Read Bíbélì Mímọ́ ní Èdè Yorùbá Òde-Òní Ìwé Ẹkún Jeremáyà 3 Bible Online

Ìwé Ẹkún Jeremáyà 3 - Bíbélì Mímọ́ ní Èdè Yorùbá Òde-Òní bible

Ìwé Ẹkún Jeremáyà 3

¹Èmi ni ọkùnrin tí ó rí ìpọ́njú pẹ̀lú ọ̀pá ìbínú.

²Ó ti lémi jáde ó sì mú mi rìn nínú òkùnkùn ju ti ìmọ́lẹ̀;

³Nítòótọ́, ó ti yí ọwọ́ padà sí mi síwájú àti síwájú sí i ní gbogbo ọjọ́.

⁴Ó jẹ́ kí àwọ̀ mi àti ẹran ara mi gbó ó sì tún ṣẹ́ egungun mi.

⁵Ó ti fi mí sí ìgbèkùn ó sì ti yí mi ká pẹ̀lú ìkorò àti làálàá.

⁶Ó mú mi gbé nínú òkùnkùn bí ti àwọn tó ti kú fún ìgbà pípẹ́.

⁷Ó ti tì mí mọ́lé nítorí náà n kò le è sálọ; ó ti fi ẹ̀wọ̀n mú mi mọ́lẹ̀

⁸Pàápàá nígbà tí mo ké fún ìrànlọ́wọ́, ó kọ àdúrà mi.

⁹Ó fi búlọ́kù òkúta dí ọ̀nà mi; ó sì mú ọ̀nà mi wọ́

¹⁰Bí i béárì tí ó dùbúlẹ̀, bí i kìnnìún tí ó sá pamọ́.

¹¹Ó wọ́ mi kúrò ní ọ̀nà, ó tẹ̀ mí mọ́lẹ̀ ó fi mi sílẹ̀ láì sí ìrànlọ́wọ́.

¹²Ó fa ọfà rẹ̀ yọ ó sì fi mí sohun ìtafàsí.

¹³Ó fa ọkàn mí ya pẹ̀lú ọfà nínú àkọ̀ rẹ̀.

¹⁴Mo di ẹni yẹ̀yẹ́ láàrin àwọn ènìyàn mi; wọn yẹ̀yẹ́ mi pẹ̀lú orin ní gbogbo ọjọ́.

¹⁵Ó ti kún mi pẹ̀lú ewé kíkorò àti ìdààmú bí omi.

¹⁶Ó ti fi òkúta kán ẹyín mi; ó ti tẹ̀ mí mọ́lẹ̀ nínú eruku.

¹⁷Mo ti jìnnà sí àlàáfíà; Mo ti gbàgbé ohun tí àṣeyege ń ṣe.

¹⁸Nítorí náà mo wí pé, “Ògo mi ti lọ àti ìrètí mi nínú OLÚWA.”

¹⁹Mo ṣe ìrántí ìpọ́njú àti ìdààmú mi, ìkorò àti ìbànújẹ́.

²⁰Mo ṣèrántí wọn, ọkàn mi sì gbọgbẹ́ nínú mi.

²¹Síbẹ̀, èyí ni mo ní ní ọkàn àti nítorí náà ní mo nírètí.

²²Nítorí ìfẹ́ OLÚWA tí ó lágbára ni àwa kò fi ṣègbé, nítorí àánú rẹ kì í kùnà.

²³Wọ́n jẹ́ ọ̀tún ní àárọ̀; títóbi ni òdodo rẹ̀.

²⁴Mo wí fún ara mi, ìpín mi ni OLÚWA; nítorí náà èmi yóò dúró dè ọ́

²⁵Dídára ni OLÚWA fún àwọn tí ó ní ìrètí nínú rẹ̀, sí àwọn tí ó ń wá a.

²⁶Ó dára kí a ní ṣùúrù fún ìgbàlà OLÚWA.

²⁷Ó dára fún ènìyàn láti gbé àjàgà nígbà tí ó wà ní èwe.

²⁸Jẹ́ kí ó jókòó ní ìdákẹ́jẹ́, nítorí OLÚWA ti fi fún un.

²⁹Jẹ́ kí ó bò ojú rẹ̀ sínú eruku— ìrètí sì lè wà.

³⁰Jẹ́ kí ó fi ẹ̀rẹ̀kẹ́ fún àwọn tí yóò gbá a, sì jẹ́ kí ó wà ní ìdójútì.

³¹Ènìyàn kò di ìtanù lọ́dọ̀ OLÚWA títí láé.

³²Lóòtọ́ ó mú ìbànújẹ́ wá, yóò fi àánú hàn, nítorí náà títóbi ni ìfẹ́ rẹ̀.

³³Nítorí kò mọ̀ọ́mọ̀ mú ìpọ́njú wá tàbí ìrora wá fún ọmọ ènìyàn.

