Read Bíbélì Mímọ́ ní Èdè Yorùbá Òde-Òní Ìwé Wòlíì Jóẹ́lì 2 Bible Online

Ìwé Wòlíì Jóẹ́lì 2 - Bíbélì Mímọ́ ní Èdè Yorùbá Òde-Òní bible

Ìwé Wòlíì Jóẹ́lì 2

¹Ẹ fun ìpè ní Ṣíónì, ẹ sì fún ìpè ìdágàrì ní òkè mímọ́ mi. Jẹ́ kí àwọn ará ilẹ̀ náà wárìrì, nítorí tí ọjọ́ OLÚWA ń bọ̀ wá, nítorí ó kù sí dẹ̀dẹ̀.

²Ọjọ́ òkùnkùn àti òkùdù, ọjọ́ ìkùùkù àti òkùnkùn biribiri, bí ọyẹ́ òwúrọ̀ ti í la bo orí àwọn òkè ńlá: àwọn ènìyàn ńlá àti alágbára; ya dé, ti kó ti ì sí irú rẹ̀ rí, bẹ́ẹ̀ ni irú rẹ̀ kì yóò sí mọ́ lẹ́yìn rẹ̀, títí dé ọdún ìran dé ìran.

³Iná ń jó níwájú wọ́n; ọwọ́ iná sì ń jó lẹ́yìn wọn: ilẹ̀ náà dàbí ọgbà Édẹ́nì níwájú wọn, àti lẹ́yìn wọn bí ahoro ijù; nítòótọ́, kò sì sí ohun tí yóò bọ́ lọ́wọ́ wọn.

⁴ Ìrí wọn dàbí ìrí àwọn ẹṣin; wọ́n ń ṣe láńkú láńkú lọ bí àwọn ẹlẹ́ṣin ogun

⁵Bí ariwo kẹ̀kẹ́ ogun ni wọn ń fo ní orí òkè bí ariwo ọ̀wọ́ iná tí ń jó koríko gbígbẹ, bí akọni ènìyàn tí a kó jọ fún ogun.

⁶Ní ojú wọn, àwọn ènìyàn yóò jẹ ìrora púpọ̀: gbogbo ojú ní yóò ṣú dudu.

⁷Wọn yóò sáré bi àwọn alágbára; wọn yóò gùn odi bí ọkùnrin ológun; olúkúlúkù wọn yóò sì rìn lọ ní ọ̀nà rẹ̀, wọn kì yóò sì yà kúrò ni ọ̀nà wọn.

⁸Bẹ́ẹ̀ ni ẹnìkan kì yóò to ẹnìkejì rẹ̀; olúkúlukù wọn yóò rìn ní ọ̀nà rẹ̀: nígbà tí wọn bá sì ṣubú lù ìdà wọn kì yóò gbọgbẹ́.

⁹Wọn yóò sáré síwá ṣẹ́yìn ní ìlú; wọn yóò súré lórí odi, wọn yóò gùn orí ilé; wọn yóò gbà ojú fèrèsé wọ̀ inú ilé bí olè.

¹⁰ Ayé yóò mì níwájú wọn; àwọn ọ̀run yóò wárìrì; òòrùn àti òṣùpá yóò ṣókùnkùn, àwọn ìràwọ̀ yóò sì fà ìmọ́lẹ̀ wọn ṣẹ́yìn.

¹¹ OLÚWA yóò sì bú rámu ramù jáde níwájú ogun rẹ̀: nítorí ibùdó rẹ̀ tóbi gidigidi; nítorí alágbára ní òun, tí n mú ọ̀rọ rẹ̀ ṣẹ; nítorí ọjọ́ OLÚWA tóbi ó sì ní ẹ̀rù gidigidi; ara ta ni ó lè gbà á?

¹²“Njẹ́ nítorí náà nísínsin yìí,” ni OLÚWA wí, “Ẹ fi gbogbo ọkàn yín yípadà sí mi, àti pẹ̀lú ààwẹ̀, àti pẹ̀lú ẹkún, àti pẹ̀lú ọ̀fọ̀.”

¹³Ẹ sì fa ọkàn yín ya, kì í sì í ṣe aṣọ yín, ẹ sì yípadà sí OLÚWA Ọlọ́run yín, nítorí tí o pọ̀ ní oore ọ̀fẹ́, ó sì kún fun àánú, ó lọ́ra láti bínú, ó sì ṣeun púpọ̀, ó sì ronúpìwàdà láti ṣe búburú.

¹⁴Ta ni ó mọ̀ bí òun yóò yípadà, kí o sì ronúpìwàdà, kí ó sì fí ìbùkún sílẹ̀ lẹ́yìn rẹ̀; àní ọrẹ jíjẹ àti ọrẹ mímu fún OLÚWA Ọlọ́run yín?

¹⁵Ẹ fún ìpè ní Ṣíónì, ẹ ya ààwẹ̀ kan sí mímọ́, ẹ pe àjọ tí ó ni ìrònú.

