Read Bíbélì Mímọ́ ní Èdè Yorùbá Òde-Òní Ìwé Sáàmù 9 Bible Online

Ìwé Sáàmù 9 - Bíbélì Mímọ́ ní Èdè Yorùbá Òde-Òní bible

Ìwé Sáàmù 9

¹Èmi o yìn ọ, OLÚWA, pẹ̀lú gbogbo ọkàn mi; Èmi o sọ ti ìyanu Rẹ gbogbo.

²Inú mi yóò dùn èmi yóò sì yọ̀ nínú Rẹ; Èmi o kọrin ìyìn sí orúkọ Rẹ, Ìwọ Ọ̀gá-Ògo jùlọ.

³Àwọn ọ̀ta mi pẹ̀yìndà; Wọ́n kọsẹ̀ wọn sì ṣègbé níwájú Rẹ.

⁴Nítorí ìwọ ti di òtítọ́ àti ọ̀ràn mi mú; ìwọ ti jókòó lórí ìtẹ́ Rẹ, láti ṣe ìdájọ́ òdodo.

⁵Ìwọ ti bá orílẹ̀ èdè wí, Ìwọ sì ti pa ẹni búburú run; Ìwọ ti yọ orúkọ wọn kúrò láé àti láéláé.

⁶Ìparun àìlópin ti borí àwọn ọ̀ta, Ìwọ ti fa àwọn ìlú wọn tu; Àní ìrántí wọn sì ti sègbé.

⁷OLÚWA jọba títí láé; ó ti gbé ìtẹ́ Rẹ̀ kalẹ̀ fún ìdájọ́.

⁸ Òun yóò sì ṣe ìdájọ́ àyé ní òdodo; yóò ṣe àkóso ènìyàn pẹ̀lú òdodo.

⁹OLÚWA ni ààbò fún àwọn tí a ni lára, ibi ìsádi ní àkókò ìpọ́njú.

¹⁰Àwọn tí ó mọ orúkọ Rẹ yóò gbà ọ́ gbọ́, èmi tàbí ìwọ, OLÚWA, kò kọ àwọn to ń wa a sílẹ̀.

¹¹Kọ orin ìyìn sí OLÚWA, ti o ń jọba ní Síónì; kéde láàrin àwọn orílẹ̀ èdè ohun tí o ṣe.

¹²Nítorí ẹni tí ó ń gbẹ̀san ẹ̀jẹ̀ rántí; òun kò kọ ẹkún àwọn tí a pọ́n lójú.

¹³OLÚWA, wo bí àwọn ọ̀ta ṣe ń ṣe inúnibíni sí mi! Ṣàánú, kí o sì gbé mí sókè kúrò ní ẹnu ọ̀nà ikú,

¹⁴Kí èmi kí o lè sọ ti ìyìn Rẹ ni ẹnu ọ̀nà àwọn ọmọbìnrin Síónì àti láti máa yọ̀ nínú ìgbàlà Rẹ.

¹⁵Àwọn orílẹ̀ èdè ti jìn sí kòtò ti wọn ti gbẹ́; ẹsẹ̀ wọn ni àwọ̀n tí wọ́n dẹ sílẹ̀ kọ́.

¹⁶A mọ OLÚWA nípa òdodo Rẹ̀; àwọn ènìyàn búburú ni a dẹ́kun mú nípa iṣẹ́ ọwọ́ wọn.

¹⁷Àwọn ènìyàn búburú ni a ó dà sí isà òkú, àti gbogbo orílẹ̀ èdè tí ó gbàgbé Ọlọ́run.

¹⁸Ṣùgbọ́n àwọn aláìní ni a ò ní gbàgbé láéláé, ìrètí àwọn ti ó talakà lójú kí yóò ṣègbé láéláé.

¹⁹Dìde, OLÚWA, má ṣe jẹ́ kí ènìyàn borí; Jẹ́ kí a ṣe ìdájọ́ àwọn orílẹ̀ èdè ni iwájú Rẹ.

²⁰Lù wọ́n pẹ̀lú ìpayà, OLÚWA; jẹ́ kí àwọn orílẹ̀ èdè mọ̀ pé ènìyàn lásán ni wọ́n. Sela