Read Bíbélì Mímọ́ ní Èdè Yorùbá Òde-Òní Ìwé Òwe 25 Bible Online

Ìwé Òwe 25 - Bíbélì Mímọ́ ní Èdè Yorùbá Òde-Òní bible

Ìwé Òwe 25

¹Wọ̀nyí ni àwọn òwé mìíràn tí Sólómónì pa, tí àwọn ọkùnrin Hẹsikáyà ọba Júdà dà kọ.

²Ògo OLÚWA ní láti fi ọ̀rọ̀ kan pamọ́; láti rí ìdí ọ̀rọ̀ kan ni ògo àwọn ọba.

³Bí ọ̀run ṣe ga tó tí ayé sì jìn bẹ́ẹ̀ ni ó ṣòro láti mọ èrò ọkàn ọba.

⁴Mú ìdàrọ́ kúrò lára fàdákà ohun èlò yóò sì jáde fún alágbẹ̀dẹ fàdákà

⁵mú ènìyàn búburú kúrò níwájú ọba a ó sì fìdí ìtẹ́ rẹ múlẹ̀ nípaṣẹ̀ òdodo.

⁶Má ṣe gbé ara rẹ ga níwájú ọba, má sì ṣe jìjàdù ààyè láàrin àwọn ènìyàn pàtàkì

⁷Ó sàn kí ó wí fún ọ pé, “Gòkè wá síhìn ín” ju wí pé kí ó dójú tì ọ́ níwájú ènìyàn pàtàkì.

⁸Ohun tí o ti fi ojú ara rẹ rí má ṣe kánjú gbé e lọ sílé ẹjọ́ nítorí kí ni ìwọ yóò ṣe ní ìgbẹ̀yìn bí aládùúgbò rẹ bá dójú tì ọ́?

⁹Bí o bá ń ṣe àwíjàre rẹ níwájú aládùúgbò rẹ, má ṣe tú àsírí tí ẹlòmíràn ní lọ́dọ̀ rẹ,

¹⁰àìṣe bẹ́ẹ̀ ẹni tí ó gbọ́ ọ le dójú tì ọ́ orúkọ burúkú tí ìwọ bá sì gba kì yóò tán láéláé.

¹¹Ọ̀rọ̀ tí a sọ ní àkókò tí ó yẹ ó dàbí èṣo wúrà nínú àpẹẹrẹ fàdákà.

¹²Bí i yẹtí wúrà tàbí ohun ọ̀ṣọ́ ti wúrà dáradára ni ìbáwí ọlọ́gbọ́n fún etí tí ó bá fetísílẹ̀.

¹³Bí títutù òjò yìnyín ní àsíkò ìkórè ni ìránṣẹ́ tí ó jẹ́ olóòtọ́ sí àwọn tí ó rán an ó ń tu ọ̀gá rẹ̀ nínú.

¹⁴Bí ojú ṣíṣú àti afẹ́fẹ́ láì sí òjò ni ènìyàn tí ń yangàn nípa ẹ̀bùn tí kò fún ni.

¹⁵Nípa ṣùúrù a lè yí ọba lọ́kàn padà ahọ́n tí ń sọ̀rọ̀ rírọ̀ sí egungun.

¹⁶Bí ìwọ bá rí oyin, jẹ ẹ́ ní ìwọ̀nba bí o bá jẹ ẹ́ jù, ìwọ yóò sì bì í.

¹⁷Má ṣe máa lọ sí ilé aládùúgbò rẹ nígbà gbogbo tàbí kí ó máa lọ ṣíbẹ̀ lálọ jù, yóò sì kórìíra rẹ.

¹⁸Bí àdá, idà tàbí ọ̀kọ̀ tí ó mú ni ènìyàn tí ó jẹ́rìí èké lòdì sí aládùúgbò rẹ̀.

¹⁹Bí eyín tí ó bàjẹ́ tàbí ẹṣẹ̀ tí ó rọ ni ìgbẹ́kẹ̀lé lórí aláìṣòótọ́ ní àsìkò ìdàámú.

²⁰Bí ẹni tí ó bọ́ra kalẹ̀ ní ọjọ́ tí òtútù mú, tàbí iyọ̀ tí a fi ra ojú egbò ọgbẹ́ tàbí bí ọtí kíkan tí a dà sórí sódà ní ẹni tí ń kọ orin sí ọkàn tí ó bàjẹ́.

²¹ Bí ebi bá ń pa ọ̀tá rẹ, fún un ní oúnjẹ jẹ; bí òrùngbẹ bá ń gbẹ ẹ́, fún un ní omi mú.

²²Nípa ṣíṣe báyìí, ìwọ yóò wa ẹ̀yín iná lé e lórí OLÚWA yóò sì san ọẹ̀san rẹ̀ fún ọ.

²³Bí afẹ́fẹ́ gúṣù ti í mú òjò wá, bí ahọ́n tí ń sọ̀rọ̀ ẹ̀yìn ṣe ń mú ojú ìbínú wá.

²⁴Ó sàn láti gbé ní ibi igun kan lórí òrùlé ju láti bá aya oníjà gbé ilé pọ̀.

²⁵Bí omi tútù sí ẹni tí òrùngbẹ ń gbẹ ni ìròyìn ayọ̀ láti ọ̀nà jíjìn.

²⁶Bí ìsun tí ó di àbàtà tàbí kanga tí omi rẹ̀ bàjẹ́ ni olódodo tí ó fi àyè gba ènìyàn búburú.

²⁷Kò dára láti jẹ oyin àjẹjù, bẹ́ẹ̀ ni kò pọ́nni lé láti máa wá ọlá fún ara ẹni.

²⁸Bí ìlú tí odi rẹ̀ ti wó lulẹ̀ ni ènìyàn tí kò le kó ara rẹ̀ ní ìjánu.