Read Bíbélì Mímọ́ ní Èdè Yorùbá Òde-Òní Ìwé Nọ́ḿbà 23 Bible Online

Ìwé Nọ́ḿbà 23 - Bíbélì Mímọ́ ní Èdè Yorùbá Òde-Òní bible

Ìwé Nọ́ḿbà 23

¹Bálámù sọ́ wí pé, “Kọ́ pẹpẹ méje fún mi níbí, kí o sì mú akọ màlúù méje àti àgbò méje wá fún mi.”

²Bálákì ṣe bí Bálámù ti sọ, àwọn méjèèjì fi akọ màlúù kọ̀ọ̀kan àti àgbò kọ̀ọ̀kan rúbọ lórí pẹpẹ kọ̀ọ̀kan.

³Nígbà náà Bálámù sọ fún Bálákì pé, “Dúró ní ẹ̀gbẹ́ ẹbọ rẹ kí èmi sì lọ sí ẹ̀gbẹ́ kan. Bóyá OLÚWA yóò farahàn mí. Ohunkóhun tí ó bá fihàn, mí màá sọ fún ọ.” Nígbà náà ó sì lọ sí ibi gíga.

⁴Ọlọ́run sì pàdé rẹ̀, Bálámù sì sọ pé, “Mo tí ṣe pẹpẹ méje, lórí pẹpẹ kọ̀ọ̀kan mo ti fi akọ màlúù àti àgbò kọ̀ọ̀kan rúbọ.”

⁵OLÚWA sì fi ọ̀rọ̀ sí ẹnu Bálámù ó wí pé, “Padà sí ọ̀dọ̀ Bálákì kí o sì jẹ́ iṣẹ́ yìí fún un.”

⁶Ó sì padà sí ọ̀dọ̀ rẹ̀ ó sì ba tí ó dúró sí ẹ̀gbẹ́ ẹbọ rẹ̀, pẹ̀lú gbogbo àwọn ìjòyè Móábù.

⁷Nígbà náà ni Bálámù sọ ọ̀rọ̀ ìjìnlẹ̀ jáde wí pé: “Bálákì mú mi láti Árámù wá, ọba Móábù láti òkè ìlà oòrùn wá Ó wí pé, ‘Wá fi Jákọ́bù bú fún mi; wá, kí o sì jẹ́rì i sí Ísírẹ́lì.’

⁸Báwo ní èmi ó ṣe fi bú àwọn tí Ọlọ́run kò fi bú? Báwo ni èmi ó ṣe bá wọn wí àwọn tí OLÚWA kò bá wí?

⁹Láti ṣónṣó ibi gíga orí àpáta ni mo ti rí wọn, láti orí ibi gíga ni mo ti ń wò wọ́n. Mo rí àwọn ènìyàn tí ń gbé lọ́tọ̀ wọn kò sì ka ará wọn kún ara àwọn orílẹ̀ èdè.

¹⁰Ta ni ó lè ka eruku Jákọ́bù tàbí ka ìdámẹ́rin Ísírẹ́lì? Jẹ́ kí èmi kú ikú olóòtọ́, kí ìgbẹ̀yìn mi kí ó dàbí ti wọn!”

¹¹Bálákì sọ fún Bálámù pé, “Kí lo ṣe fún mi? Mo gbé ọ wá láti fi àwọn ọ̀ta mi bú, Ṣùgbọ́n o kò ṣe nǹkan kan Ṣùgbọ́n o bùkún wọn!”

¹²Ó sì dáhùn wí pé, “Sé kí n má sọ nǹkan tí OLÚWA fi sí mi lẹ́nu?”

¹³Nígbà náà Bálákì sọ fún un pé, “Wá pẹ̀lú mi sí ibòmíràn tí o ti lè rí wọn; wà á rí díẹ̀ Ṣùgbọ́n kì í ṣe gbogbo wọn. Láti ibẹ̀, wá fi wọ́n bú fún mi.”

