Read Bíbélì Mímọ́ ní Èdè Yorùbá Òde-Òní Ìwé Òwe 6 Bible Online

Ìwé Òwe 6 - Bíbélì Mímọ́ ní Èdè Yorùbá Òde-Òní bible

Ìwé Òwe 6

¹Ọmọ mi, bí ìwọ bá ṣe oníduúró fún aládùúgbò rẹ bí ìwọ bá ti bọwọ́ ní ìlérí májẹ̀mu pẹ̀lú ẹlòmíràn

²Bí a bá ti fi ọ̀rọ̀ tí ó sọ dẹkùn mú ọ, tí ọ̀rọ̀ ẹnu rẹ ti kó ọ sí pàkúté,

³Nígbà náà, ṣe èyí, ìwọ ọmọ mi, láti gba ara rẹ níwọ̀n bí o ti kó sọ́wọ́ aládùúgbò rẹ: lọ kí o sì rẹ ara rẹ sílẹ̀; bẹ aládùúgbò rẹ dáadáa

⁴Má ṣe jẹ́ kí oorun kí ó kùn ọ́, tàbí kí o tilẹ̀ tòògbé rárá.

⁵Gba ara rẹ sílẹ̀, bí abo àgbọ̀nrín kúrò lọ́wọ́ ọdẹ, bí ẹyẹ kúrò nínú okùn àwọn pẹyẹpẹyẹ.

⁶Tọ èèrùn lọ, ìwọ ọ̀lẹ kíyèsí ìṣe rẹ̀, kí o sì gbọ́n!

⁷Kò ní olùdarí, kò sí alábojútó tàbí ọba,

⁸síbẹ̀, a kó ìpèsè rẹ̀ jọ ní àsìkò òjò yóò sì kó oúnjẹ rẹ̀ jọ ní àsìkò ìkórè.

⁹Yóò ti pẹ́ tó tí ìwọ yóò dùbúlẹ̀, ìwọ ọ̀lẹ? Nígbà wo ni ìwọ yóò jí kúrò lójú oorun rẹ?

¹⁰Oorun díẹ̀, Òògbé díẹ̀, ìkáwọ́gbera láti sinmi díẹ̀

¹¹Òsì yóò sì wá sórí rẹ bí ìgárá ọlọ́ṣà àti àìní bí adigunjalè.

¹²Ènìyàn kénìyàn àti ènìyàn búburú, tí ń ru ẹnu àrékérekè káàkiri,

¹³tí ó ń sẹ́jú pàkòpàkò, ó ń fi ẹsẹ̀ ṣe àmì ó sì ń fi ìka ọwọ́ rẹ̀ júwe,

¹⁴tí ó ń pète búburú pẹ̀lú ẹ̀tàn nínú ọkàn rẹ̀ ìgbà gbogbo ni ó máa ń dá ìjà sílẹ̀.

¹⁵Nítorí náà ìdààmú yóò dé báa ní ìsẹ́jú akàn; yóò parun lójijì láì sí àtúnṣe.

¹⁶Àwọn ohun mẹ́fà wà tí OLÚWA kórìíra, ohun méje ní ó jẹ́ ìríra síi:

¹⁷Ojú ìgbéraga, Ahọ́n tó ń parọ́ ọwọ́ tí ń ta ẹ̀jẹ̀ aláìṣẹ̀ sílẹ̀,

¹⁸ọkàn tí ń pète ohun búburú, ẹsẹ̀ tí ó yára láti sáré sínú ìwà ìkà,

¹⁹Ajẹ́rìí èké tí ń tú irọ́ jáde lẹ́nu àti ènìyàn tí ń dá ìjà sílẹ̀ láàrin àwọn ọmọ ìyá kan.

²⁰Ọmọ mi, pa àṣẹ baba rẹ mọ́ má sì ṣe kọ ẹ̀kọ́ ìyá rẹ sílẹ̀.

²¹Jẹ́ kí wọn wà nínú ọkàn rẹ láéláé so wọ́n mọ́ ọrùn rẹ

²²Nígbà tí ìwọ bá ń rìn, wọn yóò ṣe amọ̀nà rẹ; nígbà tí ìwọ bá sùn, wọn yóò máa ṣe olùsọ́ rẹ; nígbà tí o bá jí, wọn yóò bá ọ sọ̀rọ̀.

²³Nítorí àwọn àṣẹ yìí jẹ́ àtùpà, ẹ̀kọ́ yìí jẹ́ ìmọ́lẹ̀, àti ìtọ́niṣọ́nà ti ìbáwí ni ọ̀nà sí ìyè

²⁴yóò pa ọ́ mọ́ kúrò lọ́dọ̀ obìnrin oníṣekúṣe kúrò lọ́wọ́ ẹnu dídùn aya tí ń rin ìrìnkurìn

²⁵Má ṣe ṣe ìfẹ́kúfẹ̀ẹ́ síi nínú ọkàn rẹ nítorí ẹwà rẹ tàbí kí o jẹ́ kí ó fi ojú rẹ̀ fà ọ́ mọ́ra,

²⁶nítorí Aṣẹ́wó yóò sọ ọ́ di àkàrà lásánlàsàn ẹ̀mí rẹ gan an sì ni alágbérè ń dọdẹ.

²⁷Ǹjẹ́ ènìyàn ha le è gbé iná lé orí itan kí aṣọ rẹ̀ sì má jòó?

²⁸Ǹjẹ́ ènìyàn le è máa rìn lórí iná? Kí ẹṣẹ̀ rẹ̀ sì má jóná?

²⁹Bẹ́ẹ̀ ni ẹni tí ń lọ sùn pẹ̀lú aya aláya; kò sí ẹni tí ó fọwọ́ kàn án tí yóò lọ láì jìyà.

³⁰Àwọn ènìyàn kì í kẹ́gàn olè tí ó bá jalè nítorí àti jẹun nígbà tí ebi bá ń pa á.

³¹Ṣíbẹ̀ bí ọwọ́ bá tẹ̀ẹ́, ó gbọdọ̀ san ìlọ́po méje bí ó tilẹ̀ kó gbogbo ohun tó ní nílé tà.

³²Ṣùgbọ́n ẹni tí ń ṣe àgbérè kò nírònú; ẹnikẹ́ni tí ó bá ń ṣe bẹ́ẹ̀ ó ń pa ara rẹ̀ run ni

³³Ìfarapa àti ìtìjú ni tirẹ̀, ẹ̀gàn rẹ̀ kì yóò sì kúrò láéláé;

³⁴nítorí owú yóò ru ìbínú ọkọ sókè, kì yóò sì ṣàánú nígbà tí ó bá ń gbẹ̀san.

³⁵Kò ní gba nǹkankan bí ohun ìtanràn; yóò kọ àbẹ̀tẹ́lẹ̀, bí ó ti wù kí ó pọ̀ tó.