Read Bíbélì Mímọ́ ní Èdè Yorùbá Òde-Òní Ìwé Sáàmù 88 Bible Online

Ìwé Sáàmù 88 - Bíbélì Mímọ́ ní Èdè Yorùbá Òde-Òní bible

Ìwé Sáàmù 88

¹OLÚWA, Ọlọ́run tí o gba mí là, ní ọ̀sán àti ní òru ni mo kígbe sókè sí Ọ.

²Jẹ́ kí àdúrà mi kí o wá sí iwájú Rẹ; dẹ etí Rẹ̀ sí igbe mi.

³Nítorí ọkàn mi kún fún ìpọ́njú ọkàn mi sì súnmọ́ isà òkú.

⁴A kà mí mọ́ àwọn tí wọ́n lọ sí ọ̀gbun ilẹ̀ èmi dà bí ọkùnrin tí kò ni agbára.

⁵A yà mí sọ́tọ̀ pẹ̀lú àwọn òkú bí ẹni tí a pa tí ó dùbúlẹ̀ ní ipò ikú, ẹni tí ìwọ kò rántí mọ́, ẹni tí a gé kúrò lára àwọn tí ìwọ ń tọ́jú.

⁶Ìwọ tí ó fi mí sí kòtò jínjìn, ní ibi ọ̀gbun tó ṣókùnkùn.

⁷Ìbínú Rẹ ṣubú lé mi gidigidi; ìwọ ti fi àwọn ìjì Rẹ̀ borí mi.

⁸Ìwọ tí gba ọ̀rẹ́ mi tí ó súnmọ́ mí kúrò lọ́wọ́ mi ìwọ sì sọ mi di ìríra sí wọn. A há mi mọ́, èmi kò sì lé è jáde;

⁹Ojú mi káànú nítorí ìpọ́njú. Mo kígbe pè ọ́, OLÚWA, ní gbogbo ọjọ́; mo na ọwọ́ mí jáde sí ọ.

¹⁰Ìwọ ó fi iṣẹ́ ìyanu Rẹ hàn fún òkú? Àwọn òkú yóò ha dìde láti yín ọ́ bí?

¹¹A ó ha fi iṣeun ifẹ́ Rẹ hàn ni ibojì bí: Tàbí òtítọ́ Rẹ ni ipò iparun?

¹²A ha le mọ iṣẹ́ ìyanu Rẹ ní òkùnkùn bí àti òdodo Rẹ ní ìlà ìgbàgbé?

¹³Ṣùgbọ́n mo kígbe sí ọ fún ìrànlọ́wọ́, OLÚWA; ní òwúrọ̀ ní àdúrà mí wá sọ́dọ̀ Rẹ.

¹⁴OLÚWA, èéṣe tí ìwọ fi kọ̀ mí tí ìwọ fi ojú Rẹ pamọ́ fún mi?

¹⁵Láti ìgbà èwe mi, ìṣẹ́ ń ṣẹ́ mi, èmi múra àti kú; nígbà ti ẹ̀ru Rẹ ba ń bà mí, èmi di gbére-gbère

¹⁶Ìbínú Rẹ ti kọjá lára mi; ìbẹ̀rù Rẹ ti ge mi kúrò

¹⁷Ní gbogbo ọjọ́ ní wọn yí mi ká bí ìkún omi; wọ́n mù mí pátápátá.

¹⁸Ìwọ ti mú ọ̀rẹ́ àti olùfẹ́ mi kúrò lọ́dọ̀ mi; òkùnkùn sì jẹ́ ọ̀rẹ́ tímọ́tímọ́ mi.