Read Bíbélì Mímọ́ ní Èdè Yorùbá Òde-Òní Ìwé Orin Sólómónì 1 Bible Online

Ìwé Orin Sólómónì 1 - Bíbélì Mímọ́ ní Èdè Yorùbá Òde-Òní bible

Ìwé Orin Sólómónì 1

¹Orin àwọn orin tí i ṣe orin Sólómónì

²Fi ìfẹnukonu ìfẹ́ kò mí ní ẹnu, nítorí ìfẹ́ rẹ dára ju ọtí wáìnì lọ.

³Òórùn ìkunra rẹ fanimọ́ra. Orúkọ rẹ rí bí ìkunra tí a tú jáde Abájọ tí àwọn wúndíá fi fẹ́ ọ.

⁴Fà mí lọ pẹ̀lú rẹ, kí a lọ kíákíá Ọba ti mú mi wá sínú yàrá rẹ̀. Àwa yọ̀ inú wa sì dùn sí ọ; a gbé ìfẹ́ rẹ ga ju ọtí wáìnì lọ. Wọ́n fẹ́ ọ nítòótọ́!

⁵Èmi dúdú mo sì ní ẹwà. Ẹ̀yin ọmọbìnrin Jérúsálẹ́mù, Dúdú bí àgọ́ Kédárì Bí àgọ́ aṣọ kọ́tìnnì ti Sólómónì

⁶Má ṣe wò mí nítorí wí pé mo dúdú Nítorí òòrùn mú mi dúdú Ọmọkùnrin ìyá mi bínú sími Ó sì fi mí ṣe olùtọ́jú ọgbà àjàrà. Ọgbà àjàrà tèmi ni èmi kò tọ́jú

⁷Ṣọ fún mi ìwọ ẹni tí ọkàn mí fẹ́, Níbo ni ìwọ ń da agbo ẹran lọ. Níbi tí ìwọ mú agbo ẹran rẹ sinmi ní ọ̀sán. Kí ni ìdí tí èmi yóò fi jẹ́ obìnrin aṣán Ní ẹ̀bá agbo ẹran àwọn ọ̀rẹ́ rẹ.

⁸Bí ìwọ kò bá mọ̀, Ìwọ arẹwà jùlọ nínú àwọn obìnrin. Bá ọ̀nà ti agbo ẹran rìn lọ. Kí o sì bọ́ àwọn ọmọ ewúrẹ́ rẹ. Ní ẹ̀bá àgọ́ àwọn olùsọ́ àgùntàn.

⁹Olùfẹ́ mi, Mo fi ọ́ wé ẹṣin mi nínú kẹ̀kẹ́ Fáráò.

¹⁰Ẹ̀rẹ̀kẹ́ rẹ dára ní ohun ọ̀ṣọ́, Ọrùn rẹ sì yẹ ọ̀ṣọ́ ìlẹ̀kẹ̀

¹¹A ó fi wúrà ṣe òrùka etí fún ọ, A ó fi fàdákà ṣe ìlẹ̀kẹ̀.

¹²Nígbà tí ọba wà ní orí ìjókòó rẹ̀. Òróró ìkunra mi tú òórùn jáde.

¹³Ìdì òjíá ni olùfẹ́ mi jẹ sí mi. Òun ó sinmi lé àárin ọmú mi.

¹⁴Bí ìdì ìtàná Hénínà ni Olùfẹ́ mi rí sí mi Láti inú ọgbà àjàrà ti Énígédì.

¹⁵Báwo ni o ti lẹ́wà tó, olùfẹ́ mi! Áá à, Báwo ni o ṣe lẹ́wà tó! Ìwọ ní ojú ẹyẹlé.

¹⁶Báwo ni o ṣe dára tó, olùfẹ́ mi! Áá à, Báwo ni o ṣe wu ni! Ibùsùn wa ní ìtura.

¹⁷Ìtànsán ilé wa jẹ́ ti igi kédárì Ẹkẹ́ ilé wa jẹ́ ti igi Fírì.