Read Bíbélì Mímọ́ ní Èdè Yorùbá Òde-Òní Ìwé Sáàmù 62 Bible Online

Ìwé Sáàmù 62 - Bíbélì Mímọ́ ní Èdè Yorùbá Òde-Òní bible

Ìwé Sáàmù 62

¹Nínú Ọlọ́run nìkan ni ọkàn mi ti rí ìsinmi; ìgbàlà mi ti ọ̀dọ̀ Rẹ̀ wá.

²Òun nìkan ní àpáta mi àti ìgbàlà mi; oun ní ààbò mi, a kí yóò sí mi ní pò padà.

³Ẹ̀yin ó ti máa rọ́lù ènìyàn kan pẹ́ tó? Gbogbo yín ni ó fẹ pa á, bí ògiri tí ó fẹ́ yẹ̀ àti bí ọgbà tí ń wó lọ?

⁴Kìkì èró wọn ni láti bì ṣubú kúrò nínú ọlá Rẹ̀; inú wọn dùn sí irọ́. Wọn ń fi ẹnu wọn súre, ṣùgbọ́n wọ́n ń gégùn nínú ọkàn wọn. Sela

⁵Nínú Ọlọ́run nìkan ni ìsinmí wà, ìwọ Ọlọ́run mi. Ìrètí mi wá láti ọ̀dọ̀ Rẹ.

⁶Òun nìkan ní àpáta àti ìgbàlà mi; Òun ni ààbò mi, a kí yóò sí mi nípò.

⁷Ìgbàlà mi àti ògo mí dúró nínú Ọlọ́run; Òun ní àpáta ńlá mi, àti ààbò mi.

⁸Gbẹ́kẹ̀lé ní gbogbo ìgbà, ẹ̀yin ènìyàn; tú ọkàn Rẹ̀ jáde sí i, nítorí Ọlọ́run ní ààbò wa.

⁹Ní tòótọ́, asán ní àwọn ọmọ ènìyàn, èké si ni àwọn olóyè, wọn gòkè nínú ìwọ̀n bákan náà ni wọn fẹ́rẹ̀ jù asán lọ lápapọ̀ wọn jẹ èémí.

¹⁰Má ṣe gbẹ́kẹ̀lé ìnílára, tàbí gbéraga nínú olè jíjà, nítòótọ́ bí ọrọ̀ Rẹ̀ ń pọ̀ síi, má ṣe gbẹ́kẹ̀ Rẹ̀ lé wọn.

¹¹Ọlọ́run ti sọ̀rọ̀ lẹ́ẹ̀kejì, ni mo gbọ́ èyí pé, ti Ọlọ́run ní agbára

¹² Pẹ̀lúpẹ̀lú, OLÚWA, tirẹ ni àánú nitorí ti iwọ san án fun olúkúlùkù ènìyàn gẹ́gẹ́ bi iṣẹ́ Rẹ̀.