¹⁴Ó sì lọ sí pápá Ṣóímù ní orí òkè Písígà, ó sì kọ́ pẹpẹ méje síbẹ̀ ó sì fi akọ màlúù àti àgbò kọ̀ọ̀kan rúbọ lórí pẹpẹ kọ̀ọ̀kan.

¹⁵Bálámù ṣo fún Bálákì pé, “Dúró níbí ní ẹ̀gbẹ́ ẹbọ rẹ nígbà tí mo bá lọ pàdé rẹ̀ níbẹ.”

¹⁶OLÚWA pàdé Bálámù ó sì fí ọ̀rọ̀ sí ní ẹnu wí pé, “Padà lọ sí ọ̀dọ̀ Bálákì kí o sì jísẹ́ fún un.”

¹⁷Nígbà náà ó lọ sí ọ̀dọ̀ rẹ̀ ó sì báà tí ó dúró sí ẹ̀gbẹ́ ẹbọ rẹ̀ pẹ̀lú àwọn ìjòyè Móábù. Bálákì sì béèrè lọ́wọ́ rẹ̀ pé, “Kí ni OLÚWA wí?”

¹⁸Nígbà náà ó bẹ̀rẹ̀ ọ̀rọ̀ sísọ: “Dìde, Bálákì; kí o sì gbọ́ mi ọmọ Sípórà.

¹⁹Ọlọ́run kì í ṣe ènìyàn, tí yóò fi purọ́, tàbí ọmọ ènìyàn, tí ó lè yí ọkàn rẹ̀ padà. Ǹjẹ́ ó sọ̀rọ̀ kí ó má ṣe é? Ǹjẹ́ ó ti ṣèlérí kí ó má mu-un ṣẹ?

²⁰Èmi gba àṣẹ láti bùkún; Ó sì ti bùkún, èmi kò sì lè yípadà.

²¹“Kò rí ẹ̀ṣẹ̀ kankan nínú Jákọ́bù, kò sì rí búburú kankan nínú Ísírẹ́lì. OLÚWA Ọlọ́run wọn sì wà pẹ̀lú wọn. Ìhó ọba sì wà pẹ̀lú wọn.

²²Ọlọ́run mú wọn jáde láti Éjíbítì wá, wọ́n ní agbára màlúù ẹhànnà.

²³Kò ní àfọ̀ṣẹ sí Jákọ́bù, tàbí àfọ̀ṣẹ sí àwọn Ísírẹ́lì. Nísinsìnyìí a ó sọ nípa ti Jákọ́bù àti Ísírẹ́lì, ‘Wo ohun tí OLÚWA ti ṣe!’

²⁴Àwọn ènìyàn dìde bí abo kìnnìún; wọ́n dìde bí i kìnnìún tí kì í sinmi títí yóò fi pa ìkógún jẹ tàbí mu ẹ̀jẹ̀ ẹni tí ó fi ara pa.”

²⁵Nígbà náà ni Bálákì sọ fún Bálámù pé, “O ko fi wọ́n bú tàbí bùkún wọn rárá!”

²⁶Bálámù dáhùn pé, “Ǹjẹ́ mi ò sọ fún ọ pé mo gbọdọ̀ Ṣe ohun tí OLÚWA bá sọ?”

²⁷Nígbà náà Bálákì sọ fún Bálámù pé, “Wá jẹ́ kí èmi kí ó mú ọ lọ sí ibòmíràn bóyá yóò tẹ́ Ọlọ́run lọ́rùn kí ó fi wọ́n bú láti ibẹ̀ lọ.”

²⁸Bálákì gbé Bálámù wá sí orí òkè Péórì, tí ó kọjú sí ihà.

²⁹Bálámù sọ pé, “Kọ́ pẹpẹ méje fún mi níbí kí o sì pèsè akọ màlúù àti àgbò fún mi.”

³⁰Bálákì sì ṣe bí Bálámù ti sọ fún un, ó sì gbé akọ màlúù kan àti àgbò lórí pẹpẹ kọ̀ọ̀kan.