Read Bíbélì Mímọ́ ní Èdè Yorùbá Òde-Òní Ìwé Oníwàásù 10 Bible Online

Ìwé Oníwàásù 10 - Bíbélì Mímọ́ ní Èdè Yorùbá Òde-Òní bible

Ìwé Oníwàásù 10

¹Gẹ́gẹ́ bí òkú eṣinṣin tí ń fún ìpara ní òórùn burúkú, bẹ́ẹ̀ náà ni òmùgọ̀ díẹ̀ ṣe ń bo ọgbọ́n àti ọlá mọ́lẹ̀.

²Ọkàn ọlọgbọ́n a máa sí sí ohun tí ó tọ̀nà, ṣùgbọ́n ọkàn òmùgọ̀ sí ohun tí kò dára.

³Kó dà bí ó ti ṣe ń rìn láàrin ọ̀nà, òmùgọ̀ kò ní ọgbọ́n a sì máa fi han gbogbo ènìyàn bí ó ti gọ̀ tó.

⁴Bí ìbínú alákòóso bá dìde lòdì sí ọ, ma ṣe fi àyè rẹ sílẹ̀; ìdákẹ́jẹ́jẹ́ le è tu àṣìṣe ńlá.

⁵Ohun ibi kan wà tí mo ti rí lábẹ́ oòrùn, irú àṣìṣe tí ó dìde láti ọ̀dọ̀ alákòóso.

⁶A gbé aṣiwèrè sí ọ̀pọ̀ ipò tí ó ga jù lọ, nígbà tí ọlọ́rọ̀ gba àwọn àyè tí ó kéré jù lọ.

⁷Mo ti rí ẹrú lórí ẹṣin, nígbà tí ọmọ aládé ń fi ẹṣẹ̀ rìn bí ẹrú.

⁸Ẹnikẹ́ni tí ó bá gbẹ́ kòtò, ó le è ṣubú sínú rẹ̀; ẹnikẹ́ni tí ó bá la inú ògiri, ejò le è ṣán-an.

⁹Ẹnikẹ́ni tí ó bá pe òkúta lẹ́jọ́ le è ní ìpalára láti ipasẹ̀ wọn; ẹnikẹ́ni tí ó bá la ìtì-igi le è ní ìpalára láti ipasẹ̀ wọn.

¹⁰Bí àáké bá kú tí ẹ̀gbẹ́ rẹ̀ kò sì sí ní pípọ́n yóò nílò agbára púpọ̀ ṣùgbọ́n ọgbọ́n orí ni yóò mú àṣeyọrí wá.

¹¹Bí ejò bá sán ni kí a tó lo oògùn rẹ̀, kò sí èrè kankan fún olóògùn rẹ̀.

¹²Ọ̀rọ̀ tí ó wá láti ẹnu ọlọ́gbọ́n a máa ní oore-ọ̀fẹ́ ṣùgbọ́n ètè òmùgọ̀ fúnrarẹ̀ ni yóò parun.

¹³Ìbẹ̀rẹ̀ ọ̀rọ̀ rẹ̀ jẹ́ òmùgọ̀; ìparí rẹ̀ sì jẹ́ ìṣínwín búburú.

¹⁴Wèrè a sì máa ṣàfikún ọ̀rọ̀ kò sí ẹni tí ó mọ ohun tí ó ń bọ̀ ta ni ó le è ṣọ fún-un ohun tí yóò ṣẹlẹ̀ lẹ́yìn rẹ̀?

¹⁵Iṣẹ́ aṣiwèrè a máa dá lágbara kò sì mọ ojú ọ̀nà sí ìgboro.

¹⁶Ègbé ni fún ọ, ìwọ ilẹ̀ tí ọba ń ṣe ìranṣẹ́ rẹ̀ àti tí àwọn ọmọ aládé ń ṣe àsè ní òwúrọ̀.

¹⁷Ìbùkún ni fún ọ, ìwọ ilẹ̀ èyí tí ọba rẹ̀ jẹ́ ọmọ ọlọ́lá, àti tí àwọn ọmọ aládé ń jẹun ní àsìkò tí ó yẹ, fún ìlera, tí kì í ṣe fún ìmọ̀tí para.

¹⁸Bí ènìyàn bá ń lọ́ra, ilé a máa wú, bí ọwọ́ rẹ̀ bá ń ṣe ọ̀lẹ, ilé a máa jó.

¹⁹Ẹ̀rín rínrín ni a ṣe àṣè fún, wáìnì a máa mú ayé dùn, ṣùgbọ́n owó ni ìdáhùn sí ohun—gbogbo.

²⁰Ma ṣe bú ọba, kódà nínú èrò rẹ, tàbí kí o ṣépè fún ọlọ́rọ̀ ní ibi ìbùsùn rẹ, nítorí pé ẹyẹ ojú—ọ̀run le è gbé ọ̀rọ̀ rẹ ẹyẹ tí ó sì ní ìyẹ́ apá le è fi ẹjọ́ ohun tí o sọ sùn.