Read Bíbélì Mímọ́ ní Èdè Yorùbá Òde-Òní Ìwé Wòlíì Jeremáyà 9 Bible Online

Ìwé Wòlíì Jeremáyà 9 - Bíbélì Mímọ́ ní Èdè Yorùbá Òde-Òní bible

Ìwé Wòlíì Jeremáyà 9

¹Áà! Orí ìbá jẹ́ orísun omi kí ojú mi sì jẹ́ orísun omijé Èmi yóò sì sunkún tọ̀sán tòru nítorí pípa àwọn ènìyàn mi.

²Áà! èmi ìbá ní ilé àgbàwọ̀ fún àwọn arìnrìn-àjò ní ihà kí n ba à lè fi àwọn ènìyàn mi sílẹ̀ kí n sì lọ kúrò lọ́dọ̀ wọn: nítorí gbogbo wọn jẹ́ pańṣágà àjọ aláìsòótọ́ ènìyàn ni wọ́n.

³Wọ́n ti pèsè ahọ́n wọn sílẹ̀ bí ọfà láti fi pa irọ́; kì í ṣe nípa òótọ́ ni wọ́n fi borí ní ilẹ̀ náà. Wọ́n ń lọ láti inú ẹ̀ṣẹ̀ kan sí òmíràn, wọn kò sì náání mi, ní OLÚWA wí.

⁴Ṣọ́ra fún àwọn ọ̀rẹ́ rẹ; má ṣe gbẹ́kẹ̀lé àwọn arákùnrin rẹ nítorí pé oníkálukú arákùnrin jẹ́ atannijẹ, oníkálukú ọ̀rẹ́ sì jẹ́ abanijẹ́.

⁵Ọ̀rẹ́ ń dalẹ̀ ọ̀rẹ́. Kò sì sí ẹni tó sọ òótọ́, wọ́n ti kọ́ ahọ́n wọn láti máa purọ́. Wọ́n sọ ara wọn di onírẹ̀wẹ̀sì pẹ̀lú ẹ̀ṣẹ̀

⁶Ó ń gbé ní àárin ẹ̀tàn wọ́n kọ̀ láti mọ̀ mí nínú ẹ̀tàn wọn, ni OLÚWA wí.

⁷Nítorí náà, èyí ni ohun tí OLÚWA Ọlọ́run Àwọn ọmọ ogun wí: “Wò ó, èmi dán wọn wo; nítorí pé kí ni èmi tún le è ṣe? Nítorí ẹ̀ṣẹ̀ àwọn ènìyàn mi?

⁸Ahọ́n wọn dàbí ọfà olóró ó ń sọ ẹ̀tàn; oníkálukú sì ń fi ẹnu rẹ̀ sọ̀rọ̀ àlàáfíà sí aládúgbò rẹ̀; ní inú ọkàn rẹ̀, ó dẹ tàkúté sílẹ̀.

⁹Èmi kì yóò háa fi ìyà jẹ wọ́n nítorí èyí?” ni OLÚWA wí. “Èmi kì yóò ha gbẹ̀san ara mi lórí irú orílẹ̀ èdè yìí bí?”

¹⁰Èmi yóò sì sunkún, pohùnréré ẹkún fún àwọn òkè; àti ẹkún ìrora lórí pápá oko ihà wọ̀n-ọn-nì. Nítorí wọ́n di ahoro, wọn kò sì kọjá ní ibẹ̀. A kò sì gbọ́ igbe ẹran ọ̀sìn, àwọn ẹyẹ ojú ọ̀run sì ti sá lọ, bẹ́ẹ̀ náà ni àwọn ẹranko sì ti lọ.

¹¹“Èmi yóò sì sọ Jérúsálẹ́mù di òkìtì àlàpà àti ìhò àwọn ìkokò. Èmi ó sì sọ ìlú Júdà di ahoro tí ẹníkẹ́ní kò sì ní le è gbé.”

¹²Ta ni ẹni náà tí ó ní ọgbọ́n láti mòye nǹkan wọ̀nyí? Ta ni OLÚWA ti sọ èyí fún, tí ó sì lè ṣàlàyé rẹ̀? È é ṣe tí ilẹ̀ náà fi ṣègbé bí ihà, tí ẹnìkankan kò sì le là á kọjá?

