Read Bíbélì Mímọ́ ní Èdè Yorùbá Òde-Òní Ìwé Òwe 24 Bible Online

Ìwé Òwe 24 - Bíbélì Mímọ́ ní Èdè Yorùbá Òde-Òní bible

Ìwé Òwe 24

¹Má ṣe ṣe ìlara àwọn ènìyàn búburú má ṣe jẹ́ kí àwùjọ wọn wù ọ́;

²Nítorí ọkàn wọn ń gbérò ohun búburú, ètè wọn sì ń sọ̀rọ̀ nípa dídá rúgúdù sílẹ̀.

³Nípa ọgbọ́n ni ilé di kíkọ́ nípa òye sì ni ó ti fìdí múlẹ̀;

⁴Nípa ìmọ̀ ni àwọn yàrá rẹ̀ kún pẹ̀lú àwọn ohun ọ̀ṣọ́ tí ó lẹ́wà tí ó sì ṣọ̀wọ́n.

⁵Ọlọ́gbọ́n ènìyàn ní agbára púpọ̀, ènìyàn tí ó ní ìmọ̀ sì ń ní agbára síi

⁶Láti jagun, ó nílò ìtọ́sọ́nà: nínú ìsẹ́gún ni ọ̀pọ̀ onígbìmọ̀.

⁷Ọgbọ́n ga ju fún aṣiwèrè àti gbọ̀ngàn ìlú níbi ibodè kò ní ohun tí yóò wí.

⁸Ẹni tí ń pète ibi ni a ó mọ̀ bí ènìyàn ibi.

⁹Ète òmùgọ̀ ènìyàn jẹ́ ẹ̀ṣẹ̀, àwọn ènìyàn sì kórìíra ẹlẹ́gàn.

¹⁰Bí ìwọ bá dákú lásìkò ìdààmú báwo ni agbára rẹ ha ti kéré tó!

¹¹Gba àwọn tí a ń wọ́ lọ síbi ikú là; fa àwọn tó ń ta gbọ̀n-ọ́n gbọ̀n-ọ́n lọ síbi ìparun padà.

¹²Bí ìwọ bá wí pé, “Ṣùgbọ́n a kò mọ nǹkankan nípa èyí,” ǹjẹ́ ẹni tí ń díwọ̀n ọkàn kò kíyèsíi? Ǹjẹ́ ẹni tí ń ṣọ́ ẹ̀mí rẹ kò mọ̀ ọ́? Ǹjẹ́ kò ní san án fún ẹnìkọ̀ọ̀kan gẹ́gẹ́ bí ohun tí ó ti ṣe?

¹³Jẹ oyin, ìwọ ọmọ mi, nítorí tí ó dára, oyin láti inú afárá oyin dùn lẹ́nu.

¹⁴Mọ̀ pẹ̀lú pé ọgbọ́n pẹ̀lú dùn fún ọkàn rẹ bí ìwọ bá rí i ìrètí ọjọ́ iwájú wà fún ọ ìrètí rẹ kì yóò sì já sófo.

¹⁵Má ṣe ba ní ibùba bí i arúfin dé ilé Olódodo, má ṣe kó ibùgbé è rẹ̀ lọ;

¹⁶Nítorí bí olódodo ènìyàn bá tilẹ̀ ṣubú ní ìgbà méje, yóò tún padà dìde ṣáá ni, ṣùgbọ́n ìdàámú yóò fa ènìyàn búburú lulẹ̀.

¹⁷Má ṣe yọ̀ nígbà tí ọ̀tá rẹ bá ṣubú; nígbà tí ó bá kọsẹ̀, má ṣe jẹ́ kí ọkàn rẹ kí ó yọ̀

¹⁸àìṣe bẹ́ẹ̀ OLÚWA yóò rí i yóò sì bínú yóò sì yí ìbínú rẹ̀ padà kúrò lọ́dọ̀ rẹ̀.

¹⁹Má ṣe fòyà nítorí àwọn ènìyàn ibi tàbí jowú àwọn ènìyàn búburú,

²⁰nítorí ẹni ibi kò ní ìrètí ọjọ́ iwájú a ó sì pa fìtílà àwọn ènìyàn búburú kú.

²¹Bẹ̀rù OLÚWA àti ọba, ọmọ mi, má sì ṣe dara pọ̀ pẹ̀lú àwọn olórí kunkun

²²nítorí àwọn méjèèjì yóò rán ìparun òjijì sórí wọn, ta ni ó sì mọ irú ìyọnu tí wọ́n lè mú wá?

²³Àwọn wọ̀nyí pẹ̀lú tún jẹ́ ọ̀rọ̀ Ọlọ́gbọ́n láti ṣe ojúṣàájú níbi ìdájọ́ kò dára rárá:

²⁴Ẹnikẹ́ni tí ó wí fún ẹlẹ́bi pé, “Ìwọ lo jàre” àwọn ènìyàn yóò ṣẹ́ èpè fún un àwọn orílẹ̀ èdè yóò sì kọ̀ ọ́.

²⁵Ṣùgbọ́n yóò dára fún àwọn tí ń dá ẹlẹ́bi lẹ́bi, ọ̀pọ̀ ìbùkún yóò sì wá sórí wọn.

²⁶Ìdáhùn òtítọ́ ó dàbí ìfẹnu-koni-ní-ẹnu.

²⁷Parí gbogbo iṣẹ́ ajé rẹ sì rí i pé oko rẹ ti ṣe dáradára; lẹ́yìn náà kọ́ ilé rẹ.

²⁸Má ṣe rojọ́ èké mọ́ aládúgbò rẹ láìnídìí, tàbí kí o fi ètè rẹ tannijẹ.

²⁹Má ṣe wí pé, “Mà á ṣe é fún un gẹ́gẹ́ bí ó ti ṣe fún mi; Èmi yóò san ohun tí ó ṣe fún mi padà fún un.”

³⁰Mo kọjá níbi oko ọ̀lẹ, mo kọjá níbi oko aláìgbọ́n ènìyàn;

³¹ẹ̀gún ti hù ní ibi gbogbo, koríko ti gba gbogbo oko náà

³²Mo fi ọkàn mi sí nǹkan tí mo kíyèsí mo sì kẹ́kọ̀ọ́ lára ohun tí mo rí;

³³oorun díẹ̀, òògbé díẹ̀, ìkáwọ́ gbera díẹ̀ láti sinmi

³⁴Òsì yóò sì dé bá ọ bí adigunjalè àti àìní bí olè.