³⁴Kí ó tẹ̀ lábẹ́ ẹsẹ̀ gbogbo àwọn ẹlẹ́wọ̀n ní ilẹ̀ náà.

³⁵Láti ṣẹ́ ọmọ ènìyàn fún ẹ̀tọ́ rẹ̀ níwájú ẹni ńlá.

³⁶Láti yí ìdájọ́ ènìyàn po, Ǹjẹ́ OLÚWA kò rí ohun bẹ́ẹ̀.

³⁷Ta ni yóò sọ̀rọ̀ tí yóò rí bẹ́ẹ̀ tí OLÚWA kò bá fàṣẹ sí i.

³⁸Ǹjẹ́ kì í ṣe láti ẹnu ẹni ńlá ni dídára àti búburú tí ń wá?

³⁹Kí ló dé tí ẹ̀dá alàyè ṣe ń kùn nígbà tí ó bá ń jìyà ẹ̀ṣẹ̀ rẹ̀.

⁴⁰Ẹ jẹ́ kí a yẹ ọ̀nà wa kí a sì dán an wò, kí a sì tọ OLÚWA lọ.

⁴¹Ẹ jẹ́ kí a gbé ọkàn àti ọwọ́ wa sókè sí Ọlọ́run ní ọ̀run, kí a wí pé:

⁴²Àwa ti ṣẹ̀ a sì ti ṣọ̀tẹ̀ ìwọ kò sì fi ẹ̀ṣẹ̀ wa jìn wá.

⁴³“Ìwọ fi ìbínú bo ara rẹ ìwọ sì ń lépa wa; ìwọ ń parun láì sí àánú.

⁴⁴Ìwọ ti fi ìkuukù bo ara rẹ pé kí àdúrà wa má ba à dé ọ̀dọ̀ rẹ.

⁴⁵Ó ti sọ wá di èérí àti ààtàn láàrin orílẹ̀ èdè gbogbo.

⁴⁶“Gbogbo àwọn ọ̀tá wa ti la ẹnu wọn gbòòrò sí wa.

⁴⁷Àwa ti jìyà àti ìparun, nínú ìbẹ̀rù àti ewu.”

⁴⁸Omijé ń ṣàn ní ojú mi bí odò nítorí a pa àwọn ènìyàn mi run.

⁴⁹Ojú mi kò dá fún omijé, láì sinmi,

⁵⁰títí ìgbà tí OLÚWA síjú wolẹ̀ láti òkè ọ̀run tí yóò sì rí i.

⁵¹Ohun tí mo rí mú ìbẹ̀rù wá ọkàn mi nítorí gbogbo àwọn obìnrin ìlú mi.

⁵²Àwọn tí ó jẹ́ ọ̀tá mi láìnídìí dẹ mí bí ẹyẹ.

⁵³Wọ́n gbìyànjú láti mú òpin dé bá ayé mi nínú ihò wọ́n sì ju òkúta lù mí.

⁵⁴Orí mi kún fún omi, mo sì rò pé ìgbẹ̀yìn dé.

⁵⁵Mo pe orúkọ rẹ, OLÚWA, láti ọ̀gbun ìsàlẹ̀ ihò.

⁵⁶Ìwọ gbọ́ ẹ̀bẹ̀ mi: “Má ṣe di etí rẹ sí igbe ẹ̀bẹ̀ mi fún ìtura.”

⁵⁷O wá tòsí nígbà tí mo ké pè ọ́, o sì wí pé, “Má se bẹ̀rù.”

⁵⁸OLÚWA, ìwọ gba ẹjọ́ mi rò, o ra ẹ̀mí mi padà.

⁵⁹O ti rí i, OLÚWA, búburú tí a ṣe sí mi Gbé ẹjọ́ mi ró!

⁶⁰Ìwọ ti rí ọ̀gbun ẹ̀san wọn, gbogbo ìmọ̀ wọn sí mi.

⁶¹OLÚWA ìwọ ti gbọ́ ẹ̀gàn wọn àti ìmọ̀ búburú wọn sí mi—

⁶²Ohun tí àwọn ọ̀tá mi ń sọ sí mi ní gbogbo ọjọ́.

⁶³Wò wọ́n! Ní jíjòkòó tàbí ní dídìde, wọ́n ń ṣẹlẹ́yà mi nínú orin wọn.

⁶⁴OLÚWA san wọ́n lẹ́san ohun tí ó tọ́ sí wọn fún ohun tí ọwọ́ wọn ti ṣe.

⁶⁵Fi ìbòjú bò wọ́n ní ọkàn, kí o sì fi wọ́n ré.

⁶⁶Ni wọ́n lára kí o sì pa wọ́n run pẹ̀lú ìbínú, lábẹ́ ọ̀run OLÚWA.