Read Bíbélì Mímọ́ ní Èdè Yorùbá Òde-Òní Ìwé Sáàmù 66 Bible Online

Ìwé Sáàmù 66 - Bíbélì Mímọ́ ní Èdè Yorùbá Òde-Òní bible

Ìwé Sáàmù 66

¹Ẹ hó ìhó ayọ̀ sí Ọlọ́run, gbogbo ayé!

²Ẹ kọrin ọ̀lá orúkọ Rẹ̀; Ẹ fún un ní ìyìn, ògo,

³Ẹ wí fún Ọlọ́run “pé, ìwọ ti ní ẹ̀rù tó nínú iṣẹ́ Rẹ̀! Nípa ọ̀pọ̀ agbára Rẹ ni àwọn ọ̀tá Rẹ yóò fi sìn ọ́.

⁴Gbogbo ayé ń wólẹ̀ fún ọ; wọn ń kọrin ìyìn sí ọ, wọ́n ń kọrin ìyìn sí orúkọ Rẹ.” Sela

⁵Ẹ wá wo ohun tí Ọlọ́run ṣe, Iṣẹ́ Rẹ̀ ti ní ẹ̀rù tó sí àwọn ọmọ ènìyàn!

⁶O yí òkun padà sí ilẹ̀ gbígbẹ, wọ́n fi ẹsẹ̀ rìn inú omi kọjá, níbẹ̀ ni àwa yọ̀ nínú Rẹ.

⁷O ń jọba títí láé nípa agbára Rẹ̀, ojú Rẹ̀ ń wò orílẹ̀ èdè kí àwọn ọlọ̀tẹ̀ má ṣe gbé ara wọn ga. Sela

⁸Ẹ yin Ọlọ́run wa, ẹ̀yin ènìyàn, jẹ́ kí a mú ni gbọ́ ohun ìyìn Rẹ̀;

⁹O ti dá ààbò bo ẹ̀mí wa kò sì jẹ́ kí ẹsẹ̀ wa kí o yẹ̀

¹⁰Nítorí ìwọ, Ọlọ́run, Dan wa wò; ìwọ dán wa bí a tí ń Dan fàdákà wo

¹¹Ìwọ mú wa wá sínú ẹ̀wọ̀n o sì di ẹ̀rù lé ẹ̀yìn wa

¹²Ìwọ mú àwọn ènìyàn gun wá ní orí àwa la iná àti omi kọjá ṣùgbọ́n ìwọ mú wa dé ibi ọ̀pọ̀.

¹³Èmi ó wá sí tẹ́ḿpìlì Rẹ pẹ̀lú ọrẹ ẹbọ sísun kí n sì mú ẹ̀jẹ́ mi ṣẹ sí ọ

¹⁴Ẹ̀jẹ́ ti ètè mi jẹ́, tí ẹnu mi sì sọ nígbà tí mo wà nínú ìsòro.

¹⁵Èmi o sun ẹbọ ọlọ́ràá sí ọ àti ẹbọ ọ̀rá àgbò; èmi o rú akọ màlúù àti ewúrẹ́. Sela

¹⁶Ẹ wá gbọ́ gbogbo ẹ̀yin tí ó bẹ̀rù OLÚWA; ẹ jẹ́ kí n sọ ohun tí ó ṣe fún mi.

¹⁷Mo fi ẹnu mi kígbe sókè sí i: Ìyìn Rẹ̀ wà ní ẹnu mi.

¹⁸Bí èmi bá gba ẹ̀ṣẹ̀ ní àyà mi, OLÚWA kì yóò gbọ́ ohùn mi;

¹⁹Ṣùgbọ́n Ọlọ́run gbọ́ nítòótọ́ o ti gbọ́ ohun mi nínú àdúrà.

²⁰Ìyìn ni fún Ọlọ́run ẹni tí kò kọ àdúrà mi tàbí mú ìfẹ́ Rẹ̀ kúrò lọ́dọ̀ mi!