Read Bíbélì Mímọ́ ní Èdè Yorùbá Òde-Òní Ìwé Wòlíì Àìsáyà 51 Bible Online

Ìwé Wòlíì Àìsáyà 51 - Bíbélì Mímọ́ ní Èdè Yorùbá Òde-Òní bible

Ìwé Wòlíì Àìsáyà 51

¹“Tẹ́tí sí mi, ẹ̀yin tí ó ń lépa òdodo àti ẹ̀yin tí ń wá OLÚWA: Wo àpáta, nínú èyí tí a ti gé yín jáde àti ihò òkúta níbi tí a ti gbẹ́ yín jáde;

²ẹ wo Ábúráhámù baba yín, àti Ṣérà, ẹni tó bí i yín. Nígbà tí mo pè é, òun nìkan ni, Èmi sì bùkún un, mo sì sọ́ọ́ di ọ̀pọ̀lọpọ̀.

³Dájúdájú, OLÚWA yóò tu Ṣíhónì nínú yóò sì bojú àánú wo gbogbo ahoro rẹ̀; Òun yóò sọ gbogbo aṣálẹ̀ rẹ̀ di Ídẹ́nì, gbogbo ìgbòrò rẹ̀ yóò rí bí ọgbà OLÚWA. Ayọ̀ àti inúdídùn ni a ó rí nínú rẹ̀, ọpẹ́ àti ariwo orín kíkọ.

⁴“Tẹ́tí sími, ẹ̀yin ènìyàn mi; gbọ́ tèmi, ẹ̀yin orílẹ̀ èdè mi: Òfin yóò ti ọ̀dọ̀ mi jáde wá; ìdájọ́ mi yóò di ìmọ́lẹ̀ sí àwọn orílẹ̀ èdè.

⁵Òdodo mi ń bọ̀ wá kíkankíkan, ìgbàlà mi ń bọ̀ lójú ọ̀nà, àti apá mi yóò sì mú ìdájọ́ wá sí àwọn orílẹ̀ èdè. Àwọn erékùṣù yóò wò mí wọn yóò sì dúró ní ìrètí fún apá mi.

⁶ Gbé ojú rẹ sókè sí àwọn ọ̀run, wo ilẹ̀ ní ìṣàlẹ̀ ilẹ̀; Àwọn ọ̀run yóò pòórá bí èéfín, ilẹ̀ yóò sì gbó bí ẹ̀wù àwọn olùgbé inú rẹ̀ yóò kú gẹ́gẹ́ bí àwọn eṣinṣin. Ṣùgbọ́n ìgbàlà mi yóò wà títí láé, òdodo mi kì yóò yẹ̀ láé.

⁷“Ẹ gbọ́ mi, ẹ̀yin tí ó mọ ohun tótọ́, ẹ̀yin ènìyàn tí ó ní òfin mi ní àyàa yín: Ẹ má ṣe bẹ̀rù ẹ̀gàn àwọn ènìyàn tàbí kí ẹ̀rù èébú wọn já a yín láyà.

⁸Nítorí kòkòrò yóò mú wọn lá bí aṣọ; Ìdin yóò sì mú wọn jẹ bí Ẹ̀gbọ̀n òwú. Ṣùgbọ́n òdodo mi yóò wà títí ayérayé, àti ìgbàlà mi láti ìrandíran.”

⁹Dìde, dìde! Kí o sì wọ ara rẹ ní agbára Ìwọ apá OLÚWA; dìde gẹ́gẹ́ bí i ti ọjọ́ ìgbà n nì, àti gẹ́gẹ́ bí i ti ìran àtijọ́. Ìwọ kọ́ lo ké Rékábù sí wẹ́wẹ́ tí o sì fa ewèlè yẹn ya pẹ́rẹpẹ̀rẹ?

¹⁰Ìwọ kọ́ ni ó gbẹ omi òkun bí àti àwọn omi inú ọ̀gbun, Tí o sì ṣe ọ̀nà nínú ìṣàlẹ̀ òkun tó bẹ́ẹ̀ tí àwọn ẹni ìràpadà yóò fi le là á kọjá?

¹¹Àwọn ẹni ìràpadà OLÚWA yóò padà wá. Wọn yóò wọ Ṣíhónì wá pẹ̀lú orin kíkọ; ayọ̀ ayérayé ni yóò sì bo oríi wọn. Ayọ̀ àti inú-dídùn yóò sì bà lé wọn ìbànújẹ́ àti ìtìjú yóò sì sá kúrò.

