Read Bíbélì Mímọ́ ní Èdè Yorùbá Òde-Òní Ìwé Sáàmù 80 Bible Online

Ìwé Sáàmù 80 - Bíbélì Mímọ́ ní Èdè Yorùbá Òde-Òní bible

Ìwé Sáàmù 80

¹Gbọ́ tiwa, ìwọ olùsọ́ àgùntàn Ísírẹ́lì; ìwọ tí ó darí Jósẹ́fù bí ọwọ́ ẹran; ìwọ tí o jòkòó lórí ìtẹ́ láàrin Kérúbù, tàn jáde

²Níwájú Éfúremù, Bẹ́ńjámínì àti Mánásè. Rú agbára Rẹ̀ sókè; wa fún ìgbàlà wa.

³Mú wa padà bọ̀ sípò, ìwọ Ọlọ́run; jẹ́ kí ojú Rẹ kí ó tan ìmọ́lẹ̀ sí wa, kí a bà lé gbà wá là

⁴OLÚWA Ọlọ́run, ìbínú Rẹ̀ yóò ti pẹ́ tó sí àdúrà àwọn ènìyàn Rẹ?

⁵Ìwọ ti fi oúnjẹ bọ́ wọn ìwọ ti mú wọn wa ẹ̀kún mu ní ẹ̀kúnrẹ́rẹ́

⁶Ìwọ sọ wá di ẹlẹ́yà fún àwọn aládùúgbò wa, àwọn ọ̀tá wa sì ń yọ̀ wá.

⁷Tún wa yípadà, ìwọ, Ọlọ́run; jẹ́ kí ojú Rẹ tàn sí wa, kí a ba à le gbà wá là.

⁸Ìwọ mú àjàrà jáde láti Éjíbítì; ìwọ lé àwọn aláìkọlà jáde, o sì gbìn-ín.

⁹Ìwọ sí àyè sílẹ̀ fún un, ìwọ sì mu tọ gbòǹgbò jìnlẹ̀ ó sì kún ilẹ̀ náà.

¹⁰A bò àwọn òkè mọ́lẹ̀ òkè pẹ̀lú òjijì Rẹ̀, ẹ̀ka Rẹ dàbí kédárì Ọlọ́run.

¹¹O yọ ẹ̀ka Rẹ̀ sínú òkun, ọwọ́ Rẹ̀ sí odò ńlá nì.

¹²Èéṣe tí ìwọ fi wó odi Rẹ̀ tí àwọn ènìyàn tí ó ń kọjá fi ń sa èso Rẹ̀?

¹³Ìmọ̀do láti inú igbó ń bàá jẹ́ àti ẹranko igbó ń jẹ ẹ́ run.

¹⁴Yípadà sí wa, àwa ń bẹ̀ ọ, Ọlọ́run! Bo jú wolẹ̀ láti ọ̀run kí o sì wò ó! Kí o sì bẹ àjàrà yìí wò,

¹⁵Gbòngbò èyí tí ọwọ́ ọ̀tún Rẹ ti gbìn, àti ẹ̀ka tí ìwọ ti mú lágbára fún ara Rẹ.

¹⁶A gé àjàrà Rẹ lulẹ̀, a ti fi iná sun ún; ní ìfibú, àwọn ènìyàn Rẹ̀ ń ṣègbé.

¹⁷Jẹ́ kí ọwọ́ Rẹ kí ó wà lára ọkùnrin tí ó wà ní ọwọ́ ọ̀tún Rẹ, ọmọ ènìyàn tí ìwọ tí gbékalẹ̀ fún ara Rẹ.

¹⁸Nígbà náà àwa kí yóò yípadà kúrò lọ́dọ̀ Rẹ; mú wa yè, àwa o sì máa pe orúkọ Rẹ.

¹⁹Tún wa yípadà, OLÚWA Ọlọ́run; kí ojú Rẹ̀ kí o tan ìmọ́lẹ̀ sí wa, kí á ba à lè gbà wá là.