Read Bíbélì Mímọ́ ní Èdè Yorùbá Òde-Òní Ìwé Oníwàásù 1 Bible Online

Ìwé Oníwàásù 1 - Bíbélì Mímọ́ ní Èdè Yorùbá Òde-Òní bible

Ìwé Oníwàásù 1

¹Ọ̀rọ̀ Oníwàásù, ọmọ Dáfídì, ọba Jérúsálẹ́mù:

²“Aṣán! Aṣán!” ni oníwàásù wí pé “Aṣán pátapáta! Gbogbo rẹ̀ aṣán ni”

³Kí ni ènìyàn rí jẹ ní èrè lórí gbogbo iṣẹ́ rẹ̀ lórí èyí tí ó ń ṣe wàhálà sí lábẹ́ oòrùn?

⁴Bí ìran kan ti wá ni ìran mìíràn ń kọjá lọ, síbẹ̀ ayé dúró títí láé.

⁵Oòrùn ń ràn, oòrùn sì ń wọ̀, ó sì sáré padà síbi tí ó tí yọ.

⁶Afẹ́fẹ́ ń fẹ́ lọ sí ihá gúṣù, Ó sì ń fẹ́ yípo sí ìhà àríwá, a sì tún padà sí ọ̀nà rẹ̀.

⁷Gbogbo odò ń sàn sí inú òkun síbẹ̀síbẹ̀ òkun kò kún. níbi tí àwọn odò ti wá, níbẹ̀ ni wọ́n tún padà sí

⁸Ohun gbogbo ni ó ń mú àárẹ̀ wá, ju èyí tí ẹnu le è ṣọ ojú kò tí ì rí ìrírí tí ó tẹ́ẹ lọ́rùn, bẹ́ẹ̀ ni, etí kò tí ì kún fún gbígbọ́.

⁹Ohun tí ó ti wà tẹ́lẹ̀ náà ni yóò sì máa wà, ohun tí a ti ṣe sẹ́yìn òun ni a ó tún máa ṣe padà kò sí ohun tuntun lábẹ́ oòrùn.

¹⁰Ǹjẹ́ ohun kan wà tí ẹnìkan le è ṣọ wí pé, “Wòó! Ohun tuntun ni èyí”? Ó ti wà tẹ́lẹ̀ rí ní ọjọ́ tó ti pẹ́ Ó ti wà ṣáájú tiwa.

¹¹Kò sí ìrántí ohun ìṣáájú bẹ́ẹ̀ ni ìrantí kì yóò sí fún ohun ìkẹyìn tí ń bọ̀ lọ́dọ̀ àwọn tí ń bọ̀ ní ìgbà ìkẹyìn.

¹²Èmi, Oníwàásù ti jẹ ọba lórí Ísírẹ́lì ní Jérúsálẹ́mù rí.

¹³Mo fi àsìkò mi sílẹ̀ láti kọ́ àti láti ṣe àwárí pẹ̀lú ọgbọ́n, gbogbo ohun tí ó ń ṣẹlẹ̀ lábẹ́ ọ̀run. Háà ẹrù wúwo tí Ọlọ́run ti gbé lé àwọn ènìyàn:

¹⁴Èmi ti rí ohun gbogbo tí ó ń ṣẹlẹ̀ lábẹ́ oòrùn, gbogbo rẹ̀ kò ní ìtumọ̀ bí ẹní gbìyànjú àti mú afẹ́fẹ́ ni.

¹⁵Ohun tí ó ti wọ́ kò le è ṣe é tọ́ mọ́, ohun tí kò sí kò le è ṣe é kà.

¹⁶Mo rò nínú ara mi, “Wòó, mo ti dàgbà, ọgbọ́n mi sì ti pọ̀ ju ti ẹnikẹ́ni tí ó ti ṣe alákòóṣo Jérúsálẹ́mù síwájú mi lọ, mo ti ní ìrírí púpọ̀ nípa ọgbọ́n àti ìmọ̀.”

¹⁷Nígbà náà ni mo fi ara jìn láti ní ìmọ̀ nípa ọgbọ́n, àti pàápàá àìgbọ́n àti àgọ̀, ṣùgbọ́n mo rí, wí pé èyí pẹ̀lú bí ẹni ń gbìyànjú àti mú afẹ́fẹ́ ni.

¹⁸Nítorí pé ọgbọ́n púpọ̀ ìbànújẹ́ púpọ̀ ní ń mú wá, bí ìmọ̀ bá sì ṣe pọ̀ tó náà ni ìbànújẹ́ ń pọ̀ tó.