¹³OLÚWA sì wí pé, nítorí pé wọ́n ti kọ òfin mi sílẹ̀, èyí tí mo gbé kalẹ̀ níwájú wọn, wọn ṣe àìgbọ́ràn sí wọn, wọn kò sì rìn nínú òfin mi.

¹⁴Dípò èyí, wọ́n ti tẹ̀lé agídí ọkàn wọn, wọ́n ti tẹ̀lé Báálì gẹ́gẹ́ bí àwọn baba wọn ṣe kọ́ wọn.

¹⁵Nítorí náà, èyí ni ohun tí OLÚWA Àwọn ọmọ ogun, Ọlọ́run Ísírẹ́lì wí, “Wò ó, Èmi yóò mú kí àwọn ènìyàn wọ̀nyí jẹ oúnjẹ kíkorò àti láti mu omi májèlé.

¹⁶Èmi yóò sì tú wọn ká láàrin àwọn orílẹ̀ èdè, nínú èyí tí àwọn tàbí àwọn baba wọn kò mọ̀. Èmi yóò sì lépa wọn pẹ̀lú idà títí èmi yóò fi pa wọ́n run.”

¹⁷Èyí sì ni ohun tí OLÚWA Ọlọ́run Àwọn ọmọ ogun wí: “Ṣáà wò ó nísisìnyìí! Ké sí obìnrin ọlọ́fà nì kí ó wá; sì ránsẹ́ pe àwọn tí ó mòye nínú wọn.

¹⁸Jẹ́ kí wọn wá kíákíá, kí wọn wá pohùnréré ẹkún lé wa lórí títí ojú wa yóò fi ṣàn fún omijé tí omi yóò sì máa ṣàn àwọn ìpéǹpéjú wa

¹⁹A gbọ́ igbe ìpohùnréré ẹkún ní Síónì: ‘Àwa ti ṣègbé tó! A gbọdọ̀ fi ilẹ̀ wa sílẹ̀, nítorí pé àwọn ilé wa ti parun.’ ”

²⁰Nísínsìnyìí, ẹ̀yin obìnrin ẹ gbọ́ ọ̀rọ̀ OLÚWA. Sí etí yín sí ọ̀rọ̀ ẹnu rẹ. Kọ́ àwọn ọmọbìnrin yín ní ìpohùnréré ẹkún, kí ẹ sì kọ́ ara yín ní arò.

²¹Ikú ti gba ojú fèrèsé wa wọlé ó sì ti wọ odi alágbára wa ó ti ké àwọn ọmọ kúrò ní àdúgbò àti àwọn ọ̀dọ́mọ́kùnrin kúrò ní gbọ̀ngàn ìta gbangba.

²²Sọ pé, “Èyí ni ohun tí OLÚWA wí: “ ‘Òkú àwọn ènìyàn yóò ṣubú bí ààtàn ní oko gbangba àti bí ìbùkúnwọ́ lẹ́yìn olùkórè láìsí ẹnìkankan láti kó wọn jọ.’ ”

²³Èyí ni ohun tí OLÚWA wí: “Má ṣe jẹ́ kí ọlọgbọ́n yangàn nítorí ọgbọ́n rẹ̀, tàbí alágbára nítorí rẹ̀, tàbí ọlọ́rọ̀ nítorí ọrọ̀ rẹ̀.

²⁴ Ẹ jẹ́ kí ẹni tí ń ṣògo nípa èyí nì wí pé òun ní òye, òun sì mọ̀mí wí pé, Èmi ni OLÚWA tí ń ṣe òtítọ́ ìdájọ́ àti òdodo ní ayé nínú èyí ni mo ní inú dídùn sí,” OLÚWA wí.

²⁵“Ọjọ́ ń bọ̀,” ni OLÚWA wí, “tí Èmi yóò fi ìyà jẹ gbogbo àwọn tí a kọ ilà fún nínú ara nìkan.

²⁶Éjíbítì, Júdà, Édómù, Ámónì, Móábù àti gbogbo àwọn tí ń gbé ní ọ̀nà jínjìn réré ní ihà. Nítorí pé gbogbo àwọn orílẹ̀ èdè wọ̀nyí jẹ́ aláìkọlà gbogbo àwọn ará ilé Ísírẹ́lì sì jẹ́ aláìkọlà ọkàn.”