Read Bíbélì Mímọ́ ní Èdè Yorùbá Òde-Òní Ìwé Sáàmù 94 Bible Online

Ìwé Sáàmù 94 - Bíbélì Mímọ́ ní Èdè Yorùbá Òde-Òní bible

Ìwé Sáàmù 94

¹OLÚWA Ọlọ́run ẹni tí ń gbẹ̀san, Ọlọ́run ẹni tí ń gbẹ̀san.

²Gbé ara Rẹ sókè, ìwọ onídàájọ́ ayé; san ẹ̀san fún agbéraga ohun tí ó yẹ wọ́n.

³Báwo ní yóò ti pẹ́ tó, OLÚWA tí àwọn ẹni búburú yóò kọ orin ayọ̀?

⁴Wọ́n ń sọ̀rọ̀ ìgbérága jáde; gbogbo àwọn olùṣebúburú kún fún ìṣògo.

⁵Wọ́n fọ́ àwọn ènìyàn Rẹ túútúú, OLÚWA: wọ́n pọ́n ilẹ̀ ìní Rẹ̀ lójú.

⁶Wọ́n pa àwọn opó àti àlejò, wọ́n sì pa àwọn ọmọ aláìní baba,

⁷Wọ́n sọ pé, “OLÚWA kò rí i; Ọlọ́run Jákọ́bù kò sì kíyèsí i.”

⁸Kíyèsí i, ẹ̀yin aláìlóye nínú àwọn ènìyàn ẹ̀yin aṣiwèrè, nígbà wo ni ẹ̀yin yóò lóye?

⁹Ẹni tí ó gbin etí, ó lè ṣe aláìgbọ́ bi? Ẹni tí ó dá ojú? Ó ha lè ṣe láìríran bi?

¹⁰Ẹni tí ń bá orílẹ̀ èdè wí, ṣé kò lè tọ́ ni sọ́nà bí? Ẹni ti ń kọ́ ènìyàn ha lè ṣàìní ìmọ̀ bí?

¹¹ OLÚWA mọ èrò inú ènìyàn; ó mọ̀ pé aṣán ni wọ́n.

¹²Ìbùkún ni fún ènìyàn náà tí ìwọ báwí, OLÚWA, ẹni tí ìwọ kọ́ nínú òfin Rẹ;

¹³Ìwọ gbà á kúrò nínú ọjọ́ ibi, títí a ó fi wa ihò sílẹ̀ fún ẹni búburú.

¹⁴Nítorí OLÚWA kò ní kọ̀ àwọn ènìyàn Rẹ̀ sílẹ̀; Òun kò sì ní kọ ilẹ̀ ìní Rẹ̀ sílẹ̀.

¹⁵Ìdájọ́ yóò padà sí òdodo, àti gbogbo àwọn ọlọ́kàn dídúró ṣinṣin yóò tẹ̀ lé e lẹ́yìn.

¹⁶Ta ni yóò dìde fún mi sí àwọn olùṣe búburú? Tàbí ta ni yóò dìde sí àwọn oníṣẹ́ ẹ̀ṣẹ̀ fún mi?

¹⁷Bí kò ṣe pé OLÚWA fún mi ní ìrànlọ́wọ́, èmi fẹ́rẹ̀ má a gbé ní ilẹ̀ tí ó dákẹ́

¹⁸Nígbà tí mo sọ pé “ẹsẹ̀ mi ń yọ̀”, OLÚWA, ìfẹ́ Rẹ̀ ni ó tì mí lẹ́yìn.

¹⁹Nígbà tí àníyàn ńlá wà nínú mi, ìtùnú Rẹ̀ mú ayọ̀ sí ọkàn mi.

²⁰Ìjọba ìbàjẹ́ ha lè kẹ́gbẹ́ pẹ̀lú Rẹ ẹni tí ń fí òfin dìmọ̀ ìwà ìkà?

²¹Wọ́n kó ara wọn jọ si olódodo wọ́n sì ń dá àwọn aláìsẹ̀ lẹ́bi sí ikú.

²²Ṣùgbọ́n, OLÚWA ti di odi alágbára mi, àti Ọlọ́run mi ni àpáta nínú ẹni tí mo ti ń gba ààbò.

²³Òun yóò san ẹ̀san ibi wọn fún wọn yóò sì pa wọ́n run nítorí búburú wọn OLÚWA Ọlọ́run wa yóò pa wọ́n run.