Read Bíbélì Mímọ́ ní Èdè Yorùbá Òde-Òní Ìwé Òwe 7 Bible Online

Ìwé Òwe 7 - Bíbélì Mímọ́ ní Èdè Yorùbá Òde-Òní bible

Ìwé Òwe 7

¹Ọmọ mi, pa ọ̀rọ̀ mi mọ́, sì fi àwọn òfin mi pamọ́ sínú ọkàn rẹ.

²Pa òfin mi mọ́, ìwọ yóò sì yè tọ́jú ẹ̀kọ́ mi bí ẹyinlójú rẹ

³Kọ wọ́n sí ọwọ́ òsì rẹ, má ṣe fi jẹun kọ wọ́n sí inú ọkàn rẹ.

⁴Wí fún ọgbọ́n pé, “Ìwọ ni arábìnrin mi,” sì pe òye ní ìbátan rẹ;

⁵wọn yóò pa ó mọ́ kúrò lọ́wọ́ obìnrin alágbèrè, kúrò lọ́wọ́ ìyàwó onírìnkurìn àti ọ̀rọ̀ ìtànjẹ rẹ̀.

⁶Ní ojú fèrèsé ilé è mi mo wo ìta láti ojú ù fèrèsé.

⁷Mo rí i láàrin àwọn aláìmọ́kan mo sì kíyèsí láàrin àwọn ọ̀dọ́kùnrin, ọ̀dọ́ kan tí ó ṣe aláìgbọ́n.

⁸Ó ń lọ ní pópónà ní tòsí i ilé alágbérè obìnrin náà, ó ń rìn lọ sí ọ̀nà ilé e rẹ̀

⁹ní ìrọ̀lẹ́ bí oòrùn ṣe ń wọ̀, bí òkùnkùn ṣẹ ń bo ni lára.

¹⁰Bẹ́ẹ̀ ni obìnrin kan jáde wá láti pàdé rẹ̀, ó múra bí aṣẹ́wó pẹ̀lú ètè búburú.

¹¹(Ó jẹ́ aláriwo àti alágídí, ìdí rẹ̀ kì í jókòó nílé;

¹²bí ó ti ń já níhìn ín ní ó ń já lọ́hùn ún gbogbo orígun ni ó ti ń ba ní ibùba.)

¹³Ó dìí mú, ó sì fẹnu kò ó ní ẹnu pẹ̀lú ojú dídín ó wí pé:

¹⁴“Mo ní ọrẹ àlàáfíà ní ilé; lónìí ni mo san ẹ̀jẹ́ mi.

¹⁵Nítorí náà ni mo ṣe jáde wá pádé è rẹ; mo wá ọ káàkiri mo sì ti rí ọ!

¹⁶Mo ti tẹ́ ibùṣùn mi pẹ̀lú aṣọ aláràbarà láti ilẹ̀ Éjíbítì.

¹⁷Mo ti fi nǹkan Olóòórùn dídùn sí ibùṣùn mi bí i míra, álóè àti kínámónì.

¹⁸Wá, jẹ́ kí a lo ìfẹ́ papọ̀ ní kíkún títí di àárọ̀; jẹ́ kí a gbádùn ara wa pẹ̀lú ìfẹ́!

¹⁹Ọkọ ọ̀ mi ò sí nílé; ó ti lọ sí ìrìnàjò jínjìn.

²⁰Ó mú owó púpọ̀ lọ́wọ́ kò sì ní darí dé kí ó tó di ọ̀sán.”

²¹Pẹ̀lú ọ̀rọ̀ dídùn ó sì í lọ́nà; ó tàn án jẹ pẹ̀lú ẹnu dídùn.

²²Kíákíá ni ó tẹ̀lé e bí i màlúù tí ń lọ sí odò ẹran bí àgbọ̀nrín tí ó fẹ́ kẹsẹ̀ bọ pàkúté

²³títí tí ọ̀kọ̀ fi gún un ní ẹ̀dọ̀, bí ẹyẹ ṣe ń fẹ́ wọ inú okùn, Láì mọ̀ pé yóò gba ẹ̀mí òun.

²⁴Nítorí náà báyìí ẹ̀yin ọmọ mi, tẹ́tí sí mi fọkàn sí nǹkan tí mo sọ.

²⁵Má ṣe jẹ́ kí ọkàn rẹ kí ó yà sí ọ̀nà rẹ̀, tàbí kí ó rìn lọ sí ipa ọ̀nà rẹ̀.

²⁶Ọ̀pọ̀lọpọ̀ ni àwọn tí ó ti fà lulẹ̀ Ogunlọ́gọ̀ àwọn alágbára ni ó ti pa.

²⁷Ilé e rẹ̀ ni ọ̀nà tààra sí iṣà òkú, tí ó lọ tààra sí àgbàlá ikú.