Read Bíbélì Mímọ́ ní Èdè Yorùbá Òde-Òní Ìwé Sáàmù 68 Bible Online

Ìwé Sáàmù 68 - Bíbélì Mímọ́ ní Èdè Yorùbá Òde-Òní bible

Ìwé Sáàmù 68

¹Kí Ọlọ́run kí o dìde, kí àwọn ọ̀ta Rẹ̀ kí ó fọ́nká; kí àwọn ọ̀ta Rẹ̀ kí ó sá níwájú Rẹ̀.

²Bí ìjì ti ń fẹ́ èéfín lọ, kí ó fẹ́ wọn lọ; bí ìdà tí i yọ́ níwájú iná, kí olùṣe búburú ṣègbé níwájú Ọlọ́run.

³Ṣùgbọ́n kí inú olódodo kí ó dùn kí ó sì kún fún ayọ̀ níwájú Ọlọ́run; kí inú wọn kí ó dùn, kí ó sì kún fún ayọ̀.

⁴Ẹ kọrin sí Ọlọ́run, ẹ kọrin ìyìn síi, ẹ la ọ̀nà fún ẹni tí ń ré kọjá ní ihà. JAH ni orúkọ Rẹ̀, kí ẹ sì máa yọ̀ níwájú Rẹ̀.

⁵Baba àwọn aláìní baba àti Onídàájọ́ àwọn opó ni Ọlọ́run ni ibùgbé Rẹ̀ mímọ́

⁶Ọlọ́run gbé ẹni òfo kálẹ̀ nínú ìdílé, ó darí àwọn ẹlẹ́wọ̀n pẹ̀lú orin ṣùgbọ́n àwọn ọlọ́tẹ̀ ni ń gbé nínú ilẹ̀ gbígbẹ.

⁷Nígbà tí ìwọ bá jáde lónìí níwájú àwọn ènìyàn Rẹ̀, Ọlọ́run, tí ń kọjá lọ láàrin ihà, Sela

⁸Ilẹ̀ mi títí, àwọn ọ̀run ń rọ òjò jáde, níwájú Ọlọ́run, ẹni Sínáì, níwájú Ọlọ́run, Ọlọ́run Ísírẹ́lì.

⁹Ìwọ fún wa ní ọ̀pọ̀lọpọ̀ òjò, Ọlọ́run; ìwọ tu ilé inú Rẹ̀ lára nígbà tí ó Rẹ̀ ẹ́ tan.

¹⁰Àwọn ènìyàn Rẹ tẹ̀dó ṣíbẹ̀ nínú ọ̀pọ̀lọpọ̀ ìní Rẹ̀, Ọlọ́run, ìwọ pèsè fún àwọn aláìní.

¹¹OLÚWA ti pàṣẹ ọ̀rọ̀, púpọ̀ ní ogun àwọn ẹni tí o ń ròyìn Rẹ.

¹²“Àwọn ọba àti àwọn ológun yára sálọ; Obìnrín tí ó sì jókòó ni ilé ní ń pín ìkógun náà.

¹³Nígbà tí ẹ̀yin sùn láàrin àwọn àgọ́ iná, nígbà náà ni ẹ̀yin ó dàbí apá àdàbà ti a bò ní sílífa.”

¹⁴Nígbà ti Olódùmarè fọ́n àwọn ọba ká ní ilẹ̀ náà, ó dàbí òjò dídi ní Salímónì.

¹⁵Òkè Básánì jẹ́ òkè Ọlọ́run; òkè tí ó ní orí púpọ̀ ní òkè Básánì.

¹⁶Kí ló dé ti ẹ̀yin fi ń lára, ẹ̀yin òkè wúwo, òkè tí Ọlọ́run ti fẹ́ láti jọba níbi tí Ọlọ́run fúnrarẹ̀ yóò máa gbé títí láé?

¹⁷Ẹgbẹ̀rún mẹ́wàá ní kẹ̀kẹ́ ogun Ọlọ́run ẹgbẹ̀rún lọ́nà ẹgbẹ̀rún; OLÚWA ń bẹ láàrin wọn ní Sínáì ni ibi mímọ́ Rẹ̀.

