Read Bíbélì Mímọ́ ní Èdè Yorùbá Òde-Òní Ìwé Sáàmù 89 Bible Online

Ìwé Sáàmù 89 - Bíbélì Mímọ́ ní Èdè Yorùbá Òde-Òní bible

Ìwé Sáàmù 89

¹Èmi kọrin títóbi ìfẹ́ OLÚWA títí láé; pẹ̀lú ẹnu mi ní èmi yóò jẹ́ kí a mọ̀ òtítọ́ Rẹ láti ìran dé ìran.

²Èmi ó wí pé, ìfẹ́ Rẹ dúró títí láé, pe ìwọ gbe òtítọ́ Rẹ kalẹ̀ ní ọ̀run fúnrarẹ.

³ Ìwọ wí pé, “Èmi ti dá májẹ̀mu pẹ̀lú àwọn àyànfẹ́ mi mo ti búra fún Dáfídì ìránṣẹ́ mi.

⁴Èmi ó fi ìdí irú ọmọ Rẹ múlẹ̀ títí láé èmí ó sì máa gbe ìtẹ́ Rẹ ró láti ìran dé ìran”.

⁵Àwọn ọ̀run yóò mú yín ṣiṣẹ́ ìyanu Rẹ, OLÚWA, òtítọ́ Rẹ ní ìpéjọpọ̀ àwọn ẹni mímọ́.

⁶Ta ní ó wà ni ọ̀run ti a lè fi we OLÚWA? Ta ni nínú àwọn ọmọ alágbára ti a lè fi wé OLÚWA?

⁷Nínú àjọ ìgbìmọ̀ ẹni mímọ́, wọn bẹ̀rù Ọlọ́run gidigidi; ó sì ní ibùyìn fún jú gbogbo àwọn tí ó yí i ká.

⁸OLÚWA Ọlọ́run alágbára, ta ló dàbí Rẹ ìwọ jẹ́ alágbára, OLÚWA, òtítọ́ Rẹ sì yí ọ ká.

⁹Ìwọ ń darí ríru omi òkun; nígbà tí ó ru àwọn omi sókè, ìwọ mú wọn pa rọ́rọ́.

¹⁰Ìwọ ni o ti ya Ráhábù pẹ́rẹpẹ̀rẹ bí ẹni tí a pa; ìwọ ti fi apá ọwọ́ agbára Rẹ tú àwọn ọ̀tá Rẹ ká.

¹¹Tìrẹ ní àwọn ọ̀run, ayé pẹ̀lú jẹ tìrẹ: ayé àti ohun gbogbo tí ó wà nínú Rẹ̀: ìwọ ti gbé wọn kalẹ̀.

¹²Gúṣù àti Àríwá ìwọ ní ó dá wọn; Taborí àti Hámónì ń fi ayọ̀ yìn orúkọ Rẹ.

¹³Ìwọ ní apá agbára; agbára ní ọwọ́ Rẹ, gíga ní ọwọ́ ọ̀tún Rẹ.

¹⁴Òdodo àti òtítọ́ ní ìpílẹ̀ ìtẹ́ Rẹ: ìdúró ṣinṣin ìfẹ́ àti òtítọ́ ń lọ ṣíwájú Rẹ.

¹⁵Ìbùkún ní fún àwọn ènìyàn tí wọn mọ igbe ayọ̀, tí ó ń rìn OLÚWA nínú ìmọ́lẹ̀ oju Rẹ.

¹⁶Wọn ń ṣògo nínú orúkọ Rẹ̀ ní gbogbo ọjọ́, wọn ń yin òdodo Rẹ.

¹⁷Nítorí ìwọ ni ògo agbára wọn; nípa ojúrere ni ìwọ wá ń ṣògo.

¹⁸Nítorí tí OLÚWA ni asà wa, ọba wa sì ni Ẹni Mímọ́ Ísírẹ́lì.

¹⁹Nígbà náà ní ìwọ sọ̀rọ̀ nínú ìran sí àwọn olótítọ́ Rẹ, wí pé: “èmi tí gbé adé kálẹ̀ sórí ẹni tí ó lágbára, èmi ti gbé ẹni tí a yan láti ọ̀dọ̀ àwọn ènìyàn ga.

²⁰ Èmi tí rí Dáfídì ìránṣẹ́ mi; pẹ̀lú òróró mímọ́ mi ní mo fi yàn án;

²¹Ìgbà gbogbo ni ọwọ́ mi yóò máa wà pẹ̀lú Rẹ̀ a pá mí yóò sì fi agbára fún un.

²²Àwọn ọ̀tá kí yóò borí Rẹ̀, àwọn ènìyàn búburú kì yóò Rẹ̀ ẹ́ sílẹ̀

²³Èmi yóò run àwọn ọ̀tá Rẹ níwájú Rẹ èmi yóò lu àwọn tí ó kóríra Rẹ bolẹ̀

²⁴Òtítọ́ mi àti ìdúróṣinṣin ìfẹ́ yóò wà pẹ̀lú Rẹ àti ní orúkọ mi ní a ó gbé ìwo Rẹ ga.

