Read Bíbélì Mímọ́ ní Èdè Yorùbá Òde-Òní Ìwé Wòlíì Ámósì 3 Bible Online

Ìwé Wòlíì Ámósì 3 - Bíbélì Mímọ́ ní Èdè Yorùbá Òde-Òní bible

Ìwé Wòlíì Ámósì 3

¹Ẹ gbọ́ ọ̀rọ̀ tí Ọlọ́run ti sọ nípa rẹ̀, ẹ̀yin ènìyàn Ísírẹ́lì nípa àwọn ìdílé tí mo mú jáde láti Éjíbítì:

²“Ìwọ nìkan ni ẹni tí mo yàn nínú gbogbo àwọn ìran ayé yìí; nígbà náà èmi ó jẹ ọ́ níyà fún gbogbo ẹ̀ṣẹ̀ rẹ.”

³Ẹni méjì ha à le rìn pọ̀ láìjẹ́ pé wọ́n ti gbà láti ṣe é?

⁴Ǹjẹ́ Kìnnìún yóò ha bú ramúramù nínú igbo, bí kò bá ní ohun ọdẹ? Ọmọ kìnnìún yóò ha ké jáde nínú ìhó rẹ̀ bí kò bá rí ohun kan mú?

⁵Ǹjẹ́ ẹyẹ ṣubú sínú okùn ọdẹ lórí ilẹ̀ nígbà tí a kò dẹ okùn ọdẹ fún un? Okùn ọdẹ ha lè hù jáde lórí ilẹ̀ nígbà tí kò sí ohun tí yóò mú?

⁶Nígbà tí ìpè bá dún ní ìlú, àwọn ènìyàn kò ha bẹ̀rù? Tí ewu bá wú ìlú kò ha ṣe OLÚWA ni ó fà á?

⁷ Nítòótọ́ OLÚWA Ọlọ́run kò ṣe ohun kan láìfi èrò rẹ̀ hàn sí àwọn wòlíì ìránṣẹ́ rẹ̀.

⁸Kìnnìún ti bú ramúramù ta ni kì yóò bẹ̀rù? OLÚWA Ọlọ́run ti sọ̀rọ̀ ta ni le ṣe àìsọtẹ́lẹ̀?

⁹Ẹ kéde ní ààfin Áṣídódù àti ní ààfin ní ilẹ̀ Éjíbítì. “Ẹ kó ara yín jọ sí orí òkè ńlá Samáríà; Kí ẹ sì wo ìrọ́kẹ̀kẹ̀ ńlá láàrin rẹ̀ àti ìnílára láàrin àwọn ènìyàn rẹ.”

¹⁰“Wọn kò mọ bí wọ́n ṣe ń ṣe rere,” ni OLÚWA wí, “Ẹni tí ó gba àwọn ìwà ipá àti olè sí ààfin rẹ̀.”

¹¹Nítorí náà, báyìí ni OLÚWA Ọlọ́run wí: “Àwọn ọ̀tá yóò pa ilẹ̀ náà run; yóò wó ibi gíga yín palẹ̀ a ó sì ba ààfin rẹ̀ jẹ́.”

¹²Èyí ni ohun tí OLÚWA wí: “Bí olusọ-àgùntan ti ń gbà itan méjì kúrò ní ẹnu kìnnìun tàbí ẹ̀là eti kan bẹ́ẹ̀ ni a ó mú àwọn ọmọ Ísírẹ́lì, tí ń gbé Samáríà kúrò ní igun ibùsùn wọn ní orí àga ìrọ̀gbọ̀kú wọn ní Dámásíkù.”

¹³“Gbọ́ èyí kí o sì jẹ́rìí nípa ilé Jákọ́bù,” ni OLÚWA wí, OLÚWA Ọlọ́run alágbára.

¹⁴“Ní ọjọ́ tí mo fìyà jẹ Ísírẹ́lì lórí ẹ̀ṣẹ̀ wọn, Èmi yóò pa pẹpẹ Bétélì run; ìwo pẹpẹ ni a ó ké kúrò yóò sì wó lulẹ̀.”

¹⁵“Èmi yóò wó ilé òtútù lulẹ̀ pẹ̀lú ilé ẹ̀ẹ̀rùn; ilé tí a fi eyín erin ṣe lọ́ṣọ̀ọ́ yóò ṣègbé a ó sì pa ilé ńlá náà run,” ni OLÚWA wí.