Read Bíbélì Mímọ́ ní Èdè Yorùbá Òde-Òní Ìwé Òwe 21 Bible Online

Ìwé Òwe 21 - Bíbélì Mímọ́ ní Èdè Yorùbá Òde-Òní bible

Ìwé Òwe 21

¹Ọkàn ọba ń bẹ lọ́wọ́ OLÚWA; a máa darí rẹ̀ lọ ibi tí ó fẹ́ bí ipa omi.

²Gbogbo ọ̀nà ènìyàn dàbí i pé ó dára lójú rẹ̀ ṣùgbọ́n, OLÚWA ló ń díwọ̀n ọkàn.

³Ṣíṣe ohun tí ó dára tí ó sì tọ̀nà ó ṣe ìtẹ́wọ́gbà sí OLÚWA ju ẹbọ lọ.

⁴Ojú tí ó gbéga àti ọkàn ìgbéraga, ìmọ́lẹ̀ àwọn ènìyàn búburú, ẹ̀ṣẹ̀ ni!

⁵Ètè àwọn olóye já sí èrè bí ìkánjú ṣe máa ń fa òsì kíákíá.

⁶Ìṣúra tí a kójọ nípaṣẹ̀ ahọ́n tí ń parọ́ jẹ́ ìrì lásán àti ìkẹkùn ikú.

⁷Ìwà ipá àwọn ènìyàn búburú yóò wọ́ wọn lọ, nítorí wọ́n kọ̀ láti ṣe ohun tí ó tọ́.

⁸Ọ̀nà ẹlẹ́ṣẹ̀ kún fún ìwà ẹ̀ṣẹ̀ ṣùgbọ́n iṣẹ́ onínú funfun jẹ́ títọ́.

⁹Ó sàn láti máa gbé ní kọ̀rọ̀ orí òrùlé ju láti ṣe àjọpín ilé pẹ̀lú aya oníjà.

¹⁰Ènìyàn búburú ń fẹ́ ibi aládùúgbò rẹ̀ kì í rí àánú kankan gbà lọ́dọ̀ rẹ̀.

¹¹Nígbà tí a bá ń fìyà jẹ ẹlẹ́gàn, òpè a máa kọ́gbọ́n.

¹²Olódodo ṣàkíyèsí ilé ènìyàn búburú ó sì mú ènìyàn búburú wá sí ìparun.

¹³Ẹnikẹ́ni tí ó bá ti di etí rẹ̀ sí igbe olùpọ́njú, òun tìkárarẹ̀ yóò ké pẹ̀lú; ṣùgbọ́n a kì yóò gbọ́.

¹⁴Ọ̀rẹ́ ìkọ̀kọ̀, mú ìbínú kúrò: àti owó-àbẹ̀tẹ́lẹ̀ láti ibi ìkọ̀kọ̀ wá, dẹ́kun ìbínú líle.

¹⁵Ayọ̀ ni fún olódodo láti ṣe ìdájọ́: ṣùgbọ́n ìparun ni fún àwọn oníṣẹ́ ẹ̀ṣẹ̀.

¹⁶Ẹni tí ó bá yà kúrò ní ọ̀nà òye, yóò máa gbé inú ìjọ àwọn òkú.

¹⁷Ẹni tí ó bá fẹ́ afẹ́, yóò di talákà: ẹni tí ó fẹ́ ọtí-wáìnì pẹ̀lú òróró kò le lọ́rọ̀.

¹⁸Ènìyàn búburú ni yóò ṣe owó-ìràpadà fún olódodo, àti olùrékọjá fún ẹni dídúró-ṣinṣin.

¹⁹Ó sàn láti jókòó ní ihà ju pẹ̀lú oníjà obìnrin àti òṣónú lọ.

²⁰Ìṣúra iyebíye àti òróró wà ní ibùgbé ọlọ́gbọ́n; ṣùgbọ́n ènìyàn aṣiwèrè (òmùgọ̀) jẹ ẹ́ run.

²¹Ẹni tí ó bá tẹ̀lé òdodo àti àánú yóò rí ìyè, òdodo, àti ọlá.

²²Ọlọ́gbọ́n gòkè odi ìlú àwọn alágbára, ó sì bi ibi-gíga agbára ìgbẹ́kẹ̀lé wọn ṣubú.

²³Ẹnikẹ́ni tí ó bá pa ẹnu àti ahọ́n rẹ̀ mọ́, ó pa ọkàn rẹ̀ mọ́ kúrò nínú ìyọnu.

²⁴Agbéraga àti alágídí ènìyàan ń gan orúkọ ara rẹ̀ nítorí ó ń hùwà nínú ìwà ìgbéraga rẹ̀, tí ń hùwà nínú àdábọwọ́ ìgbéraga.

²⁵Ẹlẹ́rìí èké yóò ṣègbé, àwọn tí ó gbọ́ ọ̀rọ̀ rẹ̀ yóò parun láé; nítorí tí ọwọ́ rẹ̀ kọ iṣẹ́ ṣíṣe.

²⁶Ó ń fi ìlara ṣojúkòkòrò ní gbogbo ọjọ́: ṣùgbọ́n olódodo a máa fi fún ni kì í sì í dáwọ́ dúró.

²⁷Ẹbọ ènìyàn búburú, ìríra ni: mélòómélòó ni nígbà tí ó mú un wá pẹ̀lú èrò ìwà-ibi?

²⁸Ẹlẹ́rìí èké yóò ṣègbé: ṣùgbọ́n ọ̀rọ̀ ẹni tí ó gbọ́, yóò dúró.

²⁹Ènìyàn búburú mú ojú ara rẹ̀ le: ṣùgbọ́n ẹni ìdúró-ṣinṣin ni ó ń mú ọ̀nà rẹ̀ tọ́.

³⁰Kò sí ọgbọ́n, kò sí ìmòye, tàbí ìmọ̀ràn tí ó le mókè níwájú OLÚWA.

³¹A ń múra ẹṣin sílẹ̀ de ọjọ́ ogun: ṣùgbọ́n ìṣẹ́gun jẹ́ ti OLÚWA.