Read Bíbélì Mímọ́ ní Èdè Yorùbá Òde-Òní Ìwé Sáàmù 73 Bible Online

Ìwé Sáàmù 73 - Bíbélì Mímọ́ ní Èdè Yorùbá Òde-Òní bible

Ìwé Sáàmù 73

¹Nítòótọ̀ Ọlọ́run dára fún Ísírẹ́lì, fún àwọn ọlọ́kàn funfun.

²Ṣùgbọ́n bí ó ṣe ti èmi, ẹsẹ̀ mi ti yẹ̀ tán; ìrìn mi fẹ́rẹ̀ yọ̀ tán.

³Nítorí èmi ń ṣe ìlara àwọn tó ń ṣeféfé nígbà tí mo bá rí ọlá àwọn ènìyàn búburú.

⁴Wọn kò ṣe wàhálà; ara wọn mókun wọn sì lágbára.

⁵Wọn kò ní ìpín nínú àjàgà tó ń ṣẹlẹ̀ si ènìyàn; a kò pọ́n wọn lójú nípa ẹlomíràn.

⁶Ìgbéraga ni ọ̀ṣọ́ ọrùn wọn; ìwà ìpá bò wọ́n mọ́lẹ̀ bí aṣọ.

⁷Láti inú ọkàn àrékérekè ni àìsòdodo ti wá; ẹ̀rí ọkàn búburú wọn kò ní òdiwọ̀n

⁸Wọn ń ṣẹ̀sín, wọn sì ń sọ̀rọ̀ òdì níti ìnilára, wọn ń sọ̀rọ̀ láti ibi gíga.

⁹Wọ́n ń gbé ẹ̀mí wọn lé ọ̀run ahọ́n wọn gba ipò ayé.

¹⁰Nítorí náà àwọn ènìyàn wọn yípadà sí wọn wọ́n sì mu omi ní ọ̀pọ̀lọpọ̀.

¹¹Wọ́n wí pé, “Báwo ni Ọlọ́run yóò ṣe mọ̀? Ọ̀gá ògo ha ní ìmọ̀ bí?”

¹²Bí àwọn ènìyàn búburú ṣe rí nìyí ènìyàn asán, wọn ń pọ̀ ní ọrọ̀.

¹³Nítòótọ́ nínú asán ni mo pa ọkàn mi mọ́; nínú asán ni mo wẹ ọwọ́ mi ní àìlẹ́sẹ̀.

¹⁴Ní gbogbo ọjọ́ ni a ń yọ mí lẹ́nu; a sì ń jẹ mí níyà ní gbogbo òwúrọ̀.

¹⁵Bí mo bá wí pé, “Èmi ó wí báyìí,” Èmi ó ṣẹ̀sí ìran àwọn ọmọ Rẹ̀.

¹⁶Nígbà tí mo gbìyànjú láti mọ èyí, O jẹ́ ìnilára fún mi.

¹⁷Tí tí mo fi wọ ibi mímọ́ Ọlọ́run; Nígbà náà ni òye ìgbẹ̀yìn wọn yé mi,

¹⁸Lótítọ́ ìwọ gbé wọn lórí ilẹ̀ yíyọ́ ìwọ jù wọ́n sílẹ̀ sínú ìparun.

¹⁹Báwo ní a ti mú wọn lọ sínú ìdahoro yìí bí ẹni pé ní ìṣẹ́jú kan! Ìbẹ̀rù ni a fi ń run wọn pátapáta!

²⁰Bí àlá nígbà tí ènìyàn bá jí, bẹ́ẹ̀ ni nígbà tí ìwọ bá dìde, OLÚWA, ìwọ yóò ṣe àbùkù àwòrán wọn.

²¹Nígbà tí inú mi bàjẹ́ àti ọkàn mi sì korò,

²²Mo jẹ́ aṣiwèrè àti aláìlóye; mo jẹ́ ẹranko ní ìwájú Rẹ.

²³Ṣíbẹ̀ mo wà pẹ̀lú Rẹ nígbà gbogbo; ìwọ di ọwọ́ ọ̀tún mi mú.

²⁴Ìwọ fi ìmọ̀ràn Rẹ tọ́ mi ní kẹyìn ìwọ ó mú mi lọ sí inú ògo

²⁵Ta ni mo ní ní ọ̀run, bí kò ṣe ìwọ? Àti ní ayé kò sí ohun tí mo fẹ́ lẹ́yìn Rẹ.

²⁶Ara mi àti ọkàn mi leè kùnà ṣùgbọ́n Ọlọ́run ni agbára ẹ̀mí mi àti ìpín mi títí láé.

²⁷Àwọn tí ó jìnnà sí ọ yóò ṣègbé ìwọ ti pa gbogbo wọn run; tí ń ṣe àgbèrè kiri kúrò lọ́dọ̀ Rẹ

²⁸Ṣùgbọ́n ní ti èmi, ó dára láti súnmọ́ Ọlọ́run Èmi ti fi OLÚWA Ọlọ́run ṣe ààbò mi; Kí èmi ó lè máa sọ̀rọ̀ iṣẹ́ Rẹ.