Read Bíbélì Mímọ́ ní Èdè Yorùbá Òde-Òní Ìwé Sáàmù 74 Bible Online

Ìwé Sáàmù 74 - Bíbélì Mímọ́ ní Èdè Yorùbá Òde-Òní bible

Ìwé Sáàmù 74

¹Ọlọ́run, èéṣe tí ìwọ fi kọ̀ wá sílẹ̀ títí láé? Èéṣe tí ìbínú Rẹ̀ fi dìde sí àwọn àgùntàn pápá Rẹ?

²Rántí àwọn ènìyàn tí ìwọ ti rà nígbà àtijọ́, ẹ̀yà ilẹ̀ ìní Rẹ, tí ìwọ ti ràpadà Òkè Síónì, níbi tí ìwọ ń gbé.

³Yí ẹṣẹ̀ Rẹ̀ padà sí ìparun ayérayé wọn, gbogbo ìparun yìí tí ọ̀ta ti mú wá sí ibi mímọ́.

⁴Àwọn ọ̀tá Rẹ ń bú ramú-ramù láàrin ìja ènìyàn Rẹ, wọ́n ń gbé Àṣìá wọn sókè fún àmì;

⁵Wọ́n ń rí bí ọkùnrin tí ó gbé àáké Rẹ̀ sókè láti gé igi igbó dídí.

⁶Ṣùgbọ́n nìsìnsìn yìí iṣẹ́ ọnà fínfín ní wọn fi àáké òòlù wó lulẹ̀ ní ẹ̀ẹ̀kan náà

⁷Wọ́n sun ibi mímọ́ Rẹ̀ lulẹ̀ wọ́n ba ibùgbé orúkọ Rẹ̀ jẹ́

⁸Wọ́n wí ní ọkàn wọn. “Àwa ó run wọ́n pátapáta!” Wọ́n sun gbogbo ibi ìjọ́sìn Ọlọ́run ní ilẹ̀ náà.

⁹A kò fún wa ní àmì iṣẹ́ ìyanu kankan; kò sí wòlíì kankan ẹnìkan kan wa kò mọ ìgbà tí eléyìí yóò dà.

¹⁰Àwọn ọ̀ta yóò ti kùn sí ọ pẹ́ tó, Ọlọ́run? Àwọn ọ̀ta yóò ha ba orúkọ Rẹ jẹ́ títí láé?

¹¹Èéṣe tí ìwọ fi dá ọwọ́ Rẹ dúró, ọwọ́ ọ̀tún Rẹ? Mú-un kúrò nínú ìṣẹ́po aṣọ Rẹ kí o sì run wọ́n!

¹²Ṣùgbọ́n ìwọ Ọlọ́run ni ọba mi láti ìgbà pípẹ́; ó mú ìgbàlà wá sórí ilẹ̀ ayé.

¹³Ìwọ ni ó la òkun sílẹ̀ nípa agbára Rẹ; Ìwọ fọ́ orí àwọn abàmì ẹ̀dá nínú omi

¹⁴Ìwọ fọ́ orí Lefiatani túútúú, o sì fi se oúnjẹ fun àwọn ẹ̀dá ti ń gbé inú ìjù Tìrẹ ní ọ̀sán, tìrẹ sì ni alẹ́ pẹ̀lú; ìwọ fi ìdí òòrùn àti òṣùpá lélẹ̀.

¹⁵Iwọ ya orísun omi àti iṣàn omi; Ìwọ mú kí odò tó ń ṣàn gbẹ

¹⁶Tìrẹ ni ọ̀sán, tìrẹ ni òru pẹ̀lú; ìwọ yà oòrùn àti òsùpá.

¹⁷Ìwọ pààlà etí ayé; Ìwọ dá ìgbà ẹ̀ẹ̀rùn àti ìgbà òtútù.

¹⁸Rántí bí àwọn ọ̀tá ń kẹ́gàn Rẹ, OLÚWA bí àwọn aṣiwèrè ènìyàn ti ń ba orúkọ Rẹ jẹ́.

¹⁹Má ṣe fi ẹ̀mí àdàbà Rẹ fún ẹranko ìgbẹ́ búburú; Má ṣe gbàgbé ẹ̀mí àwọn ènìyàn Rẹ tí a ń pọ́n lójú títí láé.

²⁰Bojúwo májẹ̀mu Rẹ, nítorí ibi òkùnkùn ayé kún fún ibùgbé ìkà.

²¹Má ṣe jẹ́ kí àwọn aninilára padà sẹ́yìn nínú ìtìjú jẹ́ kí àwọn aláìní àti talákà yin orúkọ Rẹ.

²²Dìde, Ọlọ́run, gba ẹjọ́ ara Rẹ̀ rò; rántí bí àwọn aṣiwèrè ti ń kẹ́gàn Rẹ ní gbogbo ọjọ́.

²³Má ṣe gbàgbé ohun àwọn ọ̀tá Rẹ, bíbú àwọn ọ̀tá Rẹ, tí ó ń pọ̀ síi nígbà gbogbo.