Read Bíbélì Mímọ́ ní Èdè Yorùbá Òde-Òní Ìwé Wòlíì Ámósì 5 Bible Online

Ìwé Wòlíì Ámósì 5 - Bíbélì Mímọ́ ní Èdè Yorùbá Òde-Òní bible

Ìwé Wòlíì Ámósì 5

¹Gbọ́ ọ̀rọ̀ yìí, ìwọ ilé Ísírẹ́lì, ìpohùnréré ẹkún tí mo ṣe nípa rẹ:

²“Wúndíá Ísírẹ́lì ṣubú láì kò sì le padà dìde ó di ẹni ìkọ̀tì ní ilẹ̀ rẹ̀ kò sí ẹni tí yóò gbé e nàró.”

³Èyí ni ohun tí OLÚWA ọ̀gá ògo wí: “Ìlú tí ẹgbẹ̀rún alágbára ti jáde, yóò dín ku ọgọ́run ní Ísírẹ́lì. Ìlú tí ọgọ́run alàgbà ti jáde yóò ṣẹ́ku ẹni mẹ́wàá.”

⁴Èyí ni ohun tí OLÚWA sọ fún ilé Ísírẹ́lì: “Wá mi kí o sì yè;

⁵Ẹ má ṣe wá Bẹ́tẹ́lì, Ẹ má ṣe lọ sí Gílígálì Ẹ má ṣe rìnrìn àjò lọ sí Bíáṣébà. Nítorí dájúdájú a ó kó Gílígálì ní ìgbèkùn A ó sì sọ Bẹ́tẹ́lì di asán.”

⁶Ẹ wá OLÚWA, ẹ̀yin yóò sì yè, Kí ó má ba à gbilẹ̀ bí iná ní Jósẹ́fù A sì jó o run Bẹ́tẹ́lì kò sì ní rí ẹni tí yóò bomi pa á.

⁷Ẹ̀yin tí ẹ̀ sọ òdodo di ìkorò Tí ẹ sì gbé olódodo ṣánlẹ̀

⁸Ẹni tí ó dá ìràwọ̀ Píláédì àti Óríónì Ẹni tí ó sọ òru dúdú di òwúrọ̀ Tí ó sọ ọjọ́ dúdú di ìmọ́lẹ Ẹni tí ó wọ́ omi òkun jọpọ̀ Tí ó sì rọ̀ wọ́n sí orí ilẹ̀ OLÚWA ni orúkọ rẹ̀,

⁹Ó fọ́n ìparun sí ìlú olódi Tí ó sì sọ àwọn ibùgbé àwọn ọmọ aládé di ahoro

¹⁰Ìwọ kórìíra ẹni tí ń ṣòdì ní ẹnu ibodè ó sì ń pẹ̀gàn ẹni tí ń sọ òtítọ́

¹¹Ìwọ ń tẹ talákà mọ́lẹ̀ o ń fi ipá gba ọkà lọ́wọ́ wọn Nítorí náà, ìwọ ti fi òkúta tí a gbẹ́ kọ́lé ṣùgbọ́n ẹ kò sì ní gbé inú wọn Nítòótọ́ ìwọ ti gbin ọgbà àjàrà tí ó lẹ́wà. Ìwọ kò ní mu wáìnì inú wọn

¹²Nítorí mo mọ iye àìṣedédé rẹ mo sì mọ bí ẹ̀ṣẹ̀ rẹ tí tóbi tó. Ìwọ ni olódodo lára, ìwọ sì ń gba àbẹ̀tẹ́lẹ̀ o sì ń fi òtítọ́ du talákà ní ilé ẹjọ́

¹³Àwọn ọlọgbọ́n máa ń dákẹ́ jẹ́ẹ́ ní àkókò wọ̀nyí Nítorí búburú ni gbogbo ọjọ́.

¹⁴Wá rere, má ṣe wá búburú kí ìwọ ba à le yè Nígbà náà ni OLÚWA alágbára yóò wà pẹ̀lú ù rẹ. Òun yóò sì wà pẹ̀lú ù rẹ bí ìwọ ṣe wí

¹⁵Kòrìírà búburú kí o sì fẹ́ rere Dúró ní orí òtítọ́ ní ilé ẹjọ́ Bóyá OLÚWA Ọlọ́run alágbára yóò síjú àánú wo ọmọ Jósẹ́fù tó ṣẹ́kù

¹⁶Nítorí èyí ni ohun tí OLÚWA, Ọlọ́run alágbára wí: “Ẹkún yóò wà ní àwọn òpópónà igbe ìnira yóò sì wà ní àwọn gbàgede ìlú A ó kó àwọn àgbẹ̀ jọ láti sunkún Àti àwọn tí ń ṣọ̀fọ̀ láti pohùnréré ẹkún

¹⁷Ìpohùnréré ẹkún yóò wà ní gbogbo ọgbà àjàrà Nítorí èmi yóò la àárin yín kọjá,” ni OLÚWA wí.

¹⁸Ègbé ni fún ìwọ tí ó pẹ́ nítorí ọjọ́ OLÚWA kí ni ìwọ fi pẹ́ fún ọjọ́ OLÚWA? Ìmọ́lẹ̀ yóò di òkùnkùn ní ojú ọjọ́

¹⁹Yóò dàbí ọkùnrin tí ó sá láti ẹnu àmọ̀tẹ́kùn. Tí ó padà wá bọ́ sí ẹnu ẹkùn yóò dàbí ẹni tí ó wọ ilé rẹ̀ lọ tí ó simi lé ògiri ilé rẹ̀ tí ejò sì bù ú ṣán.

²⁰Ǹjẹ́ ọjọ́ OLÚWA kò ha ní ṣókùnkùn dípò kí ó ní ìmọ́lẹ̀? Tí ó sì ṣókùnkùn dúdú láìsí ìmọ́lẹ̀ kankan níbẹ̀

²¹“Mo kórìíra, mo kẹ́gàn àwọn àṣè ẹ̀sìn in yín Èmi kò sì ní inú dídùn sí àpèjọ yín

²²Bí ó tilẹ̀ jẹ́ pé ẹ mú ọrẹ sísun àti ọrẹ ọkà wá Èmi kò ní tẹ́wọ́n gbà wọ́n Bí ó tilẹ̀ jẹ́ pé ẹ mú àṣàyàn ọrẹ àlàáfíà wá. Èmi kò ní náání wọn.

²³Ẹ gbé ariwo orin yín sẹ́yìn Èmi kò ní fetísí ohun èlò orin yín.

²⁴Jẹ́ kí òtítọ́ ṣàn bí odò àti òdodo bí ìsun tí kò lé è gbẹ

²⁵ “Àbí ẹ̀yin mú ẹbọ àti ọrẹ tọ̀ mí wá ní ogójì ọdún ní ihà ìwọ ilé Ísírẹ́lì?

²⁶Ẹ̀yin ń gbé ibi ìrúbọ àwọn ọba yín ibùgbé àwọn òrìṣà yín àní, ti àwọn òrìṣà yín tí ó níyì jùlọ, èyí tí ẹ̀yin fi ọwọ́ ara yín ṣe.

²⁷Nítorí náà èmi yóò rán an yín lọ sí ìgbèkùn ní ìkọjá Dámásíkù,” ni OLÚWA wí, ẹni tí orúkọ rẹ̀ ń jẹ́ Ọlọ́run alágbára.