¹⁸Ìwọ ti gòkè sí ibi gíga ìwọ ti di ìgbèkùn ní ìgbékùn lọ; ìwọ ti gbà ẹ̀bùn fún ènìyàn: nítòótọ́, fún àwọn ọlọ̀tẹ̀ pẹ̀lú, Kí OLÚWA Ọlọ́run lè máa bá wọn gbé.

¹⁹Olùbùkún ni Ọlọ́run, sí Ọlọ́run Olùgbàlà wa, ẹni tí ó ń fi ojojúmọ́ gba ẹrù wa rù. Sela

²⁰Ọlọ́run wa jẹ́ Ọlọ́run tó ń gbàlà àti sí OLÚWA Ọlọ́run ni ó ń gbà wá lọ́wọ́ ikú.

²¹Ṣùgbọ́n Ọlọ́run yóò tẹ orí àwọn ọ̀tá Rẹ̀, àti agbárí onirun àwọn tó ń tẹ̀ṣíwájú nínú ẹ̀ṣẹ̀ wọn

²²OLÚWA wí pé, “Èmi o mú wọn wá láti Báṣánì; èmi ó mú wọn wá láti ibú omi òkun,

²³Kí ẹṣẹ̀ Rẹ̀ kí ó le pọ́n ní inú ẹ̀jẹ̀ àwọn ọ̀tá Rẹ̀, àti ahọ́n àwọn ajá Rẹ̀ ní ìpín ti wọn lára àwọn ọ̀tá Rẹ.”

²⁴Wọn ti rì ìrìn Rẹ, Ọlọ́run, irin Ọlọ́run mi àti ọba mi ní ibi mímọ́ Rẹ̀.

²⁵Àwọn akọrin ní íwájú, tí wọn ń lu tanborí

²⁶Ẹ fi ìyìn fún OLÚWA ní ẹgbẹgbẹ́; àní fún OLÚWA ẹ̀yin tí ó ti orísun Ísírẹ́lì wá.

²⁷Níbẹ̀ ní ẹ̀yà kékeré Bẹ́ńjámínì wà, tí o ń darí wọn, níbẹ̀ ni àwọn ọmọ aládé Júdà, níbẹ̀ ni àwọn ọmọ aládé Sébúlúnì àti tí Náfútàlì.

²⁸Pàsẹ agbára Rẹ, Ọlọ́run; fi agbára Rẹ hàn wá, Ọlọ́run, gẹ́gẹ́ bí ó ti ṣe tẹ́lẹ̀.

²⁹Nítorí tẹ́ḿpìlì Rẹ ni Jérúsálẹ́mù àwọn ọba yóò mú ẹ̀bùn wá fún ọ.

³⁰Bá àwọn ẹranko búburú wí, tí ń gbé láàrin ìko ọ̀pọ̀lọpọ̀ àwọn akọ màlúù pẹ̀lú àwọn ọmọ màlúù títí olúkúlùkù yóò fi forí balẹ̀ pẹ̀lú ìwọn fàdákà: tú àwọn orílẹ̀-èdè ti ń ṣe inú dídùn si ogun ká

³¹Àwọn ọmọ aládé yóò wá láti Éjíbítì; Jẹ́ kí Etiópíà na ọwọ́ Rẹ̀ sí Ọlọ́run.

³²Kọrin sí Ọlọ́run, ẹ̀yin ìjọba ayé, kọrin ìyìn sí OLÚWA, Sela

³³Sí ẹni tí ń gún ọ̀run dé ọ̀run àtijọ́ lókè, tó ń fọhùn Rẹ̀, ohùn ńlá.

³⁴Kéde agbára Ọlọ́run, ọlá ńlá Rẹ̀ wà lórí Ísírẹ́lì tí agbára Rẹ̀ wà lójú ọ̀run.

³⁵Ìwọ ní ẹ̀rù, Ọlọ́run, ní ibi mímọ́ Rẹ; Ọlọ́run Ísírẹ́lì fi agbára àti òkun fún àwọn ènìyàn Rẹ̀. Olùbùkún ní Ọlọ́run!