¹²“Èmi, àní Èmi, èmi ni ẹni tí ó tù ọ́ nínú. Ta ni ọ́ tí o fi ń bẹ̀rù ènìyàn ẹlẹ́ran-ara, àti ọmọ ènìyàn, tí ó jẹ́ koríko lásán,

¹³tí ìwọ sì gbàgbé OLÚWA ẹlẹ́dàá rẹ, ẹni tí ó ta àwọn ọ̀run tí ó sì fi ìpìlẹ̀ ayé ṣọlẹ̀, tí ẹ sì ń gbé nínú ìpayà lójoojúmọ́ nítorí ìbínú àwọn aninilára, tí wọ́n sì gbọ́kàn lé ipanirun? Nítorí ibo ni ìbínú àwọn aninilára gbé wà?

¹⁴Àwọn ẹlẹ́wọ̀n tí ń ṣojo la ó dá sílẹ̀ ní àìpẹ́ jọjọ wọn kò ní kú sínú túbú wọn, bẹ́ẹ̀ ni wọn kò ní ṣe aláìní àkàrà.

¹⁵Nítorí Èmi ni OLÚWA Ọlọ́run rẹ, tí ó ń ru òkun ṣókè tó bẹ́ẹ̀ tí ìgbì rẹ̀ fi ń pariwo OLÚWA àwọn ọmọ-ogun ni orúkọ rẹ̀.

¹⁶Mo ti fi ọ̀rọ̀ mi sí ẹnu rẹ mo sì ti fi òjìji ọwọ́ mi bò ọ́ Èmi tí mo tẹ́ àwọn ọ̀run sí àyè rẹ̀, ẹni tí ó fi ìpìlẹ̀ ilẹ̀ ayé lélẹ̀, àti ẹni tí ó sọ fún Ṣhíónì pé, ‘Ẹ̀yin ni ènìyàn mi.’ ”

¹⁷Jí, jí! Gbéra nílẹ̀ Ìwọ Jérúsálẹ́mù, ìwọ tí o ti mu láti ọwọ́ OLÚWA kọ́ọ̀bù ìbínú rẹ̀, ìwọ tí o ti fà á mu dégẹ̀dẹ̀gẹ́dẹ̀ fèrè tí ó n mú kí ènìyàn ta gbọ̀ngbọ̀nọ́n.

¹⁸Nínú gbogbo ọmọ tí ó bí kò sí ọ̀kankan tí ó lè tọ́ ọ sọ́nà nínú gbogbo ọmọ tí ó tọ́ kò sí èyí tí ó le fà á lọ́wọ́.

¹⁹Àjálù ìlọ́po ìlọ́po yìí ti dé bá ọ— ta ni yóò tù ọ́ nínú? Ìparun àti Ìdahoro, ìyàn àti idà ta ni yó pẹ̀tù sí ọ lọ́kàn?

²⁰Àwọn ọmọkùnrin rẹ ti dákú; wọ́n sùn sí oríta gbogbo òpópónà, gẹ́gẹ́ bí ẹtu tí a dé mọ́nú àwọ̀n. Ìbínú OLÚWA ti kún inú un wọn fọ́fọ́ọ́fọ́ àti ìbáwí Ọlọ́run yín.

²¹Nítorí náà ẹ gbọ́ èyí, ẹ̀yin tí a ti ṣẹ́ níṣẹ̀ẹ́, tí ọtí ń pa, ṣùgbọ́n kì í ṣe fún wáìnì

²²Ohun tí OLÚWA yín Alágbára jùlọ wí nìyìí, Ọlọ́run rẹ, ẹni tí ó ń pa ènìyàn an rẹ̀ mọ́ “Kíyèsí i, mo ti mú un kúrò ní ọwọ́ọ̀ rẹ kọ́ọ̀bù tí ó mú ọ ta gbọ̀ngbọ̀nọ́n; láti inú kọ́ọ̀bù náà, ẹ̀kan ìbínú mi, ni ìwọ kì yóò mu mọ́.

²³Èmi yóò fi lé àwọn apọ́nnílójú rẹ lọ́wọ́, àwọn tí ó wí fún ọ pé, ‘Dọ̀bálẹ̀, tó bẹ́ẹ̀ tí a ó fi máa rìn lóríì rẹ.’ Ìwọ náà ṣe ẹ̀yìn rẹ gẹ́gẹ́ bí ilẹ̀ gẹ́gẹ́ bí òpópónà láti máa rìn lóríi rẹ̀.”