Read Bíbélì Mímọ́ ní Èdè Yorùbá Òde-Òní Ìwé Ẹkún Jeremáyà 4 Bible Online

Ìwé Ẹkún Jeremáyà 4 - Bíbélì Mímọ́ ní Èdè Yorùbá Òde-Òní bible

Ìwé Ẹkún Jeremáyà 4

¹Báwo ni wúrà ṣe sọ ògo dídán rẹ̀ nù, wúrà dídára di àìdán! Òkúta ibi mímọ́ wá túká sí oríta gbogbo òpópó.

²Báwo ni àwọn ọ̀dọ́mọkùnrin Síónì tí ó ṣe iyebíye, tí wọ́n wọn iye wúrà ṣe wá dàbí ìkòkò amọ̀ lásán iṣẹ́ ọwọ́ amọ̀kòkò!

³Àwọn ọ̀wàwà pèsè ọmú wọn fún ìtọ́jú àwọn ọmọ wọn, ṣùgbọ́n àwọn ènìyàn mi wá láì lọ́kàn bí ògòǹgò ní aṣálẹ̀.

⁴Nítorí òùngbẹ, ahọ́n àwọn ọmọ ọwọ́ lẹ̀ mọ́ òkè ẹnu wọn; àwọn ọmọdé bẹ̀bẹ̀ fún oúnjẹ Ṣùgbọ́n kòsí ẹni tí ó fi fún wọn.

⁵Àwọn tí ó ń jẹ ohun dáradára di òtòsì ní òpópó. Àwọn tí a fi aṣọ dáradára wọ̀ ni wọ́n sùn ní orí òkítì eérú.

⁶Ìjìyà àwọn ènìyàn mi tóbi ju ti Sódómù lọ, tí a sí nípò ní òjijì láì sí ọwọ́ láti ràn án lọ́wọ́.

⁷Ọmọ ọba ọkùnrin wọn mọ́ ju òjò dídì, wọ́n sì funfun ju wàrà lọ lára, wọ́n ni ìtọ́jú bí iyùn pupa, ìrísí wọn dàbí sáfírè.

⁸Ṣùgbọ́n nísinsìn yìí wọ́n dúdú ju èédú; wọn kò sì dá wọn mọ̀ ní òpópó. Ara wọn hun mọ́ egungun; ó sì gbẹ bí igi gbígbẹ.

⁹Àwọn tí ó kù nípasẹ̀ idà sàn ju àwọn tí ìyàn pa; tí ó wọ àkísà ebi, tí ó ń ṣòfò fún àìní oúnjẹ láti inú pápá.

¹⁰Pẹ̀lú ọwọ́ àwọn obìnrin aláàánú ni wọ́n ṣe ọmọ wọn tí ó di oúnjẹ fún wọn nígbà tí a pa àwọn ènìyàn mi run.

¹¹OLÚWA ti fi ihò kíkún fún ìbínú rẹ̀; ó sì tú ìbínú gbígbóná rẹ̀ jáde. Ó da iná ní Síónì tí ó jó ìpìlẹ̀ rẹ̀ run.

¹²Àwọn ọba ayé kò gbàgbọ́, tàbí àwọn ènìyàn ayé, wí pé àwọn ọ̀tá àti aninilára le wọ odi ìlú Jérúsálẹ́mù.

¹³Èyí ṣẹlẹ̀ nítorí ẹ̀ṣẹ̀ àwọn wòlíì àti àìṣedédé àwọn olórí àlùfáà, tí ó ta ẹ̀jẹ̀ àwọn olódodo sílẹ̀ láàrin rẹ̀.

¹⁴Nísinsìnyí wọ́n ń rìn kiri ní òpópó bí ọkùnrin tí ó fọ́jú. Ẹ̀jẹ̀ ara wọn sọ wọ́n di àbàwọ́n tí kò sẹ́ni tó láyà láti fọwọ́ kan aṣọ wọn.

¹⁵“Lọ kúrò! Ẹ̀yin di aláìmọ́!” ni àwọn ènìyàn ń kígbe sí wọn. “Ẹlọ! Ẹlọ! Ẹ má se fọwọ́ kàn wá!” Àwọn ènìyàn láàrin orílẹ̀ èdè wí pé, “Wọn kì yóò tẹ̀dó síbí mọ́.”

¹⁶OLÚWA ti tú wọn ká fún-ra-ra-rẹ̀; kò sí bojú tó wọn mọ́. Kò sí ọ̀wọ̀ fún olórí àlùfáà mọ́, àti àánú fún àwọn àgbà.

¹⁷Síwájú sí i, ojú wa kùnà fún wíwo ìrànlọ́wọ́ asán; láti orí ìṣọ́ wa ni à ń wò fún orílẹ̀-èdè tí kò le gbà wá là.

¹⁸Wọ́n ń ṣọ́ wa kiri, àwa kò sì le rìn ní òpópó wa mọ́. Òpin wa ti súnmọ́, ọjọ́ wa sì níye nítorí òpin wa ti dé.

¹⁹Àwọn tí ń lé wa yára ju idì ojú ọ̀run lọ; wọ́n lé wa ní gbogbo orí òkè wọ́n sì gẹ̀gùn dè wá ní ihà.

²⁰Ẹni àmì òróró OLÚWA, èémí ìyè wa, ni wọ́n fi tàkúté wọn mú. Àwa rò pé lábẹ́ òjìji rẹ̀ ni àwa yóò máa gbé láàrin orílẹ̀-èdè gbogbo.

²¹Ẹ yọ̀ kí inú yín sì dùn, ẹ̀yin ọmọbìnrin Édómù, ẹ̀yin tó ń gbé ní ilẹ̀ Húsì. Ṣùgbọ́n, a ó gbé aago náà kọjá sọ́dọ̀ rẹ pẹ̀lú; ìwọ yóò yó bí ọ̀mùtí, ìwọ yóò sì rìn ní ìhòòhò.

²²Ìwọ ọmọbìnrin Síónì, ìjìyà rẹ yóò dópin; kò ní mú ìgbékùn rẹ pẹ́ mọ́. Ṣùgbọ́n, ìwọ ọmọbìnrin Édómù, yóò jẹ ẹ̀sẹ̀ rẹ níyà yóò sì fi àìṣedédé rẹ hàn kedere.