Read Bíbélì Mímọ́ ní Èdè Yorùbá Òde-Òní Ìwé Òwe 20 Bible Online

Ìwé Òwe 20 - Bíbélì Mímọ́ ní Èdè Yorùbá Òde-Òní bible

Ìwé Òwe 20

¹Ẹlẹ́yà ni ọtí wáìnì, aláriwo sì ní ọ̀tí líle ẹnikẹ́ni tí ó bá sìnà nìpaṣẹ̀ wọn kò gbọ́n.

²Ìbínú ọba dàbí kíké e kìnnìún; ẹnikẹ́ni tí ó bá mú-un bínú ba ayé ara rẹ̀ jẹ́.

³Iyì ni ó jẹ́ fún ènìyàn láti sá fún ìjà ṣùgbọ́n gbogbo aláìgbọ́n a máa tètè wá ìjà.

⁴Ọ̀lẹ kì í ṣiṣẹ́ oko nígbà tí ó yẹ nítorí náà ní àsìkò ìkórè, yóò wá kò sì ní rì nǹkan.

⁵Ètè ọkàn ènìyàn dàbí, omi jínjìn; ṣùgbọ́n ènìyàn olóye á wá wọn jáde.

⁶Ọ̀pọ̀lọpọ̀ ènìyàn ni wọ́n máa ń wí oore wọn jáde, ṣùgbọ́nn kò rọrùn láti rí ènìyàn olóòótọ́.

⁷Olódodo ènìyàn a máa gbé ìgbé ayé àìlábùkù ìbùkún ni fún àwọn ọmọ rẹ̀ lẹ́yìn rẹ̀.

⁸Nígbà tí ọba bá jókóò sórí ilẹ̀ rẹ̀ láti ṣe ìdájọ́ yóò fẹ́ gbogbo ibi dànù pẹ̀lú ojú rẹ̀.

⁹Táni ó le è wí pé, “Mo ti ṣe ọkàn mi ní mímọ́, mo mọ́, n kò sì lẹ́ṣẹ̀”?

¹⁰Ìdíwọ̀n èké àti òṣùwọ̀n ìrẹ́jẹ OLÚWA kórìíra méjèèjì.

¹¹Kódà a mọ ọmọdé nípa iṣẹ́ rẹ̀ nípa pe bóyá iṣẹ́ rẹ mọ́ tàbí pé ó tọ̀nà.

¹²Etí tí ó ń gbọ́ àti ojú tí ó ń ríran OLÚWA ni ó dá méjèèjì.

¹³Má ṣe fẹ́ràn oorun, àìṣe bẹ́ẹ̀ ìwọ yóò di talákà má ṣe sùn ìwọ yóò sì ní oúnjẹ láti tún fi tọrọ.

¹⁴“Kò dára, kò dára” ní ẹni tó ra ọjà máa ń wí nígbà tí ó bá kúrò níbẹ̀ tán, yóò máa yangàn bí òun tí ṣe rí i rà sí.

¹⁵Góòlù wà, iyùn sì wà rẹpẹtẹ ṣùgbọ́n, ahọ́n tí ń sọ ìmọ̀ gan an ni ọ̀ṣọ́ iyebíye.

¹⁶Gba abọ́ ẹni tí ó ṣe onídùúró fún àlejò; mú un lọ́wọ́ bí ìbúra bí ó bá ṣe é fún obìnrin onírìnkurìn.

¹⁷Oúnjẹ tí a fi ọ̀nà ẹ̀rú rí máa ń dùn lẹ́nu ènìyàn ṣùgbọ́n, a yọrí sí bi ẹnu tí ó kún fún èèpẹ̀.

¹⁸Pa ètè rẹ mọ́ nípa wíwá ìmọ̀ràn bí o bá ń jagun, gba ìtọ́ṣọ́nà.

¹⁹Olófòófó dalẹ̀ àsírí nítorí náà yẹra fún ènìyàn tí ń rojọ́ jù.

²⁰Bí ènìyàn kan bá ṣépè fún baba tàbí ìyá rẹ̀, ìmọ́lẹ̀ rẹ̀ ni a ó pa kú nínú òkùnkùn biribiri.

²¹Ogún tí a kó jọ kíákíá ní ìbẹ̀rẹ̀ kì yóò ní ìbùkún ní ìgbẹ̀yìn gbẹ́yín.

²²Má ṣe wí pé, “N ó ṣẹ̀ṣan àṣìṣe rẹ yìí fún ọ” Dúró de OLÚWA yóò sì gbà ọ́ là.

²³OLÚWA kórìíra òdiwọ̀n èké. Òṣùwọ̀n ìrẹ́jẹ kò sì tẹ́ ẹ lọ́rùn.

²⁴OLÚWA ni ó ń ṣe olùdarí ìgbésẹ̀ ènìyàn Báwo wá ni òye gbogbo ọ̀nà ènìyàn ṣe le yé ni?

²⁵Ìdẹkùn ni fún ènìyàn láti ṣe ìlérí kíákíá nígbà tí ó bá sì yá kí ó máa ro ẹ̀jẹ̀ rẹ̀ wò.

²⁶Ọlọgbọ́n ọba tú ènìyàn búburú ká; Ó sì fi òòlọ ìpakà lọ̀ wọ́n.

²⁷Àtùpà OLÚWA ń ṣe àwárí ẹ̀mí ènìyàn a máa ṣàwárí ibi ìkọ̀kọ̀ inú

²⁸Ìfẹ́ àti òdodo pa ọba mọ́, nípa ìfẹ́, ìtẹ́ rẹ̀ wà láìléwu.

²⁹Ògo ọ̀dọ́mọkùnrin ni agbára wọn jẹ́ ewú orí ni iyì arúgbó.

³⁰Ìgbájú ìgbámú àti ìfarapa máa ń mú ibi lọ, pàsán sì máa ń ṣe àfọ̀mọ́ ibi ìkọ̀kọ̀ inú.