²⁵Èmi o gbé ọwọ́ Rẹ lórí òkun àti ọwọ́ ọ̀tún Rẹ lórí àwọn odo ńlá

²⁶Òun yóò kígbe sí mi pé, ‘ìwọ ní bàbá mi, Ọlọ́run mi, àti àpáta ìgbàlà mi!’

²⁷ Èmi yóò ṣe é ni àkọ́bí mí, Ẹni gíga jù àwọn ọba ayé.

²⁸Títí láé ni èmi yóò pa ìfẹ́ dídúró ṣinṣin mọ́ fún un, àti májẹ̀mú mi pẹ̀lú Rẹ̀ yóò dúró gbọingbọin.

²⁹Èmi o fi ìdí irú ọmọ Rẹ̀ múlẹ̀ títí láé, àti ìtẹ́ Rẹ gẹ́gẹ́ bí ọ̀run ti wà láé.

³⁰“Bí àwọn ọmọ Rẹ̀ bá kọ òfin mi sílẹ̀ tí wọ́n kò sì rìn gẹ́gẹ́ bí ìlànà mi.

³¹Tí wọn bá kọ ìlànà mi tí wọ́n kò sì pa àṣẹ mi mọ́,

³²Nígbà náà ni èmi o fì ọ̀gà bẹ irékọjá wọn wò àti ẹ̀ṣẹ̀ wọn pẹ̀lú ìná:

³³Ṣùgbọ́n èmi kò ní mú ìfẹ́ mi tí ó dúró ṣinṣin kúrò lọ́dọ̀ Rẹ, tàbí ṣẹ́ tán sí òtítọ́ mi.

³⁴Èmi kì yóò sẹ́ májẹ̀mú mí, tàbí kí èmi yí ọ̀rọ̀ tí o ti ẹnu mi jáde padà.

³⁵Lẹ́ẹ̀kan ṣoṣo ní èmi ti fi ìwà mímọ́ mi búra; èmi kì yóò purọ́ fún Dáfídì.

³⁶Irú ọmọ Rẹ yóò dúró títí láé, àti ìtẹ́ Rẹ̀ yóò dúró bí òòrùn níwájú mi.

³⁷ A ó fi múlẹ̀ títí láé bí òṣùpá, àti bi ẹlẹ́rìí òtítọ́ ni ọ̀run”. Sela

³⁸Ṣùgbọ́n nísinsìnyí ìwọ ti sá tì, ìwọ sì kórìíra; ìwọ kún fún ìrunú sí ẹni àmì òróró Rẹ.

³⁹Ìwọ tì sọ májẹ̀mú ìránṣẹ́ Rẹ di òfo; ìwọ tàbùkù adé Rẹ nínú ilẹ

⁴⁰Ìwọ tí wo gbogbo àwọn odi Rẹ̀ ìwọ sọ ibi gíga Rẹ̀ di ahoro.

⁴¹Àwọn tí ń kọjá lọ fi ṣe ìjẹ; o ti di ẹ̀gàn àwọn olùbágbé e Rẹ̀

⁴²Ìwọ ti gbé ọwọ́ ọ̀tún ọ̀tá Rẹ̀ sókè; ìwọ mú gbogbo ọ̀tá Rẹ̀ yọ̀.

⁴³Pẹ̀lú, ìwọ ti yí ojú idà Rẹ̀ padà, ìwọ kò sì dúró tì í nínú ogun.

⁴⁴Ìwọ ti mú ògo Rẹ̀ kùnà, ìwọ si wó ìtẹ́ Rẹ̀ palẹ̀ sílẹ̀ẹ́lẹ̀.

⁴⁵Ìwọ ti gé ọjọ́ èwé Rẹ̀ kúrú; ìwọ si fi ìtìjú bò ó

⁴⁶Yóò ti pẹ́ tó, OLÚWA? Tí ìwọ ó ha fi ara Rẹ pamọ́ títí láé? Yóò ti pẹ́ to tí ìbínú Rẹ yóò máa jó bí iná?

⁴⁷Rántí bí ọjọ́ mi ti kúrú tó nítorí asán ha ní ìwọ fi sẹ̀dá àwọn ènìyàn!

⁴⁸Ta ni yóò wà láàyè tí kò ní rí ìkú Rẹ̀? Ta lo lé sa kúrò nínú agbára isà-òkú?

⁴⁹OLÚWA, níbo ni ìṣeun ìfẹ́ Rẹ̀ àtijọ́ wà, tí ìwọ ti fi òtítọ́ Rẹ̀ búra fún Dáfídì?

⁵⁰Rántí, OLÚWA, bí àti ń gan àwọn ìránṣẹ́ Rẹ; bí èmi ti gbà ní àyà mi láti ọ̀dọ̀ àwọn ènìyàn,

⁵¹Ẹ̀gàn tí àwọn ọ̀tá Rẹ gàn, OLÚWA, tí wọn gan ipaṣẹ̀ Ẹni àmì òróró Rẹ.

⁵²Olùbùkún ní OLÚWA títí láé. Àmín àti Àmín.