Read Bíbélì Mímọ́ ní Èdè Yorùbá Òde-Òní Ìwé Òwe 5 Bible Online

Ìwé Òwe 5 - Bíbélì Mímọ́ ní Èdè Yorùbá Òde-Òní bible

Ìwé Òwe 5

¹Ọmọ mi, fiyè sí ọgbọ́n ọ̀n mi tẹ́tí sílẹ̀ dáradára sí ọ̀rọ̀ àròjinlẹ̀ mi

²kí ìwọ sì lè ní ìṣọ́ra kí ètè rẹ sì le pa ìmọ̀ mọ́.

³Nítorí ètè alágbèrè aṣẹ́wó obìnrin a máa ṣun oyin, ọ̀rọ̀ rẹ̀ sì kúnná ju òróró lọ

⁴ṣùgbọ́n ní ìgbẹ̀yìngbẹ́yín, ó korò ju òróòro lọ ó mú bí idà olójú méjì.

⁵Ẹsẹ̀ rẹ̀ lọ sí ọ̀nà ikú ìgbéṣẹ̀ rẹ̀ lọ tààrà sí ibojì òkú.

⁶Kò tilẹ̀ ronú nípa ọ̀nà ìyè ọ̀nà rẹ̀ rí pálapàla, ṣùgbọ́n kò tilẹ̀ mọ́.

⁷Nítorí náà, ẹ̀yin ọmọ tẹ́tí sí mi má ṣe yàgò kúrò nínú àwọn nǹkan tí mo sọ

⁸Rìn ní ọ̀nà tí ó jìnnà síi dáadáa má ṣe súnmọ́ ẹnu ọ̀nà ilé rẹ̀

⁹àìṣe bẹ́ẹ̀ ìwọ yóò gbé gbogbo agbára rẹ lé ẹlòmíràn lọ́wọ́ àti ọjọ́ ayé rẹ fún ìkà ènìyàn

¹⁰kí àwọn àjòjì ó má baà fi ọrọ̀ rẹ ṣara rindin kí làálàá rẹ sì sọ ilé ẹlòmíràn di ọlọ́rọ̀.

¹¹Ní ìgbẹ̀yìn ayé rẹ ìwọ yóò kérora, nígbà tí agbára rẹ àti ara rẹ bá ti joro tán

¹²Ìwọ yóò wí pé, “Mo ti kórìíra ẹ̀kọ́ tó! Ọkàn mi ṣe wá kóòríra ìbáwí!

¹³N kò gbọ́ràn sí àwọn olùkọ́ mi lẹ́nu, tàbí kí n fetí sí àwọn tí ń kọ́ mi lẹ́kọ̀ọ́.

¹⁴Mo ti bẹ̀rẹ̀ ìparun pátapáta ní àárin gbogbo àwùjọ ènìyàn.”

¹⁵Mu omi láti inú un kànga tìrẹ Omi tí ń ṣàn láti inú kànga rẹ.

¹⁶Ó ha yẹ kí omi ìṣun rẹ kún àkúnya sí ojú ọ̀nà àti odò tí ń sàn lọ sí àárin ọjà?

¹⁷Jẹ́ kí wọn jẹ́ tìrẹ nìkan, má ṣe ṣe àjọpín wọn pẹ̀lú àjòjì láéláé.

¹⁸Ǹjẹ́, kí oríṣun rẹ di àbùkù fún; kí ó sì yọ nínú aya ìgbà èwe rẹ.

¹⁹Abo àgbọ̀nrín tó dára, ìgalà tí ó wu ni jọjọ Jẹ́ kí ọmú rẹ̀ tẹ́ ọ lọ́rùn nígbà gbogbo jẹ́ kí ìfẹ́ rẹ̀ máa fà ọ́ títí láéláé

²⁰Ọmọ mi, èéṣe tí ìfẹ́ aṣẹ́wó fi ń fà ọ́ tí ìwọ sì ń dì mọ́ ìyàwó ẹlòmíràn?

²¹Nítorí ọ̀nà ènìyàn kò farasin rárá fún OLÚWA Ó sì ń gbé gbogbo ọ̀nà rẹ̀ yẹ̀wò

²²Ìwà búburú ènìyàn búburú ni yóò mú kó bọ́ sínú okùn; okùn ẹ̀ṣẹ̀ ẹ rẹ̀ dì í le kankan

²³Yóò kú nítorí àìgba ẹ̀kọ́ ìwà òmùgọ̀ ara rẹ̀ ló mú kó ṣáko lọ.