Read Bíbélì Mímọ́ ní Èdè Yorùbá Òde-Òní Ìwé Orin Sólómónì 4 Bible Online

Ìwé Orin Sólómónì 4 - Bíbélì Mímọ́ ní Èdè Yorùbá Òde-Òní bible

Ìwé Orin Sólómónì 4

¹Báwo ni ìwọ ti lẹ́wà tó olùfẹ́ mi! Áá à ìwọ jẹ́ arẹwà. Ìwọ ní ojú àdàbà lábẹ́ ìbòjú rẹ Irun rẹ bò ọ́ lójú bí ọ̀wọ́ ewúrẹ́. Tí ó sọ̀ kalẹ̀ lórí òkè Gílíádì.

²Ẹyín rẹ̀ funfun bí i irun àgbò tí ó gòkè wá láti ibi ìwẹ̀; olúkúlùkù wọn bí èjìrẹ́; kò sí ọ̀kan nínú wọn tí ó yàgàn.

³Ètè rẹ dàbí òwú òdòdó; Ẹnu rẹ̀ dùn. Èrẹ̀kẹ́ rẹ dàbí ẹ̀là pàmógíránéètì lábẹ́ ìbòjú rẹ

⁴Ọrùn rẹ dàbí ilé ìṣọ́ Dáfídì, tí a kọ́ pẹ̀lú ìhámọ́ra; lórí rẹ̀ ni a fi ẹgbẹ̀rún àpáta kọ́, gbogbo wọn jẹ́ àṣà àwọn alágbára.

⁵Ọmú rẹ méjèèjì dàbí ọmọ ẹgbin méjì tí wọ́n jẹ́ ìbejì tí ń jẹ láàrin ìtànná lílì.

⁶Títí ọjọ́ yóò fi rọ̀ tí òjìji yóò fi fò lọ, Èmi yóò lọ sí orí òkè ńlá òjíá àti sí òkè kékeré tùràrí.

⁷Gbogbo ara rẹ jẹ́ kìkì ẹwa, olùfẹ́ mi; kò sì sí àbàwọ́n lára rẹ.

⁸Kí a lọ kúrò ní Lẹ́bánónì, ìyàwó mi, ki a lọ kúrò ní Lẹ́bánónì. Àwa wò láti orí òkè Ámánà, láti orí òkè ti Ṣénírì, àti téńté Hérímónì, láti ibi ihò àwọn kìnnìún, láti orí òkè ńlá àwọn ẹkùn.

⁹Ìwọ ti gba ọkàn mi, arábìnrin mi, ìyàwó mi; Ìwọ ti gba ọkàn mi pẹ̀lú ìwò ẹ̀ẹ̀kan ojú rẹ, pẹ̀lú ọ̀kan nínú ìlẹ̀kẹ̀ ọrùn rẹ,

¹⁰Ìfẹ́ rẹ ti dùn tó, arábìnrin mi, ìyàwó mi! Ìfẹ́ rẹ tu ni lára ju ọtí wáìnì lọ, òórùn ìkunra rẹ sì ju òórùn gbogbo tùràrí lọ!

¹¹Ètè rẹ ń kán dídùn afárá oyin, ìyàwó mi; wàrà àti oyin wà lábẹ́ ahọ́n rẹ. Òórùn aṣọ rẹ sì dàbí òórùn Lébánónì.

¹²Arábìnrin mi ni ọgbà tí a sọ, arábinrin mi, ìyàwó mi ìṣun tí a sé mọ́, oríṣun tí a fi èdìdì dì.

¹³Ohun ọ̀gbìn rẹ àgbàlá pàmóńgánéètì ni ti òun ti àṣàyàn èso; kípírésì àti nádì,

¹⁴Nádì àti Ṣáfírónì, kálámúsì àti kínámónì, àti gbogbo igi olóòórùn dídùn, òjíá àti álóé pẹ̀lú irú wọn.

¹⁵Ìwọ ni ọgbà oríṣun, kànga omi ìyè, ìṣàn omi láti Lẹ́bánónì wá.

¹⁶Jí ìwọ afẹ́fẹ́ àríwá kí o sì wá, afẹ́fẹ́ gúṣù! Fẹ́ lórí ọgbà mi, kí àwọn òórùn dídùn inú rẹ lè rùn jáde. Jẹ́ kí olùfẹ́ mi wá sínú ọgbà a rẹ̀ kí ó sì jẹ àṣàyàn èso rẹ̀.