Read Bíbélì Mímọ́ ní Èdè Yorùbá Òde-Òní Ìwé Sáàmù 92 Bible Online

Ìwé Sáàmù 92 - Bíbélì Mímọ́ ní Èdè Yorùbá Òde-Òní bible

Ìwé Sáàmù 92

¹Ohun rere ni láti máa fi ọpẹ́ fún OLÚWA àti láti máa kọrin sí orúkọ Rẹ̀, Ọ̀gá ògo,

²Láti kéde ìfẹ́ Rẹ̀ ní òwúrọ̀ àti òtítọ́ Rẹ̀ ní alẹ́

³Lára ohùn èlò orin olókùn mẹ́wàá àti lára ohun èlò orin háàpù.

⁴Nítorí ìwọ ni ó mú inú mi dùn nípa iṣẹ́ Rẹ OLÚWA; èmi kọrin ayọ̀ sí iṣẹ́ ọwọ́ Rẹ.

⁵Báwo ni isẹ́ Rẹ tí tóbi tó, OLÚWA, èrò inú Rẹ ìjìnlẹ̀ ni!

⁶Òpè ènìyàn kò mọ̀ ọ́n, aṣiwèrè kò sì mọ̀ ọ́n,

⁷Nígbà tí àwọn ènìyàn búburú bá rú jáde bí i koríko àti gbogbo àwọn olùṣe búburú gbèrú, wọn yóò run láéláé.

⁸Ṣùgbọ́n ìwọ OLÚWA ni a ó gbéga títí láé.

⁹Nítorí nítòótọ́ àwọn ọ̀tá Rẹ, OLÚWA, nítòótọ́ àwọn ọ̀ta Rẹ yóò ṣègbé; gbogbo àwọn olùṣe búburú ní a ó fọ́nká.

¹⁰Ìwọ tí gbé ìwo mi ga bí i ti màlúù igbó; òróró dídára ni a dà sími ní orí.

¹¹Ojú mi ti rí ìṣubú àwọn ọ̀ta mi; ìparun sí àwọn ènìyàn búburú tí ó dìde sí mi.

¹²Olódodo yóò gbèrú bí i igi ọ̀pẹ, wọn yóò dàgbà bí i igi kédárì Lẹ́bánónì;

¹³Tí a gbìn si ilé OLÚWA, Wọn yóò rúwé nínú àgbàlá Ọlọ́run wa.

¹⁴Wọn yóò máa so èso ní ìgbà ogbó wọn yóò dúró ní àkọ̀tun, wọn yóò sì tutù nini,

¹⁵Láti fihàn pé “Ẹni ìdúró ṣinṣin ni OLÚWA; òun ni àpáta mi, kò sì sí aburú kankan nínú Rẹ̀”