Read Bíbélì Mímọ́ ní Èdè Yorùbá Òde-Òní Ìwé Òwe 3 Bible Online

Ìwé Òwe 3 - Bíbélì Mímọ́ ní Èdè Yorùbá Òde-Òní bible

Ìwé Òwe 3

¹Ọmọ mi, má ṣe gbàgbé ẹ̀kọ́ mi. Ṣùgbọ́n pa òfin mi mọ́ sí ọkàn rẹ.

²Nítorí wọn yóò fún ọ ní ọjọ́ gígùn fún ọ̀pọ̀lọpọ̀ ọdún kí ó sì mú ọ̀rọ̀ wá fún ọ.

³Má ṣe jẹ́ kí ìfẹ́ àti òtítọ́ ṣíṣe fi ọ́ sílẹ̀ láéláé so wọ́n mọ́ ọrùn rẹ, kọ wọ́n sí síléètì àyà rẹ.

⁴ Nígbà náà ni ìwọ yóò rí ojú rere àti orúkọ rere ní ojú Ọlọ́run àti lójú ènìyàn.

⁵Gbẹ́kẹ̀lé OLÚWA pẹ̀lú gbogbo ọkàn rẹ má ṣe sinmi lé òye ara à rẹ;

⁶Jẹ́wọ́ rẹ̀ ní gbogbo ọ̀nà rẹ yóò sì ṣe àkóso ọ̀nà rẹ.

⁷ Má ṣe jẹ́ ọlọ́gbọ́n lójú ara à rẹ bẹ̀rù OLÚWA kí o sì kórìíra ibi.

⁸Èyí yóò mú ìlera fún ara à rẹ àti okun fún àwọn egungun rẹ.

⁹Fi ọrọ̀ rẹ bọ̀wọ̀ fún OLÚWA, pẹ̀lú àkọ́so oko ò rẹ

¹⁰Nígbà náà ni àká rẹ yóò kún àkúnya àgbá rẹ yóò kún à kún wọ́ sílẹ̀ fún wáìnì tuntun.

¹¹ Ọmọ mi, má ṣe kẹ́gàn ìbáwí OLÚWA má si ṣe bínú nígbà tí ó bá ń bá ọ wí,

¹²Nítorí OLÚWA a máa bá àwọn tí ó fẹ́ràn wí bí baba ti í bá ọmọ tí ó bá nínú dídùn sí wí.

¹³Ìbùkún ni fún ẹni tí ó ní ìmọ̀, ẹni tí ó tún ní òye síi

¹⁴Nítorí ó ṣe èrè ju fàdákà lọ ó sì ní èrè lórí ju wúrà lọ.

¹⁵Ó ṣe iyebíye ju iyùn lọ; kò sí ohunkohun tí a lè fi wé e nínú ohun gbogbo tí ìwọ fẹ́.

¹⁶Ẹ̀mí gígùn ń bẹ ní ọwọ́ ọ̀tún rẹ̀; ní ọwọ́ òsì rẹ̀ sì ni ọrọ̀ àti ọlá.

¹⁷Àwọn ọ̀nà rẹ̀ jẹ́ ọ̀nà ìtura, òpópónà rẹ̀ sì jẹ́ ti àlàáfíà.

¹⁸Igi ìyè ni ó jẹ́ fún gbogbo ẹni tí ó bá gbàá; àwọn tí ó bá sì dìí mú yóò rí ìbùkún gbà.

¹⁹Nípa ọgbọ́n, OLÚWA fi ìpìlẹ̀ ilẹ̀ ayé sọlẹ̀; nípa òye, ó fi àwọn ọ̀run sí ipòo wọn;

²⁰Nípa ìmọ̀ rẹ̀ ó pín ibú omi ní ìyà, àwọ̀sánmọ̀ sì ń sẹ ìrì.

²¹Ọmọ mi pa ìdájọ́ tí ó yè kooro mọ́ àti ìmọ̀yàtọ̀, má jẹ́ kí wọn lọ kúrò ní ibi tí ojú rẹ ti le tó wọn

²²wọn yóò jẹ́ ìyè fún ọ àti ẹ̀ṣọ́ fún ọrùn rẹ

²³Nígbà náà ni ìwọ yóò bá ọ̀nà rẹ lọ ní àìṣéwu, ìwọ kì yóò sì kọsẹ̀;

²⁴Nígbà tí ìwọ bá dùbúlẹ̀, ìwọ kì yóò bẹ̀rù nígbà tí ìwọ bá dùbúlẹ̀, oorun rẹ yóò jẹ́ oorun ayọ̀

²⁵má ṣe bẹ̀rù ìdàámú òjijì tàbí ti ìparun tí ó ń dé bá àwọn ènìyàn búburú

²⁶Nítorí OLÚWA yóò jẹ́ ìgbẹ́kẹ̀lé rẹ kì yóò sì jẹ́ kí ẹsẹ̀ rẹ bọ́ sínú pàkúté.

²⁷Má ṣe fa ọwọ́ ire sẹ́yìn kúrò lọ́dọ̀ àwọn tí ó tọ́ sí, nígbà tí ó bá wà ní ìkápá rẹ láti ṣe ohun kan.

²⁸Má ṣe wí fún aládùúgbò rẹ pé, “Padà wá nígbà tó ṣe díẹ̀; ó fún ọ lọ́lá” nígbà tí o ní i pẹ̀lú rẹ nísinsin yìí.

²⁹Má ṣe pète ohun búburú fún aládùúgbò rẹ, ti o gbé nítòsí rẹ, tí ó sì fọkàn tán ọ.

³⁰Má ṣe fẹ̀ṣùn kan ènìyàn láì-ní-ìdí nígbà tí kò ṣe ọ́ ní ibi kankan rárá.

³¹Má ṣe ṣe ìlara ènìyàn jàgídíjàgan tàbí kí o yàn láti rìn ní ọ̀nà rẹ̀,

³²Nítorí OLÚWA kórìíra ènìyàn aláyìídáyidà ṣùgbọ́n a máa fọkàn tán ẹni dídúró ṣinṣin.

³³Ègún OLÚWA ń bẹ lórí ilé ènìyàn búburú, ṣùgbọ́n ó bùkún fún ilé olódodo

³⁴ Ó fi àwọn oníyẹ̀yẹ́ ṣe yẹ̀yẹ́ Ṣùgbọ́n ó fi oore ọ̀fẹ́ fún onírẹ̀lẹ̀

³⁵ọlọ́gbọ́n jogún iyì Ṣùgbọ́n àwọn aláìgbọ́n ni ó dójú tì.