Read Bíbélì Mímọ́ ní Èdè Yorùbá Òde-Òní Ìwé Wòlíì Ámósì 1 Bible Online

Ìwé Wòlíì Ámósì 1 - Bíbélì Mímọ́ ní Èdè Yorùbá Òde-Òní bible

Ìwé Wòlíì Ámósì 1

¹Àwọn ọ̀rọ̀ Ámósì, ọ̀kan lára àwọn olùsọ́ àgùntàn Tékóà; ohun tí o rí nípa Ísírẹ́lì ní ọdun méjì ṣáàjú ilẹ̀ riri, nígbà tí Úsáyà ọba Júdà àti Jéróbóámù ọmọ Jéóhásì jẹ́ ọba ní ilẹ̀ Ísírẹ́lì.

² Ó wí pé: “OLÚWA yóò bú jáde láti Síóní ohùn rẹ̀ yóò sì sán bí àrá láti Jérúsálẹ́mù wá; Ibùgbé àwọn olùṣọ́ àgùntàn yóò sì ṣọ̀fọ̀, Orí-òkè Kámẹ́lì yóò sì rọ.”

³ Èyí ni ohun tí OLÚWA wí: “Nítorí ẹ̀ṣẹ̀ mẹ́ta tí Dámásíkù, àní fún mẹ́rin, Èmi kò ní yí ìpinnu ìjìyà mi pada Nítorí wọn fi ohun èlò ìpakà pa Gílíádì. Pẹ̀lú ohun èlo irin tí ó ní eyín mímú

⁴Èmi yóò rán iná sí ilé Hásáélì Èyí ti yóò jó àwọn ààfin Bẹni-Hádádì run.

⁵Èmi yóò ṣẹ́ ọ̀pá ìdáàbú Dámásíkù; Èmi yóò sì pa ọba tí ó wà ní pẹ̀tẹ́lẹ̀ Áfénì run Àti ẹni tí ó di ọ̀pá aládé mú ní Bẹti-Édénì. Àwọn ará a Árámù yóò lọ sí ìgbèkùn sí Kírì,” ni OLÚWA wí.

⁶ Èyí ni ohun tí OLÚWA wí: “Nítorí ẹ̀ṣẹ̀ mẹ́ta Gásà, àní nítorí mẹ́rin, Èmi kò ní yí ìpinnu ìjìyà mi padà Gẹ́gẹ́ bí í oníṣòwò ẹrú, ó kó gbogbo àwọn ènìyàn mi ní ìgbékùn. Ó sì tà wọ́n fún Édómù,

⁷Èmi yóò rán iná sí ara odi Gásà tí yóò jó gbogbo ààfin rẹ̀ run

⁸Èmi yóò ké àwọn olùgbé Ásódì kúrò. Àti ẹni tí ó di ọ̀pá aládé ní Ákélónì mú. Èmi yóò yí ọwọ́ mi sí Ékírónì títí tí ìyókù Fílístínì yóò fi ṣègbé,” ni OLÚWA Ọlọ́run wí.

⁹ Èyí ni ohun tí OLÚWA wí: “Nítorí ẹ̀ṣẹ̀ mẹ́ta ti Tírè àní nítorí mẹ́rin, Èmi kì yóò yí ìpinnu ìjìyà mi padà. Nítorí wọ́n ta gbogbo àwọn ènìyàn tí ó wà ní ìgbékùn fún Édómù Wọn kò sì nán-án-ní májẹ̀mú ọbàkan,

¹⁰Èmi yóò rán iná sí ara odi Tírè Tí yóò jó gbogbo àwọn ààfin rẹ̀ run.”

¹¹ Èyí ni ohun tí OLÚWA wí: “Nítorí ẹ̀ṣẹ̀ mẹ́ta tí Édómù, àní nítorí mẹ́rin, Èmi kò ní yí ìpinnu ìjìyà mi padà Nítorí òhun fi idà lépa arákùnrin rẹ̀, Ó sì gbé gbogbo àánú sọnù ìbínú rẹ̀ sì ń faniya títí ó sì pa ìbínú rẹ̀ bí èéfín mọ́

¹²Èmi yóò rán iná sí orí Témánì Tí yóò jó gbogbo ààfin Bósírà run.”

¹³ Èyí ni ohun tí OLÚWA wí: “Nítorí ẹ̀ṣẹ̀ mẹ́ta ti Ámónì àní mẹ́rin, Èmi kò ní yí ìpinnu ìjìyà mi padà, Nítorí wọn ti la inú àwọn aboyún Gílíádì kí wọ́n ba à lè fẹ ilẹ̀ wọn sẹ́yìn.

¹⁴Èmi yóò rán iná sí ara odi Rábà Èyí tí yóò jó àwọn ààfin rẹ̀ run pẹ̀lú igbe ní ọjọ́ ogun pẹ̀lú ìjì ní ọjọ́ ààjà

¹⁵Ọba wọn yóò sì lọ sí ìgbèkùn Òun àti àwọn ọmọ aládé rẹ̀ lápapọ̀,” ni OLÚWA wí.