Read Bíbélì Mímọ́ ní Èdè Yorùbá Òde-Òní Ìwé Òwe 16 Bible Online

Ìwé Òwe 16 - Bíbélì Mímọ́ ní Èdè Yorùbá Òde-Òní bible

Ìwé Òwe 16

¹Ti ènìyàn ni ìgbèrò inú ọkàn Ṣùgbọ́n láti ọ̀dọ̀ OLÚWA ni ìdáhùn ahọ́n ti ń wá.

²Gbogbo ọ̀nà ènìyàn ni ó dà bí i pé ó dára lójú ara rẹ̀ Ṣùgbọ́n OLÚWA ló ń díwọ̀n èrò inú ọkàn.

³Fi ohun gbogbo tí o bá ṣe lé OLÚWA lọ́wọ́ Èrò rẹ yóò sì ṣe é ṣe.

⁴OLÚWA ti ṣe ohun gbogbo láti mú kí ó rí bí ó ṣe fẹ́ Kódà ènìyàn búburú fún ọjọ́ ìpọ́njú.

⁵OLÚWA kórìíra gbogbo ẹni tí ń gbéraga lọ́kàn rẹ̀ mọ èyí dájú pé wọn kò ní lọ láìjìyà.

⁶Nípaṣẹ̀ ìfẹ́ àti òtítọ́ a ṣètùtù ẹ̀ṣẹ̀ nípaṣẹ̀ ìbẹ̀rù OLÚWA ènìyàn sá fún ibi.

⁷Nígbà tí ọ̀nà ènìyàn bá tẹ́ OLÚWA lọ́rùn, yóò mú kí àwọn ọ̀tá rẹ̀ gàn-án bá a gbé ní àlàáfíà.

⁸Ó sàn kí ó kéré pẹ̀lú òdodo ju èrè púpọ̀ pẹ̀lú èrú.

⁹Ènìyàn a máa pète ọ̀nà ara rẹ̀ lọ́kàn an rẹ̀ ṣùgbọ́n OLÚWA ní í pinnu ìgbésẹ̀ rẹ̀.

¹⁰Ètè ọba a máa sọ̀rọ̀ nípa inú síi ẹnu rẹ̀ kò gbọdọ̀ gbé ẹ̀bi fún ara rẹ̀.

¹¹Òdiwọ̀n àti òṣùwọ̀n òtítọ́ wá láti ọ̀dọ̀ OLÚWA; gbogbo wíwúwo àpò jẹ́ láti ọwọ́ rẹ̀.

¹²Àwọn ọba kórìírà ìwà àìtọ́ nítorí òdodo ní í fi ìdí ìtẹ́ múlẹ̀.

¹³Àwọn ọba ní inú dídùn sí ètè tí ń ṣòótọ́ ènìyàn tí ń sọ òtítọ́ ṣe iyebíye sí wọn.

¹⁴Ìrànṣẹ́ ikú ni ìbínú ọba jẹ́ ṣùgbọ́n ọlọgbọ́n ènìyàn yóò tù ú nínú.

¹⁵Nígbà tí ojú ọba bá túká, ó túmọ̀ sí ìyè; ojú rere rẹ̀ dàbí i ṣíṣú òjò ní ìgbà òjò.

¹⁶Ó ti dára tó láti ní ọgbọ́n ju wúrà lọ àti láti yan òye dípò o fàdákà!

¹⁷Òpópó ọ̀nà àwọn ẹni dídúró ṣinṣin yàgò fún ibi, ẹni tí ó ṣọ́ ọ̀nà rẹ̀, ṣọ́ ẹnu ara rẹ̀.

¹⁸Ìgbéraga ní í ṣáájú ìparun, agídí ọkàn ní í ṣáájú ìṣubú,

¹⁹ó sàn láti jẹ́ onírẹ̀lẹ̀ ọkàn láàrin àwọn olùpọ́njú jù láti máa pín ìpín pẹ̀lú àwọn agbéraga.

²⁰Ẹnikẹ́ni tí ó bá tẹ̀lé ẹ̀kọ́ yóò rí ire, ìbùkún sì ni fún ẹni tí ó gbẹ́kẹ̀ lé OLÚWA.

²¹Àwọn tí ó gbọ́n nínú ọkàn là ń pè ní olóye ọ̀rọ̀ ìtura sì ń mú ẹ̀kọ́ gbèrú.

²²Òye jẹ́ oríṣun ìyè fún àwọn tí ó ní i, ṣùgbọ́n ìwà òmùgọ̀ ń kó ìyà jẹ aláìgbọ́n.

²³Ọkàn ọlọgbọ́n ènìyàn a máa ṣọ́ ẹnu rẹ̀ ètè rẹ̀ sì ń mú kí ẹ̀kọ́ gbèrú.

²⁴Ọ̀rọ̀ ìtura dàbí afárá oyin ó dùn fún ọkàn, ó sì fi ìlera fún egungun.

²⁵Ọ̀nà kan tí ó dàbí i pé ó dára lójú ènìyàn ṣùgbọ́n ní ìgbẹ̀yìn a ṣokùnfà ikú.

²⁶Ìfẹ́-àti-jẹun alágbàṣe ń ṣiṣẹ́ fún un nítorí ebi rẹ̀ mú kí ó máa ṣiṣẹ́ ni.

²⁷Ènìyàn búburú ń pète ọ̀rọ̀ rẹ̀ sì dàbí i iná tí ń jóni.

²⁸Aláyìídáyidà ènìyàn dá ìjà sílẹ̀ olófòófó a sì máa pín ọ̀rẹ́ kòríkòsùn níyà.

²⁹Oníjàgídíjàgan ènìyàn tan aládùúgbò rẹ̀ ó sì mú un sọ̀kalẹ̀ lọ sí ọ̀nà tí kò dára.

³⁰Ẹni tí ń ṣẹ́jú ń pètekéte; ẹni tí ó ṣu ẹnu jọ ń pète aburú.

³¹Ewú orí jẹ́ ògo ìgbé ayé òdodo ní í múni débẹ̀.

³²Ó sàn láti jẹ́ oníṣùúrù ju ajagun ènìyàn lọ, ẹni tí ó pa ìbínú mọ́ra ju ajagun-gbàlú lọ.

³³A ṣẹ́ kèké dàsí ìṣẹ́po aṣọ, ṣùgbọ́n gbogbo ìdájọ́ rẹ̀ wá láti ọ̀dọ̀ OLÚWA.