti olùgbẹ̀san.

¹⁷Gbogbo àwọn nǹkan wọ̀nyí ń ṣẹlẹ̀ sí wa, ṣíbẹ̀ àwa kò gbàgbé Rẹ̀ bẹ́ẹ̀ ni a kò ṣèké sí májẹ̀mu Rẹ̀.

¹⁸Ọkàn wa kò padà sẹ́yìn; bẹ́ẹ̀ ni ẹsẹ̀ wa kò yẹ̀ kúrò ní ọ̀nà Rẹ̀.

¹⁹Ṣùgbọ́n wọ́n kọ lù wá, ìwọ sì sọ wá di ẹran ọdẹ fún àwọn ajáko tí wọn sì fi òkùnkùn biribiri bò wá mọ́lẹ̀.

²⁰Bí àwa bá ti gbàgbé orúkọ Ọlọ́run wa tàbí tí a na ọwọ́ wa sí ọlọ́run àjèjì.

²¹Ǹjẹ́ Ọlọ́run kì yóò rí ìdí Rẹ̀, níwọ̀n ìgbà tí ó mọ ohun ìkọ̀kò inú ọkàn?

²² Ṣíbẹ̀, nítorí Rẹ̀ àwa da àyà kọ ikú, ní ojojúmọ́ a ń kà wá sí bí àgùntàn fún pípa.

²³Jí, OLÚWA! Èéṣe tí ìwọ ń sùn? Dìde fún ra Rẹ! Má ṣe kọ̀ wá sílẹ̀ láéláé.

²⁴Èéṣe tí ìwọ ń pa ojú Rẹ mọ́ tí ìwọ sì gbàgbé ìpọ́njú àti ìnira wa?

²⁵Nítorí a tẹrí ọkàn wa ba sínú eruku; ara wa sì dì mọ́ erùpẹ̀ ilẹ̀.

²⁶Dìde kí o sì ràn wá lọ́wọ́; ràwápadà nítorí ìfẹ́ Rẹ tí ó dúró ṣinṣin.