¹⁶Ẹ kó àwọn ènìyàn jọ, ẹ ya ìjọ sí mímọ́; ẹ pe àwọn àgbà jọ, ẹ kó àwọn ọmọdé jọ, àti àwọn tí mú ọmú: jẹ kí ọkọ ìyàwó kúrò nínú iyẹ̀wù rẹ̀. Kí ìyàwó sì kúrò nínù ìyàrá rẹ̀

¹⁷Jẹ́ kí àwọn àlùfáà, àwọn ìránṣẹ́ OLÚWA, sọkún láàrin ìlorò àti pẹpẹ, sí jẹ́ kí wọn wí pé, “Dá àwọn ènìyàn rẹ sí OLÚWA, má sì ṣe fi ìní rẹ fun ẹ̀gàn, ti àwọn aláìkọlà yóò fi má jọba lórí wọn: èéṣe tí wọn yóò fi wí láàárin àwọn ènìyàn pé, ‘Ọlọ́run wọn há da?’ ”

¹⁸Nígbà náà ní OLÚWA yóò jowú fún ilẹ̀ rẹ̀, yóò sì káànú fún ènìyàn rẹ̀.

¹⁹Nítòótọ́, OLÚWA yóò dá wọn lóhùn: “Yóò sì wí fun àwọn ènìyàn rẹ̀ pé, Wò ó èmi yóò rán ọkà, àti ọtí wáìnì tuntun, àti òróró síi yín, a ó sì fi wọn tẹ́ yín lọ́rùn: èmi kì yóò si fí yín ṣe ẹ̀gan mọ́ láàrin àwọn aláìkọlà.

²⁰“Ṣùgbọ́n èmi yóò lé ogun àríwá jìnnà réré kúrò lọ́dọ̀ yín, èmi yóò sì lé e lọ sí ilẹ̀ tí ó ṣá, tí ó sì di ahoro, pẹ̀lú ojú rẹ̀ sí òkun ìlà oòrùn, àti ẹ̀yìn rẹ̀ sí ìwọ̀ oòrùn òkun. Oòrùn rẹ̀ yóò sì gòkè, òórùn búburú rẹ̀ yóò sì gòkè.” Nítòótọ́ ó ti ṣe ohun ńlá.

²¹Má bẹ̀rù, ìwọ ilẹ̀; jẹ́ kí inú rẹ̀ dùn kí o sì yọ̀, nítorí OLÚWA ti ṣe ohun ńlá,

²²Ẹ má bẹ̀rù, ẹranko igbó, nítorí pápá-oko ihà ń rú, nítorí igi ń so èso rẹ̀, igi ọ̀pọ̀tọ́ àti àjàrà ń so èso ipá wọn.

²³Ǹjẹ́ jẹ́ kí inú yín dùn, ẹ̀yin ọmọ Ṣíónì, ẹ sì yọ̀ nínú OLÚWA Ọlọ́run yín, nítorí ó ti fi àkọ́rọ̀ òjò fún yín bí ó ti tọ́, Òun ti mú kí òjò rọ̀ sílẹ̀ fún un yín, àkọ́rọ̀ àti àrọ̀kúrò òjò ní oṣù kìn-ín-ní.

²⁴Àwọn ilẹ̀ ìpàkà yóò kún fún ọkà; àti ọpọ́n wọn nì yóò ṣàn jáde pẹ̀lú ọti wáìnì tuntun àti òróró.

²⁵“Èmi yóò sì mú ọdún wọ̀nyí ti eṣú jẹ run padà fún un yín. Èyí tí eṣú agénijẹ àti eṣú jewéjewé ọwọ́ eṣú agénijẹ àti kòkòro ajẹnirun mìíràn ti fi jẹ àwọn ogun ńlá mí tí mo rán sí àárin yín.

²⁶Ẹ̀yin yóò ni ọ̀pọ̀lọpọ̀ láti jẹ, titi ẹyin yóò fi yó ẹ ó sì yín orúkọ OLÚWA Ọlọ́run yín, ẹni tí ó fi ìyanu bá yín lò; ojú kì yóò sì ti àwọn ènìyàn mi láéláé.

²⁷Ẹ̀yin yóò sì mọ̀ pé, èmi wà láàrin Ísírẹ́lì, àti pé; Èmi ni OLÚWA Ọlọ́run yín, ati pé kò sí ẹlòmíràn: ojú kì yóò sì ti àwọn ènìyàn mí láéláé.

²⁸ “Yóò sì ṣe, èmi yóò tú ẹ̀mi mí sí ara ènìyàn gbogbo; àti àwọn ọmọ yín ọkùnrin, àti àwọn ọmọ yín obìnrin yóò máa ṣọtẹ́lẹ̀, àwọn arúgbó yín yóò máa lá àlá, àwọn ọ̀dọ́mọ́kunrìn yín yóò máa ríran.

²⁹Àti pẹ̀lú sí ara àwọn ọmọ ọ̀dọ̀ ọkùnrin, àti sí ara àwọn ọmọ ọ̀dọ̀ obìnrin, ní èmi yóò tú ẹ̀mi mí jáde ní ọjọ́ wọ̀n-ọn-nì.

³⁰Èmi yóò sì fi iṣẹ́ ìyanu hàn ní ọrun àti ní àyé, ẹ̀jẹ̀ àti iná, àti ọ̀wọ́n èéfín.

³¹ A á sọ oòrùn di òkùnkùn, àti òṣùpá di ẹ̀jẹ̀, kí ọjọ́ ńlá àti ọjọ́ ẹ̀ru OLÚWA tó dé.

³² Yóò sí ṣe ẹnikẹ́ni tí ó ba ké pè orúkọ OLÚWA ní a ó gbàlà: nítorí ní òkè Ṣíónì àti ní Jérúsálẹ́mù ní ìgbàlà yóò gbé wà, bí OLÚWA ti wí, àti nínú àwọn ìyókù tí OLÚWA yóò pè.